37
ህዝቅያስ እሳያሳ ዞረ ኦይችስ
(2 ካዎ 19:1-7)
1 ካዎይ ህዝቅያስ ሄሳ ስእዳ ዎደ ባ ማኡዋ ፔꬍድ፥ ካዮ ማኦ ማእድ፥ ጎዳ ኬꬅ ገልስ። 2 ካዎ ጋꬎ አይስያ ኤልያቄም፥ ፃፈይ ሼብነ ካለꬅያ ካህነት ካዮ ማኦ ማእድ፥ አሞፀ ናኣ ናብያ እሳያሳኮ ባና መላ ኪትስ። 3 ኤንቲ እሳያሳኮ ብድ፥ ህዝቅያስ ሀይሳዳ ያጌስ፦ “ሀ ጋላሳይ መቶ ጋላስ፥ ሴራ ጋላስነ ዬላ ጋላስ። ሄስካ ናእ የለታናዉ ዎደይ ጋክን፥ ባናካዳ የላናዉ ዎልቅ ꬋይዳ ማጫሳ መላ ግድዳ። 4 ደኦ ፆሳ ጫያናዳ እያ ጎዳይ፥ አሶረ ካዎይ፥ ኪትዳ ሀላቃ ቃላ ጎዳይ ነ ፆሳይ ስኦና አገና። ቃስ ጎዳይ ነ ፆሳይ ሄ ቃላ ጋሶን እያ ሴሮና አገና። ሄሳ ግሾ፥ አሳ ግዶፈ አታናይሳታስ ዎሳ” ያግዶሶና።
5 ካዎይ ህዝቅያስ ኪትዳይሳ እሳያስ ስእዳ ዎደ፥ 6 ኤንታኮ፥ “ህንተ ጎዳስ ሀይሳዳ ያግድ ኦድተ፦ ጎዳይ፥ ‘አሶረ ካዋ አይለት ታና ጫይሽን፥ ኔኒ ስእዳ ጫሻ ቃላስ ያዮፋ። 7 ሄኮ፥ እ ኦዳ ስእድ፥ ባ ቢታ ስማና መላ፥ ታኒ እያ ግዶን እስ አያና የዳና። ያታዳ እ ባ ቢታ ብድ ያን ማሻን ሀይቃናዳ ኦꬃና’ ያጌስ” ያግድ ኪትስ።
8 አሶረ ካዎይ ላክሶ ካታማፐ ደንድድ ብዳይሳ አሶረ ሀላቃይ ስእድ፥ ጉየ ስሚድ ካዎይ ልብና ካታማን ኦለተይሳ ደምስ።
9 ካዎይ ሳናክሬም፥ “ቶጰ ካዎይ ትርሃቅ ነና ኦላናዉ ይስ” ግያ ኦዳ ስእድ፥ ህዝቅያሳስ ሀይሳዳ ያግድ ኪትስ። 10 “ይሁዳ ካዋ ህዝቅያሳ፥ ኔኒ አማነትያ ፆሳይ፥ ‘የሩሳላመ አሶረ ካዋ ኩሸን የገና’ ያግድ ጭሞፎ። 11 አሶረ ካዎት ቢታታ ኡባ ዋት ꬋይስዳኮ ኔኒ ስአዳሳ። ያትን፥ ኔኒ አታኔ? 12 በን ታ ማይዛት ꬋይስዳ ጎዛና፥ ካራነነ ራፌሳ ቢታ ፆሳትነ ታላሳራን ደእያ ኤደነ ቢታ ፆሳት ሄ ቢታታ ꬋዮፐ አሽዶና? 13 ሀማታ ካዎይ፥ አርፋዳ ካዎይ፥ ሳፋርዋይማ ካዎይ፥ ሄና ካዎይነ እዋ ካዎይ አዉን ደኦና?” ያግድ ኪትስ።
ህዝቅያሳ ዎሳ
