1 ኤፍሬማን ማꬆተይሳታስ ቆፍሶ ካላቻ ግድዳይሳ፥ አራዳ ዛንጋራ ሁጵያን ኡትዳይሳ፥ እያ ቦንቹዋስ አሌቆ ግድዳ ሹልዳ ጪሻነ ማꬆይያ ኡሻይ ኤንታዉ ናሸተꬃስ ግድዳ ካታማ አየ! 2 ሄኮ፥ ጎዳስ ዎልቃማነ ምኖ ግድዳ እሶይ ደኤስ። ጎዳይ እያ ሻቻ ኡሾዳ፥ ꬋይስያ ጎተዳነ ክፅዳ ዎልቃማ ሃꬃዳ ምኖ ኩሽያን ዱገ ሳአን ሆላና። 3 ሄ ማꬆትያ ኤፍሬማ አሳ ኦቶሩዋ ካላቻይ ቶሆን የꬃና። 4 አራዳ ዛንጋራ ሁጰን ደእያ ሹልዳ ጪሻይ፥ እያ ቦንቾ አሌቆይ ዎደይ ጋካናፐ ስን ቴርዳ ባላሰ አይፈ መላ ግዳና። እስ አስ ሄ ባላስያ በእያ ዎደ ባ ኩሸን ኦይክዳ መላ ም አጌስ።

5 ሄ ጋላስ ኡባፈ ዎልቃማ ጎዳይ አትዳ ባ አሳስ ቦንቾ ካላቻነ አሌቆ ግዳና። 6 እ ዳይናታስ ሱረ ፕርድያ አያና፥ ካታማ ፐንግያፈ ኦላ ዛረይሳታስ ዎልቃ ግዳና።

7 ኤንቲ ዎይነ ኡሻን ቢጮቶሶና፤ ማꬆይያ ኡሻን ጋንድጋሮሶና። ካህነይነ ናበይ ማꬆይያ ኡሻን ቢጮቴስ፤ ኤንቲ ዎይነ ኡሻን ያርኮሶና፤ ማꬆይያ ኡሻን ጋንድጋሮሶና። ቆንጨꬅ በእሸ ባለቶሶና፤ ፕርድሸ ꬉበቶሶና። 8 ኤንቲ ምያ ጋይታ ኡባይ ጮሻ ፃላላ ግድያ ግሾ፥ ኢትቦና በሲ ባዋ።

9 ኤንቲ ሀይሳዳ ጋና፦ “እ ኤራተꬃ ኦና ታማርሳኔ? ኪታ ኦደስ ቆንጭሳኔ? ቡሮ ማꬅ ፓሄቲያ ዎይኮ ꬋንꬅ ዱፅዳ ናይታሰዬ? 10 እ፥ ኪታ ቦላ ኪታ፥ ኪታ ቦላ ኪታ፤ ዎጋ ቦላ ዎጋ፥ ዎጋ ቦላ ዎጋ፤ ያን ጉꬃ ሀን ጉꬃ” ያጋና።

11 ሽን ጎዳይ አላጋ ቃላንነ እማꬃ ዶናን ሀ አሳስ ኦዳና። 1 ቆሮ 14:21. 12 እ ኤንታኮ፥ “ሀይስ ሸምፖ በሲ፤ ዳቡርዳይሳ ሸምፕስተ። ሀይስ ሸምፕ ኤክያ በሲ” ያግስ። ሽን ኤንቲ ስኦና እፅዶሶና። 13 ሄሳ ግሾ፥ ኤንቲ ብድ ኩንዳና መላ፥ መአና መላነ ፅሄን ኦይከትድ ባና መላ ጎዳ ቃላይ ኤንታዉ ኪታ ቦላ ኪታ፥ ኪታ ቦላ ኪታ፤ ዎጋ ቦላ ዎጋ፥ ዎጋ ቦላ ዎጋ፤ ያን ጉꬃ ሀን ጉꬃ ግዳና።

