1 ጎዳይ፥ “ጌላ ናይታ አየ! ታኒ ሀልቻቦና ኦꬆሶና፤ ታ አያናን ግዶናሽን ባንታ ሸነን ጫቅድ ናጋራ ቦላ ናጋራ ጉጀይሳታ አየ! 2 ታና ዞረ ኦይቾና ግብፀ ዎꬎኦሶና። ፓሮና ሚፃ ባንታዉ ተቀ፥ ግብፀ ባንታዉ ሸምፕያ ኩያ ኦꬆሶና። 3 ሽን ፓሮና ሚፃይ ህንተዉ ዬላ፥ ግብፀ ኩያይ ህንተዉ ካዉሻተꬅ ግዳና። 4 ኤንታ ሀላቃት ፃነሳን ደእኮካ፥ ኤንቲ ኪትዳይሳት ሀኔሳ ካታማ ጋክኮካ፥ 5 ዬላፈ አትሽን፥ ሀራ ማደይነ ጎእ ባይና ግሾ እያን አማነትያ ኡባይ ካዉያናነ ዬላታን” ያጌስ።

6 ነገባን ደእያ ዶአታባ ጎዳይ ኦድዳይ ሀይሳ፦ ኪተትዳይሳት መቶይነ ኡንእ ደእያ ቢታራ፥ አደ ጋሞይነ ማጫ ጋሞይ ዎራራ፥ ኢታነ ፆንገትያ ሾሻት ደእያ ባዙዋራ ካንꬅድ ባና። ሀረታነ ግማለታ ዞኮን ባንታ ዱረተꬃ ጫንድ ኤንታ አይኮካ ማዶና ቢታ ባና። 7 ግብፀይ አይኮካ ማደና፤ ሄሳ ግሾ፥ ታኒ እያ፥ “ፓꬆና ራኣባ” ያጋዳ ፄጋና።

8 ሀእ ባዳ ስንꬃራ ያና ዎድያስ መርና ማላ ግዳና መላ ኤንታ ስንꬃን ሹቻ ዎጫዳ ፃፋ፤ ማዝጋበንካ ፃፋ። 9 ኤንቲ ጌላነ ዎርዳንቾ ናይታ፤ ኤንቲ ጎዳይ ኦድያባ ስአናዉ ኮዮና ናይታ። 10 ኤንቲ ቆንጨꬅ በኤይሳታ፥ “ቆንጨꬅ በኦፕተ” ያጎሶና። ናበታ፥ “ኡፋይስያባነ ጭምያባ ኦድተፐ አትሽን፥ ሱረባ ኦዶፕተ። 11 ኦግያፐ ክችተ፤ ሆሮጋፐ ሃክተ፤ እስራኤለ ጌሻራ ኑና ሶምኦን ጋꬆፍተ” ያጎሶና።

12 ሄሳ ግሾ፥ እስራኤለ ጌሻይ ሀይሳዳ ያጌስ፦ “ህንተ ሀ ቃላ እፅድ፥ ገነንነ ጭሞን አማነትዳ ግሾ፥ 13 ሀ ናጋራይ ህንተዉ ዛእድ ዎድያ፥ አኬኮና ኤለስድ ኩንድያ አዱሳ ግምበ መላ ግዳና። 14 እያ መቆይ ኡርቃፈ መꬍዳ ኦቶ መላ ድፕ ግድ መቃና። ሄ መቁዋ ግዶፈ ታማ ካሽያ ዎይኮ ሃ ዱቅያ ኩንእ በንተና” ያጌስ።

15 እስራኤለ ጌሻይ፥ ኡባ ሃርያ ጎዳይ፥ ሀይሳዳ ያጌስ። “ስሞንነ ሸምፖን ህንተ አታና፤ ስእ ጉሳንነ አማነተꬃን ህንተዉ ዎልቃ ግዳና፤ ሽን ህንተ እፅደታ። 16 ህንተ፥ ‘አካይ፥ ኑኒ ፓራ ቦላ ኡትድ ባቃታና’ ያግደታ፤ ሄሳ ግሾ፥ ህንተ ባቃታና። ቃስ ህንተ፥ ‘ኤሶትያ ፓራ ቶግድ ባና’ ” ያግደታ፤ ሽን ህንተና የደይሳት ህንተፈ አꬎ ኤሶታና። 17 እስ ቶራንቹዋ በእድ ህንተፈ ሙኩሉ አሳይ ባቃታና፤ እቻሹ ቶራንቾት ህንተና ኡባ የደꬃና። ዙማ ሁጰን ኤቅዳ ባንድራ ምꬃዳ ዎይኮ ዙማ ቦላ ደእያ ማላዳ ህንተ ሀናና ጋካናዉ ህንተና የደና።

