1 ህንተኖ፥ ካዎተꬃቶ፥ ሺቅድ ስእተ! ህንተኖ፥ አሳዉ አኬክተ! ቢታይነ ቢታን ደእያባ ኡባይ፥ ሳእነ ሳአፐ ከያባ ኡባይ ስኦ። 2 ጎዳይ ካዎተꬃታ ኡባ ቦላ ሀንቀትስ፤ ኤንታ ቶራንቾታ ኡባ ቦላ ይሎትስ። እ፥ ኤንታ ኡባ ꬋይሳና፤ ኤንታ ሹከይሳታስ አꬅድ እማና። 3 ኤንታ አሀይ ሆለትድ፥ አትድ ፅንቃና፤ ደረት ኤንታ ሱꬃን ካመታና። 4 ሳሎ ፆልንቶት ኡባይ ሴራና፤ ሳሎት ሳሌናዳ ፃፀታና። ዎይነ ሀይꬅነ ባላሰ አይፈይ ቆቆፈተይሳዳ ፆልንቶት ኡባይ ቆቆፈታና። ማቶ 24:29፤ ማር 13:25፤ ሉቃ 21:26፤ ቆን 6:13-14.

5 ታ ማሻይ ሳሎታን አላና ጋካናዉ ኡይስ፤ ሄኮ ኤዶመ ቦላ፥ ታኒ ꬋይስዳ አሳ ቦላ ፕርዳናዉ ዎꬋና።እሳ 63:1-6፤ ኤርም 49:7-22፤ ህዝ 25:12-14፤ 35:1-15፤ አሞ 1:11-12፤ አብድ 1-14፤ ምልክ 1:2-5. 6 ጎዳ ማሻይ ሱꬃን ሙከትስ። ያርሾስ ሹከትያ ዶርሳታነ ዴሻታ ሱꬃን ማሽ ሙከተይሳዳነ ኤንታ ክላሆ ሞꬉዋን ካመተይሳዳ ጎዳ ማሻይ ሱꬃን ሙከትስ፤ ሞꬉዋን ካመትስ። ጎዳይ ባሶራ ካታማን ያርሾ፥ ኤዶመ ቢታን ግታ ሹካ ጊግስስ። 7 መንꬃት፥ ዎፋኖትነ ቦራት ኤንታራ ኩንዳና። ኤንታ ጋደይ ሱꬃ ፃላላ ግዳና፤ ኤንታ ቢታይ ሞꬎን ሙኑቀታና። 8 ጎዳይ ሀሎ ከያና ጋላስነ ፅዮነ ኦልዳ ሞርከታ ቦላ ኩሸ ዛርያ ላይꬅ ጊግስስ።

9 ኤዶመ ሻፋት መልድ ማደ ግድስ፤ እያ ባናይ ዲነ ላመታና፤ እያ ቢታይ ኤፅያ ማደ ግዳና። 10 ቃማነ ጋላስ ታማይ ቶኤና፤ እያ ጩያይ መርናዉ ጩያና። ኤዶመ ቢታይ የለተꬃፈ የለተꬃ ጋካናዉ ባይሳ ግዳና፤ ኦንካ መርናዉ ያራ ካንና።ቆን 14:11፤ 19:3. 11 ሽን ፅሎይነ ቁፃረይ እያ ላታና፤ ጉቶይነ ቁሮይ ያን ዳና። ፆሳይ ኤዶመ ቦላ ላለꬃ ዋꬋ ዎዶሮነ ባይሳተꬃ ቱምበ የዳና። 12 ሄ ቢታ አይስያ ካዎይ ዴና፤ ሀላቃት ያፐ ክቻና። 13 ካዎ ኬꬃታ አጉንꬅ፥ ሚፃታ ኦህ ማአና፤ ዎርካናት አላትያ በስነ ያንቾት ደእያ ሶ ግዳና። 14 ባዞ ዶአት ጎዳረታራ ጋሄታና፤ ቱና አያናት እሶይ እሱዋራ ፄገታና፤ ቃማ ቆለት ዎꬍድ ያን ዳና። 15 ጉቶት ያን ኬ ኬፅድ፥ ጱጱልድ ቆፃና። ባንታ ናይታ ባንታ ቀፈታ ጋርሳን ሀጳና፤ ጵርጮት ባንታ ላገታራ ያን ሺቃና።

16 ጎዳ ማፃፋን ኮይድ ናባብተ። ጎዳ ዶናይ ኦድዳ ግሾነ እያ አያናይ ሺሽዳ ግሾ፥ ሀይሳታፐ እሶይካ ፓጨና፤ ቃስ እሶይካ ባ ላገይ ባይና ዴና። 17 እ፥ ኤንታዉ ሳማ ከስስ፤ እያ ኩሸይ ቢታ ኤንታዉ ዎዶሮን ሻክስ፤ ኤንቲ እያ መርናዉ ላታና፤ የለተꬃፈ የለተꬃ ጋካናዉ ኤንቲ ያን ዳና።