1 ሄ ዎደ፥ ባልዳና ናአይ፥ ባብሎነ ካዎይ ማርዶክ-ባልዳን፥ ህዝቅያስ ሀርግድ ፓፅዳይሳ ስእዳ ግሾ፥ ዳብዳበነ እሞታ ህዝቅያሳስ የድስ። 2 ህዝቅያስ ኪተትድ ይዳ አሳታ ሞክስ። ባ ሻሉዋ ምንጅያ ኬꬃን ደእያ ብራ፥ ዎርቃ፥ ሳዉዋ፥ ሎኦ ዛይተ፥ ባ ኦላ ሚሸታነ ባ ሻሉዋ ምንጅያ ኬꬃን ደእያባ ኡባ ኤንታ በስስ። ባ ሶን ዎይኮ ባ ጋꬉዋን ደእያባ ኡባፈ ህዝቅያስ ኤንታ በሶና አግዳባይ ባዋ።

3 ናበይ እሳያስ ካዋ ህዝቅያሳኮ ብድ፥ “ሀ አሳት ዎይግዶና? አዉፐ ይዶና?” ያግድ ኦይችስ።

ህዝቅያስ፥ “ኤንቲ ታኮ፥ ሃሆ ቢታ ባብሎነፐ ይዶሶና” ያግስ።

4 እሳያስ ዛሪድ፥ “ኤንቲ ነ ሶን አይ አይ በእዶና?” ያግድ ኦይችስ።

ህዝቅያስ፥ “ኤንቲ ታ ጋꬎን ደእያ ኡባባ በእዶሶና፤ ታ ሻሉዋ ምንጃ ኬꬃን ደእያባፐ ታኒ ኤንታ በሶናባይ ባዋ” ያግስ።

5 ያትን፥ እሳያስ ህዝቅያሳኮ፥ “ኡባፈ ዎልቃማ ጎዳይ ግያባ ስአ። 6 ‘ኔኒ፥ ካዎ ጋꬎን ደእያባ ኡባይነ ነ ማይዛት ሀች ጋካናዉ ሺሽዳባ ኡባይ ኩምꬅ ድኤትድ፥ ባብሎነ ቢታ ባና ዎደይ ያና፤ አይብካ አተና። 7 ቃስ ኔፐ የለትዳ ነ አሾነ ነ ሱꬁ ግድዳ ነ ኮቻት ድኤትድ ባና፤ ባብሎነን ካዎ ጋꬎን ሹፋ ግድድ ኦꬃና’ ያጌስ”ዳነ 1:1-7፤ 2 ካዎ 24:10-16፤ 2 ታር 36:10. ያግስ።

8 ህዝቅያስ ዛሪድ፥ “ኔኒ ኦድዳ ጎዳ ቃላይ ሎኦ። ሽን ታ ላይꬃን ሳሮነ ዎፓ ግዶ” ያግድ ቆፕስ።