18 ሽን ጎዳይ ህንተዉ ኬሀናዉ ናጌስ፤ ጎዳይ ፅሎ ፕርድያ ፆሲ ግድያ ግሾ ህንተዉ ቃታናዉ ደንዳና። እያ አማነትድ ናግያ ኡባይ አንጀትዳይሳታ።

19 ህንተኖ፥ የሩሳላመን ደእያ ፅዮነ አሳዉ፥ ህዛፐ ጉየ ዬከከታ። ፆሳይ ቃን ኩምዳ ፆሲ ግድያ ግሾ፥ ህንተ ማደ ኮይድ እያኮ ዋስያ ዎደ ህንተዉ ዛሮ እማና። 20 ጎዳይ ህንተዉ መቶ ካꬅነ ኡንአ ሃꬅ እምኮካ፥ ህንተ አስታማረይ ህዛፐ ባና ቆሰና። ሽን ህንተ አይፈይ ህንተ አስታማርያ በአና። 21 ህንተ ኡሻች ዎይኮ ሀድርስ ስምያ ዎደ፥ ጉየራ ህንተና፥ “ኦገይ ሀይሳ፤ እያራ ቢተ” ግያ ቃላ ህንተ ስአና። 22 ብራንነ ዎርቃን አሌቀትዳ ኤቃ ምስለታ ህንተ ቱንሳና። ቱና ጩርቃዳ ህንተ ኤንታ፥ “ኑፐ ሃክተ” ያግድ ዎራ ሆላና።

23 ሄ ዎደ እ፥ ህንተ ቢታን ዘርዳ ካꬃስ እራ ቡክሳና፤ ቢታፈ ዶልያ ካꬃይ ዳሮነ ሙሩታ ግዳና። ሄ ጋላስ ህንተ መሄይ ዳልጋ ደንባን ሄመታና። 24 ጎሻ ቦራትነ ሀረት ግላን ፑነትዳ ጌሻ ሀርቁዋ ማና። 25 አስ ዉርያ ዎደ ሚፃት ላለትያ ጋላስ ደረታነ ዙማታ ቦላፈ ፑልቶ ሃꬅ ጎጋና። 26 ሄ ጋላስ አጌና ፖኦይ አዋ ፖኦዳ ሀናና፤ አዋ ፖኦይ ካሰይሳፈ ላፑን ኩሸ ዳራና፤ ላፑን ጋላስ ፖኡዋ መላ ግዳና። ሄ ኡባይ ሀናናይ ጎዳይ መቅዳ ባ አሳ ኮልያ ዎደነ እ ደችን ማዱንፅዳ አሳ ፓꬅያ ዎደ።

27 ሄኮ፥ ጎዳ ሱንꬃይ ሱልያ ሀንቁዋራ፥ ꬉምዳ ጩያ ሻራራ ሃሆ በሳፈ ያና። እያ ዶናን ሀንቆይ ኩምስ፤ እያ እንፃርሳን ምያ ታም ደኤስ። 28 እያ ፔኖይ፥ ቆ ጋካናዉ ክፅድ፥ ኡባባ ፕትድ ኤፍያ ሃꬃ ክፃ መላ። እ፥ ካዎተꬃታ ꬋዮ ዛርዛረን ሀርቃና፤ አሳ ጋፓታ ብፃልድ ኦገ ባለꬃና። 29 ጌሻ ባለይ ቦንቸትያ ጋላስ የፀይሳዳ፥ ህንተ የፃና። ጎዳ ዙማኮ፥ እስራኤለ ዛላኮ ብያ ዎደ ሱሱልኤ ፑንሸ የፅያ አሳይ ኡፋይተይሳዳ ህንተ ኡፋይታና።

30 ጎዳይ ባ ያሽያ ቃላ ስሳና፤ ባ ሱልያ ሀንቁዋን፥ ታማ ላጩዋን፥ ጎትያን፥ ኡሹዋንነ ሻቻን ባ ቀስያ ቆንጭሳና። 31 ጎዳይ ባ ግርሳን አሶረ ዳጋንꬃና፤ እያ ፃምአይ ኤንታ ሾጫና። 32 ጎዳይ ኤንታ ባ ሴርያ ፃምአን ኤንታ ሾጭያ ዎደ እያ አሳይ ካራቦራነ ዲꬃራ የፃና። ባ ቀስያ ደንꬅድ ኤንታ ሾጫና። 33 በንፐ ዶምድ አሶረ ካዎይ ፁሳ ቶፈታ ጌተትያ በሲ ጊግስ። ሄ በሳይ ኦላነ ዳልጋ፤ ቃስ ዳሮ ምꬅ ዶረትድ ደእያ በሲ። ጎዳ ፔኖይ ዲነ ሻፋዳ ጎግድ፥ ሄ ታማ ኤꬃና።