1 ማዶ ደማናዉ ግብፀ ዎይሳታነ ፓራን አማነተይሳታ አየ! ፓራ ጋረታ ዳሮተꬃንነ ፓራ አሳታ ምኖተꬃን አማነተይሳታ አየ! ኤንቲ እስራኤለ ጌሻ ፄሎኮና ዎይኮ ጎዳፐ ማዶ ኮዮኮና። 2 ሽን ጎዳይ ጭንጫ ግድያ ግሾ ጋዶ የዳና፤ እ ኦድዳይሳ አገና። ኢታ አሳ ቦላነ ኢታባ ኦꬅያ አሳ ማደይሳታ ቦላ ደንዳና። 3 ግብፀት አሰፐ አትሽን፥ ፆሰ ግዶኮና፤ ኤንታ ፓራትካ አሾፐ አትሽን፥ አያና ግዶኮና። ጎዳይ ሀንቆን ባ ቀስያ ደንꬅያ ዎደ ማደይስ ꬉበታና፤ ማደተይስ ኩንዳና፤ ኤንቲ ኡባይ እስፈ ꬋያና።

4 ጎዳይ ታኮ ሀይሳዳ ያግስ፦ “ጋሞይ ዎይኮ ዎዳላ ጋሞይ መሄ ኦይክድ ዳርያ ዎደ ሄንꬃንቾት ፄገትድ ሺቅኮካ፥ እ ኤንታ ዋሱዋስ ዳጋመና፤ ኤንታ ቃላስ ያየና። ሄሳዳካ፥ ኡባፈ ዎልቃማ ጎዳይ ፅዮነ ዙማነ እያ ዙማታ ኦላናዉ ዎꬋና። 5 ካፎይ አለይሳዳ ኡባፈ ዎልቃማ ጎዳይ የሩሳላመ ገቻና፥ አሻና፥ ናጋና፤ እያ ቦላራ አልድ ሄማና።

6 “ህንተኖ እስራኤለ አሳዉ፥ ህንተ ማካልድ እፅዳ፥ እያኮ ስምተ። 7 ሄ ጋላስ ናጋር ኩምዳ ህንተ ኩሽያን ብራፐነ ዎርቃፈ ኦꬅዳ ኤቃታ ዎራ ሆላና። 8 አሶረይ አሳባ ግዶና ማሻን ኩንዳና፤ አሳባ ግዶና ማሽ ኤንታ ማና። ኤንቲ ማሻ ስንꬃፈ ባቃታና፤ ኤንታ ናአተꬃት ዎልቃን አሳስ ኦꬃና። 9 ዳጋማ ጋሶን ኤንታ ምኖ ሚፃይ ላለታና፤ ኤንታ ቶራ ሞጮናት ዳጋምድ የግ ꬋያና” ያጌስ፥ እያ ታማይ ፅዮነን፥ እያ ጮጨይ የሩሳላመን ደእያ ጎዳይ።