41
እስራኤለ ማዱዋ
1 ህንተኖ፥ ዩሾይ አባን ተቀትዳ ቢታቶ፥
ስእ ግድ፥ ታኒ ኦደይሳ ስእተ!
ደረይ ባንታ ዎልቃ ኦራꬆ፤
ኤንቲ ሃ ሺቅድ፥ ኦደቶ፤
አነ ኑኒ ፕርደታናዉ እስፈ ሺቆስ።
2 “ዶሎሀ ባጋፈ እሱዋ ደንꬅድ ብያ በሳ ኡባን ፆኖ እመይ ኦኔ?
እ ካዎተꬃታ እያ ኩሸን አꬅድ እሜስ፤
ካዎታ እያዉ ሃርስስ።
እ ኤንታ ባ ማሻን ብዶ ከሴስ፤
ባ ዶንግያን ኤንታ ፑኖ ኦꬄስ።
3 እ ኤንታ የደꬅሸ፥ እያ ቶሆይ ካሰ የꬍቦና
ኦግያራ ሳሮ ካንꬄስ።
4 ሀይሳ ኦꬅዳይነ ፖልዳይ
የለተꬃካ ኮይሮፐ ፄግዳይ ኦኔ?
ታኒ ጎዳይ፥ ኮይሩዋራ ደአይስ
ዉርሰꬃራካ ደኤይ ታና” ያጌስ።
5 ዩሾይ አባን ተቀትዳ ቢታት፥
ሄሳ በእድ ያይዶሶና፤
ሳኣ ጋፃን ደኤይሳት ኮኮርዶሶና።
ኤንቲ እስፈ ሺቅድ ታኮ ይዶሶና።
6 እሶይ እሱዋ ማዴስ፤
ባ እሻ፥ “ምና” ያጌስ።
7 ኩሸ ሂላንቾይ ዎርቃ ሼሸይሳ ምንꬄስ፤
ናርቃን ቆፅድ ሌእሰይስ
ባቻን ብራታ ሴርሰይሳ፥ “ምና” ጌስ።
እ ብራታ ꬋንይሳ፥ “ሎኦ ኦꬃሳ” ያጌስ፤
ኤቃይ ቃፆና መላ ምስማረን ꬍሼስ።
8 “ሽን ነኖ እስራኤለ፥ ታ አይልያዉ፥
ታ ዶርዳ ያይቆባ፥
ታ ላግያ አብራሃመ ኮቻዉ፥ 2 ታር 20:7፤ ያይ 2:23.
9 ታኒ ነና ቢታ ጋፃፐ ኤሀስ፤
ሃሆሶፐ ፄጋዳ፥ ‘ኔኒ ታ አይለ’
ታኒ ነና ዶራስ፤ ታኒ ነና የግከ።
10 ያዮፋ፥ ታኒ ኔራ ደአይስ፤
ዳጋሞፋ፥ ታኒ ነ ፆሳ።
ታኒ ነና ምንꬃና፤ ነና ማዳና፤
ታኒ ነና ፆንያ ታ ኡሻቻ ኩሽያን ካትሳና።
11 ነ ቦላ ሀንቀትያ ኡባይ ዬላትድ ካዉያና፤
ኔራ ኤቀተይሳት ባይናባ ግዳና።
12 ነ ሞርከታ ኔኒ ኮያና፤
ሽን ኤንታ ደማካ፤
ነና ኦለይሳት ባይናባ ግዳና።
13 ታኒ ጎዳይ፥ ነ ፆሳይ፥
ነ ኡሻቻ ኩሽያ ኦይካና፤
ያዮፋ፥ ታኒ ነና ማዳና።
14 ነኖ ጉፁንያዉ፥ ያይቆባ፥ ህንተኖ እስራኤለ አሳዉ፥
ያዮፍተ፤ ታኒ ህንተና ማዳና፤
ህንተና ዎዝያ እስራኤለ ጌሻይ ታና።
15 ሄኮ፥ ታኒ ነና ኦራꬅ፥
ቃራነ አቻራ ደእያ፥
ካꬅ ቆፅያ ሚሸ ኦꬃስ።
ኔኒ ደረታ ቆፃዳ ሊቅሳና፤
