40
ምንꬆ ቃላ
1 ህንተ ፆሳይ ሀይሳዳ ያጌስ፦
“ታ ደርያ ምንꬅተ! ምንꬅተ!
2 እ አይለተꬃን ደእዳ ዎደይ ፖለትስ፤
እያ ናጋራይ አቶ ጌተትስ፤
ባ ናጋራ ግሾ፥ ጎዳይ እያ ዳኮ ሴርዳይሳ፥
የሩሳላመስ ሊቆ ቃላን ኦድተ፤ አዋጅተ” ያጌስ።
3 ሀይሳዳ ግያ ግርሳይ ስኤቴስ፤
“መላ ቢታን ጎዳ ኦግያ ጊግስተ፤
ኑ ፆሳስ አራባ መላ ቢታን *አይኮይካ ባይና ማንቆ ቢታ ዎይኮ መላ ቢታ ዎይኮ ፁገትዳ ቢታ ጉሱ ሆሮጋ ስት ኦꬅተ።ማቶ 3:3፤ ማር 1:3፤ ዮሀ 1:23.
4 ዛንጋራ ኡባይ ꬎቁ ጋና፤
ደረይነ ዙማይ ዝቅ ጋና፤
ኢታ ኦገትነ ገላ ከሳት ደምባታና።
5 ሄ ዎደ ጎዳ ቦንቾይ ቆንጫና፤
አሾ ማእዳ ኡባይ ሄሳ እስፈ በአና።
ጎዳ ዶናይ ሀይሳ ኦድስ” ያጌስ።
6 እስ ግርስ፥ “ዋሳ” ያግሽን ስአስ፤
ታኒ፥ “ዎይጋዳ ዋሶ?” ያጋስ።
“አስ ኡባይ ማታ መላ፤
እያ ቦንቾ ኡባይ ጪሻ መላ። ያይ 1:10-11፤ 1 ጰፅ 1:24-25.
7 ጎዳ እያ ቦላ ሸምፕያ ዎደ፥
ማታይ መሌስ፤ ጪሻይ ቆቆፈቴስ፤
አስ ቱማ ማታ መላ።
8 ማት መሌስ፤ ጪሽ ቆቆፈቴስ፤
ሽን ኑ ፆሳ ቃላይ
መርናዉ ኤቅድ ደኤስ” ያጋዳ ዋሳ።
9 ነኖ ፅዮነስ ሎኦባ ኦደይሶ፤
ዙማ ቦላ ከያ።
ነኖ የሩሳላመስ ሎኦባ ኦደተይሶ፤
ነ ቃላ ꬎቁ ኦꬃዳ ዋሳ።
ያዮፋ፤ ꬎቁ ኦꬃ፤
ይሁዳ ካታማታስ፥ “ህንተ ፆሳይ ሀይስሽ” ያጋ።
10 ሄኮ፥ ኡባ ሃርያ ጎዳይ ዎልቃራ ዬስ፤
እያ ቀሰይ እያዉ ሃራና።
እያ ዎይቶይ እያራ ደኤስ፤
ጭግያ ጋተይ እያ ስንꬃና።
11 እ ባ ዉድያ ሄንꬃንቾዳ ሄማና፤ ህዝ 34:15፤ ዮሀ 10:11.
ባ ዶርሳ ማራታ ባ ቀስያን ሺሻና፤
ኤንታ ባ ክኦን እድማና፤
ꬋንይሳታ ሎዳራ ካለꬃና።
12 ሃꬃታ ባ ኩሸ ቃቃን፥
ሳሎታ ታካꬎን ልክዳይ፥
ቢታ ባና ዳቾን ማክዳይ፥
ደረታነ ዙማታ ምዛነን ልክዳይ ኦኔ?
13 ጎዳ አያና ኤርዳይ፥
እያ ዞርድ ታማርስዳይ ኦኔ?ሮመ 11:34፤ 2 ቆሮ 2:16.
14 እያዉ ቆንጭሳና መላ ኦና ዞረ ኦይችዴ?
ሱረ ፕርዳ እያ ታማርስዳይ ኦኔ?
እያ ጭንጫተꬅ ታማርስዳይ፥
እያ አኬካ በስዳይ ኦኔ?
