1 ፅሮሳ ካታማስ ኦደትዳ ጎዳ ቃላይ ሀይሳ።

ፅሮሳ ካታማን ኬꬅ ዎይኮ ሸምፕያ ሶይ ባይና ግሾ ህንተኖ ታርሰሳ ማርካብያ ላገይሳቶ ዬክተ! ቆጵሮሳ ቢታፈ ሀ ዎረይ ህንተኮ ይስ። ህዝ 26:1—28:19፤ እዩ 3:4-8፤ አሞ 1:9-10፤ ዛካ 9:1-4፤ ማቶ 11:21-22፤ ሉቃ 10:13-14. 2 ህንተኖ፥ አባ ማታን ደእያ አሳዉ፥ ህንተኖ አባ ቦላራ ሄመትያ ዱረትዳ፥ ስዶና ዛልአንቾቶ፥ ስእ ጊተ! 3 ህንተዉ ያ ካꬃይ፥ ናይለ ሻፋፐ ጫከትዳ ሽሆራ ቢታ ካꬅ፤ ህንተ ካዎተꬃታስ ዛልኤ በሲ።

4 ነኖ ስዶና ካታማዉ፥ አባ ማታን ደእያ ሚፃዉ፥ አባይ፥ “ታኒ እቀታብከ፤ የላብከ፤ አደነ ማጫ ናአ ድቻብከ” ያግድ ኦድዳ ግሾ ዬላታ። 5 ሄ ዎረይ ግብፀ ቢታ ጋክያ ዎደ ኤንቲ ፅሮሳባ ስእድ ዳጋማና።

6 ህንተኖ አባ ማታን ደእያ አሳዉ፥ ዘሌልሸ ታርሰሳ ፕንተ። 7 በን ዎደ ኬፀትዳ ካታማይ፥ እያ ቶሆይ እያ ሃሆ ቢታ ኤፍዳይነ ህንተ እያን ኡፋይትያ ፅሮሳ ካታማይ ሀይሴ? 8 ካላቻ ዎስስያ ካታማ፥ እያ ዛልአንቾት ሀላቃታ ግድዳነ እያ ግዶን ባይዘይሳትነ ላመይሳት ቦንቸትዳይሳታ ግድዳ ፅሮሳ ካታማ ቦላ ሀይሳ ሀልችዳይ ኦኔ? 9 ኦቶራንቾታ ቦንቾ ኡባ ጉꬃናዉነ ቢታ ቦላ ቦንቸትዳ ኡባ ካዉሻናዉ ኡባፈ ዎልቃማ ጎዳይ ሀይሳ ሀልችስ።

10 ህንተኖ፥ ታርሰሳ አሳዉ፥ ህንተና ተቅያባይ ባይና ግሾ፥ ናይለ ሻፋዳ ቢታ ቦላ ኩምድ ጎግተ። 11 ጎዳይ አባ ቦላ ባ ኩሽያ ምጭስ፤ እያ ካዎተꬃ ቃꬅስ። ካናነ ሚፃ ላላና መላ ጎዳይ ኪትስ። 12 ጉጅድካ፥ “ህንተኖ፥ ኡንኤትዳ ስዶና አሳዉ፥ ህንተ ኡፋይሳን የፅያ ዎደይ ዉርስ። ደንድድ ቆጵሮሳ ፕንተ፤ ያንካ ህንተ ሳሮ ደመከታ” ያግስ።

13 ባብሎነ ቢታ በእተ፤ ሄ ቢታይ ሀእ ፓꬆናባ ግድስ። አሶረ አሳይ ሄ ቢታን ዶእ አቃናዳ ኦꬅስ። ኤንቲ ያን ደእያ ዎጋ ኬꬃታ ላልድ ባንታዉ ሚፃ ግምብዶሶና፤ ቢታ ባይሳ ኦꬅዶሶና።

14 ህንተኖ፥ ታርሰሳ ማርካበቶ፥ ህንተ ሚፃይ ላለትዳ ግሾ፥ ዘሌልተ።

15 ፅሮሳ ካታማይ እስ ካዎስ ደኦ ላይꬅ ግድያ ላፑን ታሙ ላይꬅ ዶገትድ ዳና ዎደይ ያና። ላፑን ታሙ ላይꬅ ዉርያ ዎደ ላይማ ማጫሳስ የፀትያ የꬃ መላ ፅሮሳ ካታማስ የፀታና። 16 ኤንቲ፥ “ነኖ ዶገትዳ ላይማ ካታማዉ፥ ነ ዲꬃ ኤካዳ ካታማራ ዩያ። ነና አሳይ ሀሳያና መላ ማልኦ ቃላን ዳሮ የꬅ የፃ” ያጋና።

17 ላፑን ታሙ ላይꬃይ ፖለትያ ዎደ፥ ጎዳይ ፅሮሳ ፆሞሳና። ሽን ሄሳፈ ጉየ፥ እ በን ባ ላይማተꬃ ኦሱዋኮ ስማና፤ ሳአን ደእያ ካዎተꬃታ ኡባራ ላይማታና። 18 ግዶሽን፥ እያ ዛልእያ ዎይነ እያ ዳሞዘይ ጎዳስ ዱማትዳይሳ ግዳና፤ እያ ዛልእያ ዎይነ ካꬅነ ሎኦ ማኦ ሻማናዉ፥ ጎዳስ ኦꬅያ አሳስ እመታናፐ አትሽን፥ ሚሸ ኬꬃን ዎይኮ ምንጃ ኬꬃን ኡተና።