1 ሄኮ፥ ካዎይ ፅሎተꬃን ካዎታና፤ ሃረይሳት ሱረተꬃን ሃራና። 2 እስ እስ አስ ባ ሁጰን ጫርኮፈ ጌምያ በሲ፥ ጎተፐ ቆሰትድ አትያ በሲ ግዳና። መላ ቢታን ጎግያ ሃꬃ መላነ ሳሞ ቢታን ግታ ዛላ ኩያ መላ ግዳና። 3 ፄልያ አሳታ አይፈይ ቅልምኤና፤ ስእያ አሳታ ሀይꬃይ ሀይዝድ ስአና። 4 ኤሶትያ አሳ ዎዛናይ ኤራናነ አኬካና። ደዶትያ አሳ እንፃርሳይ ብለታና፤ ጌሽድ ኦደታና። 5 ህዛፐ ጉየ ኤይ አስ ኤራንቾ ጌተተና፤ ኢታ አስ ቦንቸተና። 6 ኤያይ ኤያተꬅ ኦደቴስ፤ እያ ዎዛናይ ናጋራ ቆፔስ። ጎዳ ቦላ ምኖባ ኦደቴስ፤ እያ ቦላ ኢታባ ማቀቴስ፦ ኮሻትዳይሳስ ካꬅ እመና፤ ሳሞትዳይሳ ሃ ድጌስ። 7 ገነ አሳ ቆፋይ ኢታ፤ ማንቆት ሱረባ ኦደትኮካ ኤንታ ꬋይሳናዉ ዎርዶን ኢታ ቆፋ ቆፔስ። 8 ሎኦ አስ ሎኦባ ሀልቼስ፤ ሄ ሎኦ ሀልቹዋን ምንድ ደኤስ።

9 ህንተኖ ቆፍ ባይና ደእያ ማጫሳዉ፥ ደንድተ፤ ታ ኦደይሳ ስእተ፤ ህንተኖ አማነትድ ደእያ ማጫ ናይቶ፥ ታ ህንተዉ ኦደይሳ ስእተ። 10 ላይꬅ ኩሞና ህንተ አማነትድ ደኤይሳት ኮኮራና፤ ዎይነ እያ ዎድያን ማፀከታ፤ ቶክዳባፐ አይፈ ሺሸከታ። 11 ህንተኖ እንጀትን ደእያ ማጫሳዉ ኮኮርተ። ህንተኖ አማነትድ ደእያ ማጫ ናይቶ ያይተ። ህንተ ማኡዋ ቃርድ ካዮ ማኦ ህንተ ፄሳን ዳንጭተ። 12 ሎኦ ጋደን አይፍያ ዎይነይ ꬋይዳ ግሾ፥ አዛንድ ህንተ ትራ ቆፅተ። 13 አጉንꬅነ ክንቾተይ ታ አሳ ጋድያን ዶልስ። አሳይ ኡፋይትድ ደእዳ ኬꬃታስነ ካታማስ ዬክተ። 14 ካዎ ኬꬃይነ ዳሮ አሳይ ደእያ ካታማይ ባይሳታና፤ ሚፃትነ ግምበ ሻኮት መርናዉ ላለታና፤ ዎራ ሀረት ኡፋይትያ በስነ ዶርሳ ዉደይ ሄመትያ በሲ ግዳና።

15 ሄስ ሀናናይ፥ አያናይ ኑ ቦላ ጉካና ጋካናዉ፥ መላ ቢታይ አራዳና ጋካናዉነ አራዳ ቢታይ ዎራ ግዳና ጋካናሳ። 16 ሄሳፈ ጉየ፥ መላ ቢታን ሱረ ፕርድ፥ አራዳ ቢታን ፅሎተꬅ ዳና። 17 ፅሎተꬅ ሳሮተꬅ ኤሀና፥ ዎፓተꬅነ አማነተꬅ መርናዉ ቢታ ኩማና። 18 ታ አሳይ ሳሮይ ኩምዳ ኬꬃን፥ አማንꬅያ በሳንነ ዎፑ ግዳ ሶን ሸምፕድ ዳና። 19 ሻች ቡክድ ዎራ ꬋይስያኮካ፥ ቃስ ካታማይ ኩምꬅ ላለትያኮካ፥ 20 ሻፋታ ጋፃን ህንተ ካꬃ ዘርድ፥ ህንተ መህያስነ ህንተ ሀረታስ ሄንꬃ በሲ ደመይሳት ህንተ አንጀታና።