1 ህዝቅያስ ካዎትዳ ታማነ ኦይዳንꬆ ላይꬃን፥ አሶረ ካዎይ ሳናክሬም ዩሾይ ግምበትዳ ይሁዳ ካታማታ ኦልድ ኦይክስ። 2 ሄሳፈ ጉየ፥ አሶረ ካዎይ ላክሶ ካታማፐ እስ ቶራ ሞጮና ዳሮ ኦላንቾታራ ካዋ ህዝቅያሳኮ የሩሳላመ የድስ። እ፥ ብድ ማኦ ሜጭያ ጋድያኮ ኤፍያ ኦግያፐ ቆሞ ባጋራ ደእያ ኤልዳ ሃꬃይ ጎግያ ꬋዋ ማታን ኤቅስ። 3 ካዎ ጋꬎ አይስያ አልቃ ናአይ ኤልያቄም፥ ፃፈይ ሼብነ፥ ታርከ ፃፈይ፥ አሳፋ ናአይ፥ ዮኣስ እያኮ ካረ ከይዶሶና።

4 አሶረ ቶራ ሞጮናይ ኤንታኮ፥ “ህዝቅያሳስ ሀይሳዳ ያግድ ኦድተ፦ ‘ዎልቃማ አሶረ ካዎይ፥ ኔኮ ሀይሳዳ’ ያጌስ፦ ኔኒ ሀይሳ መላ ምናናዉ አይብን አማነታዲ? 5 ኔኒ ጮ ቃላን፥ ኦላ ኦለታናዉ ታዉ ጭንጫተꬅነ ዎልቅ ደኤስ ያጋሳ። ሽን ኔኒ ኦናን አማነታዳ ታ ቦላ ሀይሳዳ ማካላይ? 6 ኔኒ ‘ግብፀ ካዎይ ታና ማዳና’ ጋዳ ቆፕዳባ ግድኮ መቅዳ ማይረ ፃምአ ጉፈትያ አሳ መላ። ፃምአይ መቅን ፕንጮይ ኩሽያ ጫደስነ ማዱንፅሴስ። ግብፀ ካዎይ ባናን አማነትያ አሳ ኡባስ ሄሳ መላ። ህዝ 29:6-7. 7 ሽን ኔኒ፥ ‘ኑኒ ጎዳን፥ ኑ ፆሳን፥ አማነቶስ’ ያግኮ፥ ህዝቅያስ ይሁዳነ የሩሳላመ አሳ፥ ‘ህንተ የሩሳላመን ደእያ ያርሾ በሳን ጎይናናዉ ኮሼስ’ ግድ፥ ፆሳ ጎይንያ ꬎቃ በሳታነ ያርሾ በሳታ ድግዳይ እያ ግደኔ?

8 “አነ ሀእ ሃያ! ታ ጎዳ አሶረ ካዉዋራ ጌዳረታ። ቶጋናዉ ዳንዳእያ አስ ነ ደምኮ፥ ናምኡ ሙኩሉ ፓራታ ታ ነዉ እማና። 9 ኔኒ፥ ‘ግብፀት ፓራ አሳታነ ፓራ ጋረታ ታዉ የዳና’ ጋዳ አማንኮ፥ ታ ጎዳ ቶራ ሞጮናታፐ እስ ላፋካ ዛራናዉ ዳንዳአካ። 10 ሄሳ ቦላካ፥ ታኒ ሀ ቢታ ꬋይሳናዉ ቱማ ጎዳ ሸነይ ባይና ከያድና? ጎዳይ ባ ሁጰን ታና ‘ባዳ ሀ ቢታ ኦላዳ ꬋይሳ’ ያግድ ኪትስ” ያግስ።

11 ሄሳፈ ጉየ ኤልያቄም፥ ሼብነ ዮኣስ አሶረ ሀላቃኮ፥ “ኑኒ ኤርያ አራምከ ዶናራ ኑስ ነ አይለታስ ኦዳፐ አትሽን፥ ግምበ ድርሳ ቦላ ደእያ አሳይ ስአና መላ እብራወꬆ ዶናን ኦዶፓ” ያግዶሶና።

