1 ዳማስቆባ ጎዳይ ሀይሳዳ ያጌስ፦ “ሄኮ፥ ህዛፐ ጉየ ዳማስቆይ ካታማ ግዶኖሽን፥ ላለꬃ ዶረ ግዳና። ኤርም 49:23-27፤ አሞ 1:3-5፤ ዛካ 9:1. 2 አሮራ ካታማት አስ ባይና ባይሳ ቢታ ግዳና፤ ያን መሄይ ሄመታና፤ ኤንታ ያሽያባይ ዴና። 3 ኤፍሬማፐ ሚፃት፥ ዳማስቆፈ ካዎተꬃይ ꬋያና፤ ሶረፐ አትዳ ጉꬃት እስራኤለ አሳ ቦንቹዋ መላ ግዳና” ያጌስ ኡባፈ ዎልቃማ ጎዳይ።

4 “ሄ ዎደ እስራኤለ ቦንቾይ ቃረታና፤ እያ ኦርደተꬃይ ግልቃና። 5 እስራኤለይ፥ ካꬅ ጫክ ኤክድ ከይዳ ጎሻ ጋደ መላ ግዳና፤ ዎይኮ ካꬅ ጫክ ስምን ካሎትዳ ራፋይመ ዛንጋራ መላ ግዳና። 6 ሻማሆ ቆቆፍ ስምን፥ ፄራን ናምኡ ዎይኮ ሄꬑ አይፈት አተይሳዳ ዎይኮ እስ ያንግያ ቦላ ኦይዱ ዎይኮ እቻሹ አይፈት አተይሳዳ እስራኤለፐ ጉꬃት አታና” ያጌስ ጎዳይ እስራኤለ ፆሳይ።

7 ሄ ጋላስ አሳይ ባንታና መꬍዳይሳኮ፥ ባንታ አይፍያካ እስራኤለ ጌሻኮ ዛራና። 8 ኤንቲ ባንታ ኩሸን ጊግስዳ ያርሾ በሳኮ ፄሎኮና፤ አሼራ ኤቃ ምስልያስ ግድን፥ እፃነ ጩይሳናዉ ኤንቲ ባንታ ኩሸን መꬍዳ ያርሾ በሳ ቦንቾኮና።

9 ሄ ዎደ እስራኤለ አሳ ጋሶን ህወነ አሞረ ካታማት ላለትዳይሳዳ ኤንታ ምኖ ካታማት ላለታና፤ ባይሳ ግዳና። 10 ህንተ ህንተና አሽያ ፆሳ ዶግደታ፤ ህንተ ቆሰት አትያ ዛላ ቆፕበከታ። ሄሳ ግሾ፥ ኔኒ ሎኦ ምꬃነ ካረ ቢታፈ ይዳ ሎኦ አታክልትያ ቶክኮካ፥ 11 ሄ ጋላስ ኤንቲ ድጭድ ጋካና መላ ኦꬅኮካ፥ ቃስ ኔኒ ዘርዳ ዎንተ ኤንቲ ጪያኮካ ኔኒ አይፈ ደማካ። እያ በሳን ፓፆና ሀርገነ መቶ ጫካና።

12 ሄኮ፥ አባ ቤታዳ ጉምያ ዳሮ አሳ፥ ቃስ ዎልቃማ ሃꬃዳ ዋስያ ካዎተꬃታ አየ! 13 ካዎተꬃት ዳሮ ሃꬃዳ ጉሞሶና፤ ሽን ጎዳይ ኤንታ ሴራና። ኤንቲ ዙማ ሁጰን ደእያ ቡረ ጫርኮይ ደንይሳዳነ ጎተይ ባና ደንይሳዳ ኤንታ ደንꬅድ ሃሆ በሲ ላላና። 14 ሳእ ቃምያ ዎደ ኤንቲ ዳጋማና፤ ሳእ ዎንታናፐ ስን ኤንቲ ꬋያና። ኑና ዎልቃን ኤከይሳታነ ቦንቀይሳታ ቃዳይ ሀይሳ።