1 ነና ꬋይሶና ደእሽን ሀራ ꬋይሰይሶ፥ ነና አꬅድ እሞና ደእሽን ሀራ አꬃ እመይሶ፥ ነና አየ! ነ ꬋይሶ አግዳ ዎደ ነና ꬋይሳና፤ ነ አꬃ እሞ አግዳ ዎደ ነና አꬅድ እማና።

2 አቤት ጎዳዉ፥ ኑና ማራ፤ ኑኒ ነና ኡፋይሳን ናጎስ፤ ዎንታ ዎንታ ኑስ ዎልቃ ግዳ፤ መቶ ዎደ ኑና አሻ። 3 ነ ግርሳ ደሹዋን ደረይ ባቃቴስ፤ ኔኒ ኑና ማዳናዉ ደንድያ ዎደ ካዎተꬃት ላለቶሶና። 4 ጎንዶይ ሺቀይሳዳ ህንተ ድኦይ ሺቃና፤ ቦለይ ድርገይሳዳ አሳይ እያ ቦላ ድርጋና።

5 ጎዳይ ቦላ ደእያ ግሾ፥ ꬎቁ ꬎቁ ግስ፤ ፅዮነ ሱረ ፕርዳንነ ፅሎተꬃን ኩንꬃና። 6 እ ህንተ ዎድያስ አማንꬅያ ባሶ ግዳና፤ ህንተዉ አቶተꬅ፥ ጭንጫተꬅነ ኤራተꬅ ግዳና፤ ጎዳስ ያሽ ሀ ኡባ ሻሉዋስ ቁልፐ ግዳና።

7 ሄኮ፥ ጎባት ኦገ ቦላ ዋሶሶና፤ ስገꬃናዉ ኪተትዳይሳት ጫመትድ ዬኮሶና። 8 ዎጋ ኦገት ካይሳትዶሶና፤ ኦግያራ ካንꬅያ አስ ባዋ። ጫቆይ ላለትስ፤ ካታማት ካትዶሶና፤ ቦንቾ አሳት ቦረትዶሶና። 9 ቢታይ አዛንስ፤ ዳቡርስ፤ ልባኖሰይ ዬላትድ መልስ፤ ሳሮና ዛንጋራይ መላ ቢታ ግድስ። ባሳነ ደርያንነ ቃርመሎሳ ደርያን ደእያ ምꬃ ሀይꬃይ ቆቆፈትስ።

10 ጎዳይ ሀይሳዳ ያጌስ፦ “ሀእ ታኒ ደንዳና፤ ሀእ ታኒ ቦንቸታና፤ ሀእ ታኒ ꬎቁ ꬎቁ ጋና። 11 ህንተ ኡቱላ ቃንꬃትድ ፑኖ የልደታ፤ ህንተ ሸምፖይ ህንተና ታማዳ ማና። 12 አሳይ ቦቅንተ ሹቻዳ ታማን ፁገታና፤ ቃስ አጉንꬃዳ ታማን ኤፃና። 13 ህንተኖ፥ ሃሆን ደኤይሳቶ፥ ታ ኦꬅዳይሳ ስእተ፤ ማታን ደኤይሳቶ ታ ዎልቃ አኬክተ” ያጌስ።

14 ፅዮነን ደእያ ናጋራንቾት ዳጋምዶሶና፤ ፆሳ ኤሮናይሳት ኮኮርዶሶና። ኤንቲ፥ “ኑ ግዶፈ ምያ ታማራነ መርናዉ ኤፅያ ላጩዋራ ዳናዉ ዳንዳኤይ ኦኔ?” 15 ፅሎተꬃን ሄመተይ፥ ሱረ ኦደተይ፥ በሶና ኦገራ በንትያ ጎአ እፀይ፥ ባ ኩሽያ ዎꬋፈ ኤኮና መላ ድገይ፥ ሸምፖ ዎꬎባ ስኦና መላ ባ ሀይꬃ ቱጨይ፥ ኢታባ ፄሎና መላ ባ አይፍያ ካመይ፥ 16 ሄ ኡራይ ꬎቃ በሳን ዳና። እ፥ ቆሰትድ አትያ በሳይ ምኖ ዛላ ግዳና፤ እያ ካꬃይ እያዉ እመታና፤ እ፥ ኡያ ሃꬃይ ፓጨና።

17 ህንተ አይፈይ ካዋ፥ እያ የገልሳራ በአና፤ ሃሆን ደእያ ቢታ ደማና። 18 ህንተ፥ “ሀላቃይ አዉን ደኢ? ጊራ ኤከይስ አዉን ደኢ? ግምበ ሻኮታ ሀላቃይ አዉን ደኢ?” ያግድ ህንተ ዎዛናን በን ያሽያ ዎድያ ቆፓና። 19 ዎዛና ምኖ አሳ፥ ህንተዉ ገሎና ዶናን ኦደትያ አሳነ እንፃርሳይ ደዶትያ አሳ ህዛፐ ጉየ ህንተ በኤከታ።

20 ኑኒ ኑ ባኣለ ቦንችያ ፅዮነ ካታማ በእተ! ዎፑ ግድ ደእያ፥ እያ ꬍሸይ ሾደቶና፥ እያ ዎዶሮይ ዱፆናነ እያ ꬍሸይ ቃፆና ዱንካነ መላ ሀንዳ የሩሳላመ ካታማ ህንተ፥ ህንተ አይፈን በአና። 21 ሄ በሳን ጎዳይ ኑስ ዎልቃ ግዳና። ሄ በሳይ ዳልጋ ሳፋነ ጎግያ ሃꬃ መላ ግዳና። ዎጎሎይ እያ ቦላራ ባናዉ ዳንዳኤና፤ ግታ ማርካበት ያራ ካንꬃናዉ ዳንዳኦኮና። 22 ጎዳይ ኑስ ፕርደይሳ፤ ጎዳይ ኑስ ህገ እመይሳ፤ ጎዳይ ኑ ካዋ፤ እ ኑና አሻና።

23 ነ ቃሾ ዎዶሮይ ዶልአና፤ ማርካብያ ቱሳይ ሹጋና፤ እያ ሻራይካ ቶለትቤና። ሄ ዎደ ዳሮ ድኦ ሻከታና፤ ሀር አቶሽን ዎበትካ ድኦ ኤካና። 24 ፅዮነን ደእያ ኦንካ “ታና ሳኬስ” ያገና፤ ያን ደእያ አሳ ናጋራይ አቶ ጌተታና።