12 ሽን ሀላቃይ ዛሪድ፥ “ሀ ኪታ ታኒ ህንተዉነ ህንተ ጎዳ ፃላላስ ኦዳና መላ ታና ታ ጎዳይ ኪትቤና። ህንተራ እስፈ ባንታ ሽአ ማናዉነ ባንታ ሼሻ ኡያናዉ ደእያ፥ ሀ ግምበ ድርሳ ቦላ ደእያ አሳ ኡባስ ኦዳና መላ ኪትስ” ያግስ።

13 አሶረ ሀላቃይ ደንድ ኤቅድ፥ ባ ቃላ ꬎቁ ኦꬅድ፥ እብራወꬆ ዶናን ሀይሳዳ ያግስ፦ “ዎልቃማ ግድዳ አሶረ ካዎይ ግያባ ስእተ! 14 ካዎይ ህንተኮ ሀይሳዳ ያጌስ፤ ‘ህዝቅያስ ህንተና ጭሞፎ’ እ ህንተና ታ ኩሸፐ አሻናዉ ዳንዳኤና። 15 ህዝቅያስ ህንተና፥ ‘ቱማ ጎዳይ ኑና አሻና፤ ሀ ካታማይካ አሶረ ካዋ ኩሸን ገለና’ ያግድ፥ ህንተ ጎዳን አማነታና መላ ኦꬆፎ።

16 “ህንተ ህዝቅያስ ኦድያባ ስኦፕተ። አሶረ ካዎይ ህንተና፥ ‘ታራ ስገትተ፤ ሃ ታኮ ዪተ። ሄሳ ህንተ ኦꬅኮ፥ ህንተ ኡባይ ህንተ ዎይነፐነ ህንተ ባላሰፐ ማና፤ ህንተ ቦክዳ ኦላፈካ ሃ ኡያና። 17 ታኒ ያዳ፥ ህንተና ህንተ ቢታ ዳንያ ቢታ ኤካዳ ኤፋና። ሄ ቢታይ ካꬅነ ዎይነይ ኩምዳ ቢታ’ ” ያግስ።

18 “ህዝቅያስ፥ ‘ጎዳይ ህንተና አሻና’ ያግድ ጭሞናዳ ናገትተ። ሀራ ካዎተꬃታ ፆሳታፐ ባ ቢታ አሶረ ካዋ ኩሸፐ አሽዳ ፆሲ ደእዬ? 19 ሀማታ ፆሳትነ አርፋዳ ፆሳት አዉን ደኦና? ሳፋርዋይማ ፆሳት አዉ ብዶና? ኤንቲ ሳማርያ ታ ኩሸፐ ዎꬅ ኤክዶና? 20 ሀ ቢታታ ፆሳታፐ ባ ቢታ ታ ኩሸፐ አሽድ ኤክዳይ ደኢ? ያትን ህንተ፥ ‘ጎዳይ የሩሳላመ ታ ኩሸፐ አሻና’ ያግድ ቆፔቲ?” ያግስ።

21 ሽን ካዎይ ኤንታኮ፥ “እያዉ አይ ዛሮካ እሞፕተ” ያግድ ዞርዳ ግሾ፥ አሳይ እስ ቃላካ እያዉ ዛሮና ስእ ግዶሶና። 22 ሄሳፈ ጉየ ካዎ ጋꬎ አይስያ ካልቀ ናአይ ኤልያቄም፥ ፃፈይ ሼብነ ታርከ ፃፈይ አሳፋ ናአይ ዮኣስ ባንታ ማኡዋ ፔꬍዶሶና። ህዝቅያሳኮ ብድ አሶረ ሀላቃይ ግዳባ ኡባ እያዉ ኦድዶሶና።