26
ፆኖ ማዝሙረ
1 ሄ ጋላስ ይሁዳ ቢታን ሀ ማዝሙረይ የፀታና።
ኑስ ምኖ ካታም ደኤስ፤
ፆሳይ አቶተꬃ
እያ ዩሹዋን ግምበነ ሚፃ ኦꬅስ።
2 ባ አማኑዋ ናግያ ፅሎ ደረይ፥
ገላና መላ ካረታ ዶይተ።
3 እ ነናን አማነትዳ ግሾ፥
ባ ዎዛና ነናን ዎꬅዳ ኡራ፥
ኔኒ ፖሎ ሳሮተꬃን ናጋሳ።
4 ጎዳይ መርና ዛላ ግድያ ግሾ፥
ጎዳን መርናዉ አማነታ።
5 ꬎቃን ደኤይሳታ ዝቅ ኦꬅስ፤
ꬎቁ ግዳ ካታማ ካዉሽስ።
እያ ሳአን ዱገ የግስ፤
ቢታ ባናን ሆልስ።
6 ማንቆት እያ የꬋና
ኡንኤትዳይሳት እያ ቦላራ ሄመታና።
7 ፅሎታ ኦገይ ሱረ፤
አቤት ፅሉዋዉ፥ ኔኒ ፅሎታ ኦግያ ጊግሳሳ።
8 አቤት ጎዳዉ፥ ኑኒ ነ ህግያ ናጋናዉ አሞቶስ፤
ነ ሱንꬃ ቦንቾይነ ነ ቴማይ ኑ ዎዛና አሞ።
9 ቃማ ታኒ ነና ላሞታስ፤
ዎንታ ታ አያናይ ነና ምንꬅድ ኮዬስ።
ነ ቢታ ፕርዳናዉ ያ ዎደ፥
ሳአን ደእያ አሳይ ፅሎተꬅ ታማሬስ።
10 ኢታ አሳስ ኬሀተꬅ ኦሰትኮካ፥
እ ፅሎተꬅ ታማረና።
ሱረ ቢታን ኢታባ ኦꬄስ፤
ጎዳ ግታተꬃ ኤረና።
11 አቤት ጎዳዉ፥ ነ ኩሸይ ꬎቁ ግስ፤
ሽን ኤንቲ በኦኮና።
ነ አሳስ ኔኒ ምሸትያ ምሻ
በእድ ዬላቶ።
ኔኒ ነ ሞርከታስ ጊግስዳ ታማይ
ኤንታ ምድ ꬋይሶ።እብራ 10:27.
12 አቤት ጎዳዉ፥ ኑስ ሳሮተꬅ እማዳሳ፤
ኑ ኦሶ ኡባ ነ ኦꬃዳሳ።
13 አቤት ጎዳዉ፥ ኑ ፆሳዉ፥
ሀራ ጎዳት ኑና ሃርዶሶና፤
ሽን ኑኒ ነ ሱንꬃ ፃላላ ቦንቾስ።
14 ኤንቲ ሀይቅዶሶና፤ ስሚድ ደኦን ዶኮና።
ነ ሴርን ꬋይዳ ግሾ፥ ዛሪድ ደንዶኮና።
ኤንታ ቆፍሱዋ ኡባ ቁቻዳ ꬋይሳዳሳ።
15 አቤት ጎዳዉ፥ ኔኒ ካዎተꬃ ዳርሳዳሳ፤
ካዎተꬃ ዳርሳዳ ኔኒ ቦንቸታዳሳ፤
ቢታ ዛዋ ኡባ ዳልግሳዳሳ።
16 አቤት ጎዳዉ፥ መቶ ዎደ ኤንቲ ነና ኮይዶሶና።
ነ ኤንታ ሴርዳ ዎደ ነና ካልካሽድ ዎስዶሶና።
17 አቤት ጎዳዉ፥ ቃንꬃትዳ ማጫስ፥
የሎ ዎደይ ጋክን ኡንኤታዳ ዋሰይሳዳ፥
ኑኒ ነ ስንꬃን ሄሳዳ ሀንዳ።
18 ኑኒ ቃንꬃትዳ፤ እቀትዳ፤
ሽን ጫርኮ የልዳ።
ኑኒ ሳኣስ አቶተꬅ ኤህቦኮ፤
ቢታን ደእያ አሳ የልቦኮ።
19 ሀይቅዳ ነ አሳይ ፓፃና፤
ኤንታ አሀይ ደንዳና።
ህንተኖ፥ ቢታ ጋርሳን ደኤይሳቶ፥
ደንድድ ኡፋይሳ ማዝሙረ የፅተ።
ህንተ አካይ ዎንታ አካ መላ፤
ቢትያ ሀይቅዳይሳታ ዛራዳ እማና። ዳነ 12:2.
20 ታ አሳዉ፥ ብድ ህንተ ሶ ገልድ፥
ካርያ ህንተ ቦላ ጎርድተ።
ጎዳ ሀንቆይ አꬋና ጋካናዉ፥
ጉꬃ ዎደስ ህንተና ቆስተ።
21 ቢታ ቦላ ደእያ አሳ፥
ኤንታ ናጋራ ግሾ ሴራናዉ፥
ጎዳይ ባ ደእያ በሳፈ ከይድ ዬስ።
ቢትያ ባ ቦላ ጉክዳ ሱꬃ ቆንጭሳና፤
ሀይቅዳይሳታ ዛራዳ ገንꬁኩ።