14 ህንተኖ፥ የሩሳላመን ደእያ አሳ ሃርያ ቀልቅሰይሳቶ ጎዳ ቃላ ስእተ። 15 ህንተ፥ “ኑኒ ሀይቆራ ጫቅዳ፤ ስኦለራ ጊግዳ፤ ኑኒ ዎርዶ ኑስ ቆታ ኦꬅዳ ግሾነ ማልተ ካተ ኦꬅዳ ግሾ፥ ጋዶይ ኑና ቦቾና አꬋና” ያግድ ጬቀተታ።

16 ሄሳ ግሾ፥ ኡባ ሃርያ ጎዳይ፥ “ሄኮ፥ ታኒ አልኦነ ዶረትዳ ባሶ ሹቻ ፅዮነን ዎꬃስ፤ እያን አማንያ ኦንካ ዬላተና።”ማዝ 118:22-23፤ ሮመ 9:33፤ 10:11፤ 1 ጰፅ 2:6. 17 ታኒ ሱረ ፕርዳ ዋꬋ ዎዶሮ፥ ፅሎተꬃ ቱምበ ኦꬃና። ህንተ፥ “ኑስ ቆታ ግዳ ዎርዶ ሻቻይ ሾጫና፤ ህንተ ኑስ ካተ ግዳ በሳ ድኦይ ꬋይሳና” ያጌስ። 18 ህንተ ሀይቆራ ጫቅዳ ጫቆይ ላለታና፤ ስኦለራ ጊግዳ ጊጎይ ምነና። ጋዶይ ያ ዎደ ህንተ እያን ሾጨታና። 19 ሄ ጋዶይ ያ ዎደ ህንተና ኤክድ ባና፤ ዎንታ ዎንታ፥ ቃምነ ጋላስ ያራ አꬋና፤ ሄ አꬍያ ዎደ ኡባን ህንተና አገና።

ሀ ኪታ አኬኮይ ህንተዉ ዳጋማ ፃላላ እማና። 20 ህንተ ቆሰትያ በሲ ህንተዉ ባዋ፤ ህንተ ዝንእያ አርሳይ ህንተዉ ግደና፤ ህንተ ማእያ አፍላይ ህንተና ጋከና። 21 ፓራዚማ ዙማ ቦላ ጎዳይ ኦꬅዳይሳዳ ባ ኦሱዋ፥ ባ እማꬃ ኦሱዋ፥ ሄስካ ባ ኦራꬃ ኦሱዋ ኦꬃናዉ ደንዳና። ጋባኦና ዛንጋራን ኦꬅዳይሳዳ ሀንቃና። እያ 10:10-12፤ 2 ሳሜ 5:20፤ 1 ታር 14:11. 22 ጎዳይ፥ ኡባፈ ዎልቃማ ፆሳይ፥ ቢታ ኡባ ቦላ ꬋዮ ኤሀናዉ አዋጅዳይሳ ታ ስእዳ ግሾ ህንተ ቃሾይ ምኖና መላ ቀልቅሰይሳ አግተ።

23 ህንተ ሀይꬃ ሃ የግድ፥ ታ ኦደይሳ ስእተ፤ ታ ኦዳ አኬክተ። 24 ካꬅ ዘራናዉ ጎይያ ጎሻንቾይ ኡባ ዎደ ጎይሸ ደእዬ? ቃስ ኡባ ዎደ ጋጋህያ ዎꬍሸነ ሊቅስሸ ደኢ? 25 ጋድያ ሊቅስድ፥ ካሬꬃ ሳዋነ ኦካሸ፥ ባንጋነ ግስተ፥ ባንጋ እያ ዶኡዋን፥ እያ በሳን በሳን ዘሬስ ግደኔ? 26 ሀ ሂላ እያ ፆሳይ እያ ኤርሰስነ ታማርሴስ። 27 ካሬꬃ ሳዎነ ኦካሸ ሾጩ ዎꬋን ቆፀና፤ ሽን ጉꬃ ፃምአን ሾጨቴስ። 28 ካꬃ አይፈይ ቡከቴስፐ አትሽን፥ ሊቀና፤ ቃስ ካꬃ ቡክያ ፓራ ጋረት እያ ቦላራ ላገትኮካ ካꬃይ ጋጨተና። 29 ሀ ጭንጫተꬃ ኡባይ ባ ዞርያንነ ባ ጭንጫተꬃን ማላልስያ ኡባፈ ዎልቃማ ጎዳፐ ዬስ።