1 “ቆንጨꬃ ዛንጋራ” ጌተትያ በሳባ ጎዳይ ኦድዳ ቃላ። ህንተና ኡባ አይብ ኡንኤꬅን ፖቀ ኬꬃ ቦላ ከይደቲ? 2 ነኖ ዋሶይ፥ ድርጎይነ ዎጫም ኩምዳ ካታማዉ፥ ነ ግዶን ሀይቅዳ አሳት ማሻን ዎይኮ ኦላን ሀይቅቦኮና። 3 ህንተ ሀላቃት ኡባይ እስፈ ባቃትዶሶና፤ ኤንቲ ዶንገይ ባይና ጮ ድኤትዶሶና። ኤንቲ ሃክድ ባቃትኮካ በትዳ ኡባይ ኦይከትዶሶና። 4 ሄሳ ግሾ፥ “ታና አጋግተ፤ ታ አሳስ ምሻ ዬሆ አፉፃዳ ዬካና፤ ታ አሳ ꬋዩዋስ ታና ምንꬆፕተ” ያጋስ። 5 ጎዳይ፥ ኡባፈ ዎልቃማ ፆሳይ ቆንጨꬃ ዛንጋራን ዳጋማ፥ የተꬅነ ኡንአ ጋላስ ኦꬅስ፤ ቃስ ግምበት ዎድያ ጋላስነ ደረታኮ ማዴስ ዋስያ ጋላስ ኦꬅስ።

6 ኤላም ባ ፓራ ጋረታራነ ፓራ አሳታራ ባ ዶንግያ ኦይክድ ይስ፤ ቂራ ዎታዳረት ባንታ ጎንዳለታ ጊግስዶሶና። 7 ህንተ ሎኦ ዛንጋራት ፓራ ጋረታን ኩምዶሶና፤ ፓራ አሳት የሩሳላመ ፐንግያ ስንꬃን ኤቅዶሶና። 8 እ ይሁዳ ሚፃታ ቃርስ። ሄ ጋላስ ዎራ ኬꬃን ደእያ ካዋ ኦላ ሚሸታ በእደታ። 9 ዳዊታ ካታማ ግዶን ላለꬃ ዶርያ በእደታ፤ ጋርሳ ባጋን ደእያ ኦላን ሃ ኩንꬅደታ። 10 የሩሳላመን ደእያ ኬꬃታ ታይብደታ፤ ድርሳ ዛሪድ ግምባናዉ ኬꬃታ ላልደታ። 11 ካሰ ጋልአ ዜሩዋን ደእያ ሃꬃ ዛሪድ፥ ናምኡ ግምበታፐ ግዱዋን ኦላ ጊግስደታ። ሽን ህንተ ሄሳ መꬍዳ ፆሳ አኬክበከታ፤ ዎይኮ ዳሮ ዎደፐ ስን ሄሳ ሀልችዳይሳ ሀሳይበከታ።

12 ሄ ጋላስ ጎዳይ፥ ኡባፈ ዎልቃማ ፆሳይ፥ ህንተና ዬሆስነ ዘለልሳስ፥ ሁጰ ቡሉሳናዉነ ካዮ ማኦ ማአናዉ ፄግስ። 13 ሽን ህንተ ሄሳ አግድ ኡፋይተታነ የፄታ፤ ቦሩነ ዶርሰ ሹኬታ፤ አሹዋ ሜታ፤ ዎይነ ኡዬታ። ኑኒ “ዎንቶ ሀይቃናዉ ደእያ ግሾ፥ ሀች ማናነ ኡያና” ያጌታ።

14 ኡባፈ ዎልቃማ ጎዳይ ሀይሳ ታዉ ቆንጭስስ፤ “ህንተ ሀይቃና ጋካናዉ ሀ ናጋራይ ህንተዉ አቶ ጌተተና። ታኒ ጎዳይ፥ ኡባፈ ዎልቃማ ፆሳይ ሀይሳ ኦዳይስ” ያግስ።

15 ጎዳይ፥ ኡባፈ ዎልቃማ ፆሳይ፥ “ባዳ ካዎ ጋꬎን ሹመትዳ ሳምናሳኮ ሀይሳዳ ያጋ፤ 16 ኔኒ ሀይሳን አይ ኦꬃይ? ኔኒ ሀይሳን፥ ዛላ ዎጫዳ ዱፎ ጊግሳና መላ፥ ꬎቃ በሳን ነዉ ዱፎ ቦካና መላነ ዛላ ዎጫዳ ነዉ ሸምፖ በሲ ኦꬃና መላ ኦና ኦይቻዲ? 17 ነኖ ምኖ አድያዉ፥ ነና ጎዳይ ምንꬅድ ኦይካና፤ ጩጩምድ ዎራ ሆላና። 18 ኮሰዳ ነና ዩሽድ ዳልጋ ቢታን ሆላና። ነኖ ነ ጎዳ ኬꬃስ ዬላ ግድዳ አድያዉ ኔኒ ያን ሀይቃና፤ ነ ቦንቾ ፓራ ጋረት ያን አታና። 19 ታኒ ነና ነ ኦሱዋፐ ከሳና፤ ነ ሹማተꬃፈ ሻራና። 20 ሄ ጋላስ ታኒ ካልቀ ናኣ፥ ታ አይልያ ኤልያቄመ ፄጋና። 21 ታኒ ነ ማኡዋ እያ ማይዛና፤ ነ ዳንጩዋ እያ ዳንጭሳና፤ ነ ሹማተꬃ እያዉ እማና። እ፥ የሩሳላመንነ ይሁዳን ደእያ አሳስ አዋ ግዳና። 22 ታኒ ዳዊተ ኬꬃ ቁልፕያ እያዉ እማና፤ እ ዶይን ኦንካ ጎርደና፤ እ ጎርድን ኦንካ ዶየና። 23 ታኒ እያ አማንꬅያ በሳን ꬍሸዳ ቶላና፤ እ ባ አዋ ኬꬃስ ቦንቾ አራታ ግዳና። 24 ቃንዳፈ ኦቶ ጋካናዉ ደእያ ሶ ሚሸታ፥ ኮጫን ካቀይሳዳ፥ እያ አዋ ኬꬃ ቦንቹዋ፥ ናይታነ፥ ናይታ ናይታ ኡባ እያ ቦላ ካቃና” ያግስ።

25 ኡባፈ ዎልቃማ ጎዳይ ሀይሳዳ ያጌስ፦ “ሄ ጋላስ አማንꬅያ በሳን ꬍሽዳ ቶለይ ክቻና፤ ቃንፀታናነ ኩንዳና። እያ ቦላ ካቀትዳ ቶሆ ኡባይ ዱፅድ ዎꬋና” ያጌስ። ጎዳይ ሀይሳ ኦድስ።