14 ህዝቅያስ ዳብዳብያ ኪተትዳ አሳፐ ኤክድ ናባብስ። ዳብዳብያ ጎዳ ኬꬅ ኤፍድ ጎዳ ስንꬃን ምጭስ። 15 ጎዳ ሀይሳዳ ያግድ ዎስስ፦ 16 “አቤት ኡባፈ ዎልቃማ ጎዳዉ፥ ክሩበታፐ ግዱዋን ኡትዳ እስራኤለ ፆሳዉ፥ ሳአ ካዎተꬃታ ኡባ ቦላ ነ ፃላል ፆሰ። ሳሉዋነ ሳኣ ኔኒ መꬋዳሳ።ከሳ 25:22. 17 አቤት ጎዳዉ፥ ነ ሀይꬃ የጋዳ ሃ ስአ። አቤት ጎዳዉ፥ ነ አይፍያ ዶያዳ ሃ ፄላ። ነና፥ ደኦ ፆሳ፥ ሳናክሬም ጫይዳ ጫሻ ስአ።
18 “አቤት ጎዳዉ፥ አሶረ ካዎት ካዎተꬃታነ ኤንታ ቢታ ꬋይስዳይስ ኤ ቱማ። 19 ኤንታ ፆሳታ ታማን ፁግድ ꬋይስዶሶና፤ ኤንታ ፆሳት ካሰካ አሳ ኩሸይ ማስድ ከስዳ ምꬅነ ሹች ግድያ ግሾ፥ ፆሳታ ግዶኮና። 20 ህዛ አቤት ጎዳዉ፥ ኑ ፆሳዉ፥ ነ ፃላል ጎዳ ግደይሳ ሳኣ ካዎተꬃት ኡባይ ኤራና መላ ኔኒ ኑና እያ ኩሸፐ አሻ” ያግድ ዎስስ።
ሳናክሬማ ኩንደꬃ
(2 ካዎ 19:2-37)
21 ሄሳፈ ጉየ፥ አሞፀ ናአይ እሳያስ ህዝቅያሳስ ሀይሳዳ ያግድ ኪትስ፦ ጎዳይ፥ እስራኤለ ፆሳይ ሀይሳዳ ያጌስ፦ “ኔኒ አሶረ ካዋ ሳናክሬማ ጋሶን ታና ዎስዳ ዎሳ ታኒ ስአስ” ያጌስ።
22 “ጎዳይ ሳናክሬማ ሀይሳዳ ያግስ።
ፅዮነ ጌላእያ ነና ካꬋሱ፤ ለቃሱ፤
የሩሳላመ ናእያ ባ ሁጵያ ቃꬃዳ ነና ቦራሱ።
23 ኔኒ ጫይዳይነ ቶችዳይ ኦኔ?
ነ ኦደ ቦላ ነ ቃላ ꬎቁ ኦꬃዳ ኦደታዲ?
ነ ኦቶሮን ኦና ꬎቁ ጋዳ ፄላዲ?
ሄሳ ነ ኦꬅዳይ እስራኤለ ጌሻ ቦላና ግደኔ?
24 ኔኒ ኪትዳ አሳ ባጋራ ጎዳ ጫያዳሳ።
ሀይሳዳ ያጋዳሳ፦
‘ታ ዳሮ ፓራ ጋረታራ
ꬎቃ ዙማ ሁጵያ፥
ልባኖሰ ዙማ ፄራ ከያስ።
ኡባፈ አዱሳ ዝጋታነ
ኡባፈ ሎኦ ፂዳታ ቃንፃስ።
ꬎቃ በሳን ደእያ
ፅትዳ ዎራ ጋካስ።
25 ታኒ አላጋ ቢታታን
ሃꬃ ኦላ ቦካዳ ሃ እያፐ ኡያስ።
ግብፀ ቢታን ጎግያ ሃꬃ ኡባ
ታኒ ታ ቶሁዋን የꬋዳ መልሳስ’ ”
ያጋዳሳ።
26 “ዳሮ ዎደፐ ስን
ኔኒ ግምበትዳ ካታማታ ላላዳ፥
ሹቻ ኬላ ከሳና መላ፥
ታ ቆፋ ቃቻ ዎꬅዳይሳ ነ ኤራብኪ?