15 ሄኮ፥ ካዎተꬃት ፁጋን ደእያ እስ ፆኮ መላ፤
ኤንቲ ምዛነ ቦላ ደእያ ባና መላ፤
እ ዩሾይ አባን ተቀትዳ ቢታታ ባናዳ ልከስ።
16 ልባኖሰ ምꬃይ ያርሾ በሳን ኤፃናዉ ግደና፤
እያን ደእያ ዶአት ፁሳ ያርሾስ ግዶኮና።
17 ካዎተꬃት ኡባይ እያ ስንꬃን ባይናባ መላ፤
ኤንቲ እያ ስንꬃን ኡባ አይኮካ ግዶኮና፤
ባይናባፐካ ላፋ።
18 ያትን፥ ፆሳ ህንተ ኦደራ ግናየቲ?
አይባ ምስለራ ጋꬅድ ፄለቲ?
19 ኩሸ ሂላንቾይ ኤቃ ምስለ ጊግሴስ፤
ዎርቃ ሼሸይስ ዎርቃን ላንፄስ፤
ብራ ሼሸይስ እያ ቦላ
ብራ ሳንꬃላታ መꬌስ።
20 ሚሸይ ባይና ማንቆይ፥
ያርሾስ ፆꬎና ምꬅ ዶሬስ።
ምስለይ ቃፆና መላ ኤሳናዉ
ኩሸ ሂላንቾ ኮዬስ።
21 ኤርቤከቲ? ዎይኮ ስእቤከቲ?
ሀይስ ህንተዉ ኮይሮፐ ኦደትቤኔ?
ዎይኮ ሳእ መቶሳፐ
ሀይሳ ህንተ አኬክበከቲ?
22 እ ቢታ ገርቱዋፈ ቦላ ባጋን
ባ አራታን ኡቴስ፤
ቢታን ደእያ አሳት ፃቆ መላ።
ሳሎታ ገሸዳ ምጬስ፤
ዱንካነዳ ደእያ በሲ ኦꬅድ ቶሌስ።
23 እ፥ ሀላቃታ ባይናባዳ ኦꬄስ፤
ሀ አላምያ ሃረይሳታ ሀዳ ከሴስ።
24 ኤንቲ ቶከትድ ቡሮ ጋምኦናሽን፥
ዘረትድ ቡሮ ፃጶ የዶናሽን፥
ጎዳይ ኤንታ ቦላ ጫርኮ የድስ፤
ኤንቲ መልን ጎተይ ኤንታ ፑኖዳ ኤፍስ።
25 ያትን፥ ታና ኦደራ ልከየቲ?
ታና ኦደራ ግናየቲ? ያጌስ ጌሻይ።
26 ህንተ አይፍያ ꬎቁ ኦꬅድ ሳሎ ፄልተ፤
ሀ ፆልንቶታ መꬍዳይ ኦኔ?
እ ኤንታ ኦላንቾዳ ካለꬄስ፤
ኤንታ ታይቡዋ ኤሬስ።
እ ኤንታ ኡባ ኤንታ ሱንꬃን ሱንꬃን ፄጌስ፤
እያ ዎልቃ ግታተꬃፈነ ምኖተꬃፈ ደንዶይሳን፥
ኤንታፈ እሶይካ ꬋየና።
27 ነኖ ያይቆባ፥ ነኖ እስራኤለ፥
ታ ኦገይ ጎዳፐ ጌምስ፤
ታ ፕርዳይ ፆሳፈ ቆሰትስ፤
ያጋዳ አይስ ኦደታይ?
28 ኤራብኪ? ስአብኪ?
ጎዳይ መርና ፆሳ፤
ቢታ ኡባ መꬍዳይ እያ።
እ ዳቡረና፤ ዎይኮ አርጋጨና፤
ኦንካ እያ ቆፋ ኤራናዉ ዳንዳኤና።
29 እ ዳቡርዳይሳታስ ዎልቃ እሜስ፤
ምኖተꬅ ባይናይሳስ ምኖተꬅ ጉጄስ።
30 ሀር አቶሽን ያላጋ ናይት
ዳቡሮሶና፤ አርጋጮሶና፤
ናአተꬃት ዳቡርድ ኩንዶሶና።
31 ሽን ጎዳ አማነትድ ናገይሳት፥
ባንታ ዎልቃ ኦራꬃና።
ኤንቲ አርጋንꬃዳ ቀፈን ፓላና፤
ዎፃና፥ ሽን ዳቡሮኮና፤
ሄመታና፥ ሽን አርጋጮኮና።