1 ዳዊቲ ደእዳ አርኤላ ካታማዉ ነና አየ! ላይꬃ ቦላ ላይꬅ ጉጃ፤ ነ ባለታ ዛራ ዛራ ቦንቻ። 2 ታኒ አርኤላ ካታማ ቡሮ ኡንኤꬃና፤ እ ዘሌልድ ዬካና። ሄ ካታማይ ሱꬅ ካምዳ ያርሾ በሳ መላ ግዳና። 3 ታኒ ነ ዩሹዋ ተቃና፤ አዱሳ ግምብያን ነና ድራና፤ ነ ቦላ ኦላ ሻኮ ኤሳና። 4 ኔኒ ገልዳ ኦላን ግዳዳ ኦደታና፤ ጋርሳ ባናፐ ነ ግርሳይ ያና። ነ ግርሳይ ሞይትለ ግርሳዳ ቢታ ግዶፈ ከያና፤ ባና ግዶፈ ነ ካልካሻና።

5 ሽን ነ ሞርከት ባና መላ ዳሮ፤ ዎዛና ምኖ አሳታ ታይቦይ ጫርኮይ ኤፍያ ፑኖ መላ። 6 ቆፖና ደእሽን፥ ኡባፈ ዎልቃማ ጎዳይ ዳዳን፥ ቢታ ቃፆን፥ ግታ ግርሳን፥ ጎተን፥ ጫርኮንነ ታማ ላጮን ህንተና ዎቻና። 1 ካዎ 19:11-12. 7 አርኤላ ካታማ ኦልያ ዳሮ ካዎተꬃ ኡባይ፥ ሄ ካታማነ እያ ሚፃ ኦልያ ኡባይ፥ እያ ኡንኤꬅያ ኡባይ ꬍስኮ አሙሆዳነ ኤልሞዳ ሀናና። 8 ኮሻትዳ አስ አሙሆን ካꬅ ምድ፥ ባርክያ ዎደ እያ ኮሻይ አጎናይሳዳ ዎይኮ ሳሞትዳ አስ አሙሆን ኡይድ፥ ባርክያ ዎደ ሳሙዋ አሎናይሳዳ፥ ፅዮነ ደርያ ኦልያ ካዎተꬃት ኡባይ ሄሳዳ ሀናና።

9 ማላለትተ፤ ዳጋምተ፤ ቅልምእተ፤ ቆቅተ። ማꬆትተ፥ ሽን ዎይነ ኡሻን ግዶፖ። ጋንድጋርተ፥ ሽን ማꬆይያ ኡሻን ግዶፖ። 10 ጎዳይ ꬍስኮ አያና ህንተ ቦላ ጉስስ። ናበቶ፥ ህንተ አይፈይ ጎዘትስ፤ ቆንጨꬅ በኤይሳቶ፥ ህንተ ሁጰይ ካመትስ። ሮመ 11:8.

11 ሀ ኡባ ቆንጨꬃይ ነዉ አታመትዳ ማፃፋ መላ ግድስ። እስ አስ፥ “ሄኤ፥ ሀይሳ ናባባ” ያግድ፥ እስ ናባቦ ኤርያ አሳስ እምያ ዎደ፥ እ፥ “ማፃፋይ አታመትዳ ግሾ፥ ታ ናባባናዉ ዳንዳእከ” ያጋና። 12 ማፃፋ ናባብ ኤሮና አሳኮ፥ “ሄኤ፥ ሀይሳ ናባባ” ያግድ እምያ ዎደ፥ እ፥ “ታኒ ናባባ ኤርከ” ያጋና።

13 ጎዳይ ያጌስ፦ “ሀ አሳይ ታና ባንታ ዶናን ቦንቼስ፤ ሽን ኤንታ ዎዛናይ ታፐ ሃሆን ደኤስ። ኤንቲ አስ መꬍዳ ዎጋ ታማርስሸ ታና ጮ ጎይኖሶና። ማቶ 15:8-9፤ ማር 7:6-7. 14 ሄሳ ግሾ፥ ታኒ ሀ አሳ ቦላ ዛራ ዛራ ማላልስያባ ኦꬃና። ጭንጫታ ጭንጫተꬃ ኤያ ከሳና፤ ኤራንቾታ ኤራ ዶግሳና”2 ቆሮ 1:19. ያግስ።

15 ባንታ ሀልቹዋ ጎዳፐ ቆሳናዉ ጪሞየይሳታ፥ ባንታ ኦሱዋ ꬉማን ኦꬅሸ፥ “ኑና ኦን በኢ? ኑና ኦን ኤሪ?” ያገይሳታ አየ! 16 ህንተ ኡባባ ሽር የጌታ። ኦቶ መይስ ኡርቃ መላ ግድ ቆፔታ! መትዳይስ መꬍዳይሳ፥ “እ ታና መꬍቤና” ግዬ? ኦቶይ ባና መꬍዳይሳ፥ “እ አይኮካ ኤረና” ጋናዉ ዳንዳኢ?እሳ 45:9.

17 ልባኖሰ ዎራይ አራዳ ጋደ ግዳናዉ፤ ቃስ አራዳ ጋደይ ዎራ ግዳናዉ ጉꬃ ዎደይ አትስ ግደኔ?

18 ሄ ጋላስ ቱለት ማፃፋ ቃላ ስአና፤ ꬉማን ደእያ ቆቀታ አይፈይ ፄላና። 19 አሽከት ጎዳን ኡፋይታና፤ ማንቆት እስራኤለ ጌሻን ሀሹ ጋና። 20 ኡሎ ኢታት ዉራና፤ ቀልቅሰይሳት ትምእ ጋና፤ ኢታባ ኦꬃናዉ ዎችያ ኡባይ ꬋያና። 21 አሰ ኦዳን ባላ ኦይሳት፥ ሞተትዳይሳ ፕርዳ ኬꬃን ፅሄን የገይሳትነ ዎርዶ ማርካተꬃን ፅሎ አሳ ፕርዳ ጌላየይሳት ꬋያና።

22 ሄሳ ግሾ፥ አብራሃመ ዎዝዳ ጎዳይ ያይቆባ ኮቻኮ ሀይሳዳ ያጌስ፦ “ያይቆባ ኮቻይ ህዛፐ ጉየ ዬላተና፤ እያ ሶምኦይ ዬላትድ ሳአ ፄለና። 23 ሽን ኤንቲ ታ ኩሸ ኦሶ ግድዳ ባንታ ናይታ ባንታ ግዶን በእያ ዎደ ታ ሱንꬃ ጌሻና፤ ኤንቲ ያይቆባ ጌሻ፥ ጌሻተꬃ ናጋና፤ እስራኤለ ፆሳ ያሻተꬃን ቦንቻና። 24 አያናን ባለይሳት አኬካ ደማና፤ ዙዙመይሳት ትምርተ ኤካና” ያጌስ።