ታኒ ሀእ ኦꬅያ ኦሶታ
በን ሀልቻ ዎꬃስ።
27 ሄሳ ግሾ፥ ኤንታ አሳስ ዎልቃይ እፅን፥
ኤንቲ ካዉይዶሶናነ ዬላትዶሶና።
ኤንቲ ማታ መላነ
ዮጋ ጪሻ መላ።
ኤንቲ ኬꬃ ሁጰን ዶልያ ማታ መላነ
ሌገይ ኩንድስያ ካꬃ መላ ሀንዶሶና።
28 “ሽን ኔኒ ኡትያ፥ ከይያ፥ ገልያ በሳነ
ታ ቦላ ነ ሀንቀትዳ ሀንቁዋ ኤራይስ።
29 ነ ታ ቦላ ሀንቀትዳ ግሾነ፥
ነ ኦቶሩዋ ታኒ ስእዳ ግሾ፥
ታኒ ነ ሲꬍያን ዳፎ አꬃና፤
ነ ዶናን ብፃላ ባርሳና።
ያታዳ ኔኒ ይዳ ኦግያራ
ነና ጉየ ዛራና።”
30 እሳያስ ካዋ ህዝቅያሳኮ ሀይሳዳ ያግስ። “ሄስ ፖለታናይሳስ ማላይ ሀይሳ፤ ሀ ላይꬅነ ዎንቶ ላይꬅ ህንተ አሰቦ ካፅዳ ካꬅ ማና። ሽን ሄꬓንꬆ ላይꬃን ህንተ፥ ህንተ ሁጰን ዘርተነ ጫክተ፤ ዎይነ ቶክተነ እያ አይፍያ ሚተ። 31 ይሁዳ አሳፐ አትዳይሳት ፃጶ የዳና፤ አይፈ አይፋና። 32 አትዳ ጉꬃት የሩሳላመፐነ ፅዮነ ደርያፐ ያና። ኡባፈ ዎልቃማ ጎዳ ቃናተይ ሄሳ ኦꬃና።
33 “ሄሳ ግሾ፥ አሶረ ካዉዋባ ጎዳይ ሀይሳዳ ያጌስ። አሶረ ካዎይ ሀ ካታማ ገለና፤ ዎይኮ ሀይሳን ባ ዶንግያ ዱከና፤ ዎይኮ ባ ጎንዳልያ ኦይክድ፥ ሀ ካታማ ስን አና፤ ዎይኮ ካታማ ዩሹዋ ተቀና። 34 አሶረ ካዎይ ባ ይዳ ኦግያራ ጉየ ስማና፤ ሀ ካታማ ገለና።” ታኒ ጎዳይ ሀይሳ ኦዳይስ።
35 “ታኒ ታ ቦንቹዋ ግሾነ ታ አይልያ ዳዊታ ግሾ፥ ሀ ካታማ አሻና” ያግስ።
36 ሄ ቃማ ጎዳ ኪታንቾይ ከይድ፥ አሶረ አሳይ ዱንካንዳ ጉታ ብድ፥ 185,000 አደታ ዎꬍስ። ዎንተꬃ ጋላስ አሳይ ደንድድ አህ አሀ ቦላ ዶረትዳይሳ በእዶሶና። 37 ሄሳ ግሾ፥ አሶረ ካዎይ ሳናክሬማ ደንድድ፥ ጉየ ስም ብድ ናናወ ካታማን ኡትስ።
38 እስ ጋላስ ሳናክሬማ ባ ፆሳ ንስሮካ ኬꬃን ጎይንሽን፥ እያ ናይት አድራመለክነ ሳርፃር ማሻን እያ ዎꬍድ አራራተ ቢታ ባቃትዶሶና። እያ ናአይ አስራዶን እያ በሳን ካዎትስ።