ዙማታካ ፑኖ ኦꬃና።
16 ኔኒ ኤንታ ፑናና፤ ጫርኮይ ኤንታ ኤፋና፤
ሽን ኔኒ ጎዳን ኡፋይታና፤
እስራኤለ ጌሻን ቦንቸታና።”
17 “ማንቆትነ መቶታንቾት ሃ ኮያና፥
ሽን ደሞኮና፤ ኤንታ ቆይ ሳሞን መላና።
ግዶሽን፥ ታኒ ጎዳይ ኤንታ ስአና፤
ታኒ፥ እስራኤለ ፆሳይ፥ ኤንታ አግከ።
18 ታኒ መላ ዙማታ ቦላ ሻፋ፥
ዛንጋራታን ፑልቶ ꬉሳና።
ባዙዋ ሃꬅ ኤልያ በሲ፥
መላ ቢታ ፑልቶይ ከያሶ ኦꬃና።
19 ታኒ መላ ቢታን፥ ዝጋ፥ ሶቃላ ምꬅ፥
ባርሰኔተ ምꬃነ ሻማሆ ዶልሳና።
መላ ቢታ ፂድ፥ ማሮይነ
ጫጭ ኩምዳ ቢታ ኦꬃና።
20 እስራኤለ ጌሻይ ሄሳ መꬍዳይሳነ
ጎዳ ኩሸይ ሄሳ ኦꬅዳይሳ
አሳይ በአና፥ ኤራና፥ ቆፓናነ
አኬካና መላ ታኒ ሄሳ ኦꬃስ።”
21 “አነ ህንተ ሞቱዋ ሺሽተ” ያጌስ ጎዳይ፤
“አነ ህንተ ማርካ ሃ ኤህተ” ያጌስ ያይቆባ ካዎይ።
22 አነ ኤንቲ ባንታ ኤቃታ ሃ ኤሆ፥
አይብ ሀናኔኮ ኤንታ ኤቃት ኑስ ኦዶ።
ኑኒ አኬካና መላነ ኤንታ ዉርሰꬃ ኤራና መላ
ካሰ ሀንዳባይ አይበኮ ኑስ ኦዶ፤
ዎይኮ ስንꬃፈ ሀናናባ ኑስ ቆንጭሶ።
23 ህንተ ፆሳታ ግደይሳ ኑኒ ኤራና መላ
ስንꬃፈ ያናዉ ደእያባ ኑስ ኦድተ።
ኑኒ ዳጋማና መላነ ያያና መላ፥
ሎኦ ግድን ኢታ ግድን አነ እስባ ኦꬅተ።
24 ሽን ህንተ ባይናባ መላ፤
ህንተ ኦሶይካ ሀዳ፤
ህንተና ዶርያ አሳይካ እፀትዳይሳታ።
25 ታኒ ፑደሀ ባጋፈ እሱዋ ደንꬅን፥
እ ዬስ።
ታ ሱንꬃ ፄግያ እሶይ ዶሎሀፐ ያና፤
ኦቶ መይስ ኡርቃ የይሳዳ፥
እ ካለይሳታ የꬋና።
26 ኑኒ ኤራና መላነ እ ልከ ጋና መላ
ካሰትድ ኑስ ሀይሳ ኦድዳይ ኦኔ?
ህንተፈ ኦንካ ካሰትድ ሀይሳ ቆንጭስዳይ፥
ዎይኮ አዋጅዳይ ዎይኮ ባ ቃላ ስስዳይ ባዋ።
27 ታኒ ሀይሳ ካሰታዳ ፅዮነስ ኦዳስ፤
ታኒ የሩሳላመስ ምሽራቾ ኦደይሳ እማስ።
28 ሽን ታኒ ፄልያ ዎደ እሶይካ ባዋ፤
ታኒ ዞረ ኦይችያ ዎደ ኤንታ ኤቃታ ግዶፈ
ዛሮ እምያ እሶይካ ባዋ።
29 ሄኮ፥ ኤንቲ ኡባይ ሀዳ፤ ኤንታ ኦሶይካ ፓና፤
ሼሽድ መꬍዳ ኤንታ ምስለትካ ጫርኮ።