1 አባ ማታን ደእያ ባዙዋስ ኦደትዳ ቃላ።

ናገበ ጎተይ መንረꬅሸ የይሳዳ ኦላንቾይ ባዞፈ፥ ꬋዮ ቢታፈ ዬስ።

2 ታኒ እስ ያሽያ ቆንጨꬅ በአስ፤ አꬅድ እመይስ አꬅድ እሜስ፤ ድኤይስ ድኤስ። ኤላማ ከያ! ሜዶና ካታማ ኦይካ! ባብሎነይ ጋꬅዳ ዋይያ ታኒ ድጋና።

3 ሄሳ ግሾ ታ አሳተꬃይ ሳከትስ፤ ማጫስ ኤቀተይሳዳ ታኒ ኡንኤታስ። ታኒ ስእያባይ ታና ኮኮርስስ፤ ታኒ በእያባይ ታና ዳጋንꬅስ። 4 ታና ቢጮዬስ፤ ያሻን ኮኮራስ፤ ታኒ ኡፋይስ ዎꬅዳ ኦማርሳይ ኡንአን ላመትስ።

5 ግብራ ጊግስዶሶና፤ ኡትያ ሶ ጊግስዶሶና፤ ማናዉነ ኡያናዉ ኡትዶሶና። ህንተኖ ሀላቃቶ፥ ደንድተ! ህንተ ጎንዳልያ ቁችተ!

6 ጎዳይ ታኮ ሀይሳዳ ያግስ፦ “ባዳ ሀንያባ ዎችድ ነዉ ኦድያ አስ ዎꬃ። 7 ፓራት ጋረ ጎችያ ዎደ፥ ሀረነ ግማለ ቶገይሳታ በእያ ዎደ፥ ሎይꬅድ ፄሎ፤ አኬክድ በኦ” ያግስ።

8 ዎቸይስ፥ “ጎዳዉ፥ ጋላስነ ቃማ ፓጭ ባይና ታ ሻኩዋ ቦላ ኡታዳ ናጋይስ። 9 ሄኮ፥ ናምአ ናምአ ግድድ ፓራ ጋረ ቶግዳ አሳት ዮሶና” ያግስ። እ ቃስካ፥ “ባብሎነይ ኩንድስ፤ እያ ፆሳታ ምስለት ሳአን ኩንድድ ጋጨትዶሶና” ያግድ ዋስስ። 10 ህንተኖ፥ ዉዱማን ጋጨትዳ ታ አሳዉ፥ ኡባፈ ዎልቃማ ጎዳፐ፥ እስራኤለ ፆሳፈ ስእዳባ ታኒ ህንተዉ ኦዳይስ።

11 ኤዶመባ ጎዳይ ሀይሳዳ ያግስ፦ “እስ አስ ሳይረፐ ታና ፄግድ፥ ናገይሶ፥ ሳእ ዎንታናዉ አይ ማል አትዴ? ናገይሶ፥ ሳእ ጌያናዉ አይ ማል አትዴ?” ያጌስ። 12 ናገይስ ዛሪድ፥ “ሳእ ዎንታና ሀኔስ፤ ሽን ዛር ቃማና። ህንተ ኦይቻናዉ ኮይኮ ኦይችተ፤ ስም ይድ ኦይችተ” ያግስ።

13 አራበ ባ ጎዳይ ሀይሳዳ ያጌስ፦ “ህንተኖ ዳዳና ዛልአንቾቶ፥ ህንተ፥ ህንተ ጫና ግማለታራ አራበ መላ ቢታን አቃና። 14 ህንተኖ፥ ቴማን ቢታን ደእያ አሳዉ፥ ሳሞትዳይሳታስ ሃ ኤህተ፤ ኮሻትዳይሳታስ ካꬅ እምተ። 15 ኤንቲ ማሻፈ፥ ሾሆፔ ሾደትዳ ማሻፈ፥ ዳፈትዳ ዶንገፈነ ምኖ ኦላፐ ባቃቶሶና” ያጌስ።

16 ጎዳይ ታኮ ሀይሳዳ ያግስ፦ “ኡነ ኦሳንቾ ዎደይ ዉረይሳዳ፥ እስ ላይꬃ ግዶን ቀዳረ ቦንቾ ኡባይ ዉራና። 17 ቀዳረን ደእያ ዶንገን ዱክያ ዎልቃማ ኦላንቾታፐ ጉꬃት አታና፤ ጎዳይ እስራኤለ ፆሳይ ሄሳ ኦድስ” ያግስ።