42
ፆሳ አይለ
1 “ታኒ ካትሳዳ ኦይክዳ ታ አይለይ፥
ታ እያን ኡፋይተይስ፥
ታኒ ዶርዳይስ ሀይሳ።
ታኒ ታ አያና እያ ቦላ ዎꬃስ፤
እ ካዎተꬃታስ ሱረ ፕርዳ ኤሀና። ማቶ 3:17፤ 17:5፤ ማር 1:11፤ ሉቃ 3:22፤ 9:35.
2 እ ዋሰና፤
ባ ቃላ ꬎቁ ኦና
ባ ቃላ ኦገን ስሰና።
3 ድንጨትዳ ማይርያ እ መንና፤
ሊእ ሊእድ ኤፅያ ሙቃዳ እ ቶይሰና፤
አማነተꬃን እ ሱረ ፕርዳ ኤሀና።
4 እ ቢታን ሱረ ፕርዳ ኤሰና ጋካናዉ
አርጋጨና ዎይኮ ጉየ ጌና።
ዩሾይ አባን ተቀትዳ ቢታን ደእያ አሳይ
እያ ህግያ ስአናዉ ናጌስ።
5 ሳሎታ መꬍዳይነ ኤንታ ምጭዳይ፥
ሳኣነ ሳአ ቦላ ደእያባ መꬍዳይ፥
ሳአን ደእያ አሳስ ሸምፖ እምዳይ፥
እያን ሄመትያ ኡባስ ደኦ እምዳይ፥
ጎዳ ፆሳይ ሀይሳዳ ያጌስ።
6 ታኒ ጎዳይ ነና ፅሎተꬃን ፄጋስ፤
ነ ኩሽያ ኦይካዳ ነና ናጋና።
ታኒ ነና አሳስ ጫቆ ኦꬃና፤
ካዎተꬃታስ ፖኦ ኦꬃዳ እማና። እሳ 49:6፤ ሉቃ 2:32፤ ሀዋ 13:47፤ 26:23.
7 ኔኒ ቆቀ አይፈታ ዶያና፤
ꬉማ ኦላን፥ ቃሾ ኬꬃን ደኤይሳታ ከሳና።
8 ታኒ ጎዳ፤ ሄስ ታ ሱንꬃ፤
ታ ቦንቹዋ ታኒ ሀራስ እምከ፤
ታ ጋላታ ኤቃታስ እምከ።
9 ሄኮ ታኒ ካሰ ኦድዳባ ኡባይ ፖለትዶሶና፤
ሀእ ታኒ ኦራꬃባ አዋጃይስ፤
ኤንቲ ሀናናፐ ስን ታኒ ህንተዉ ኦዳይስ” ያጌስ።
ፆሳይ ጋላተቶ
10 ጎዳስ ኦራꬃ ማዝሙረ የፅተ፤
ቢታ ጋፃፐ ጋፃ ጋካናዉ እያ ጋላታ የፅተ።
አባ ግዶራ በይሳትነ እያን ደኤይሳት፥
ዩሾይ አባን ተቀትዳ ቢታትነ እያን ደእያ ኡባይ የፆ።
11 መላ ቢታን ደእያ ካታማት፥
ቀዳረ አሳይ ደእያ ጉታት
ባንታ ቃላ ꬎቁ ኦꬆና።
ሰላአ ካታማን ደኤይሳት ኡፋይሳን የፆ፤
ደርያ ሁጰን ባንታ እልልሳ ስሶ።
12 ኤንቲ ቦንቾ ጎዳስ እሞ፤
እያ ጋላታ ዩሾይ አባን ተቀትዳ ቢታታን ኦዶ።
13 ጎዳይ ምኖ አሳዳ ከያና፤
ባ ቃላ ꬎቁ ኦꬅድ ኦላ አዋጃና።
ባ ቃላ ꬎቁ ኦꬅድ ገሬራና፤
ባ ሞርከታ ፆናና።
14 ዳሮ ዎደ ስእ ጋዳ ጋምአስ፤
ስእ ጋዳ ዳንዳአስ።
ሽን ሀእ እቀꬅ ኦይክዳ ማጫሳዳ ታ ዋሳና፤
ቶካ ሸምፓናነ ፔኑቃና።
15 ደረታነ ዙማታ ላላና፤
ኤንታ ቦላ ዶልዳባ ኡባ መልሳና።
ሻፋታ ዩሾይ አባን ተቀትዳ ቢታ ከሳና፤
ኤለ ሃꬃታ መልሳና።
16 ታኒ ቆቀታ ኤንቲ ኤሮና ኦግያራ ካለꬃና፤
ኤንቲ ኤሮና ሆሮጋራ ኤፋና።
ኤንታ ስንꬃን ꬉማ ፖኦ ከሳና፤
ኤንታ ስንꬃን ደእያ ኦግያ ባሳና።
ሀ ኡባ ታኒ ኤንታዉ ኦꬃና፤
ታኒ ኤንታ ኦꬆና አግከ።
17 “ሽን ኤቃ ምስለታን አማነተይሳት፥
ምስለታ፥ ‘ህንተ ኑ ፆሳታ’ ያገይሳት፥
ዬላን ጉየ ስማና።
18 ህንተ ቱለት፥ ስእተ፤
ህንተ ቆቀት፥ ፄልተ፥
ሎይꬅድ በእተ።
19 ታ አይልያፈ ሀር ቆቀይ ኦኔ?
ታ ኪትዳይሳፈ ሀር ቱለይ ኦኔ?
ባና ጎዳስ አꬅድ እምዳ ኡራፐ
ጎዳ አይልያፈ ሀር ቆቀይ ኦኔ?
20 ዳሮባ በአዳሳ፥ ሽን አኬካካ፤
ነ ሀይꬃይ ዶያ፥ ሽን ስአካ” ያጌስ።
21 ጎዳይ ባ ፅሎተꬃ ግሾ፥
ባ ህግያ ግታያናዉነ ቦንቻናዉ ዶስስ።
22 ሽን ሀ አሳይ ቦንቀትስ፤
ደእያባ ኤከትስ።
ኦላ ግዶን ፅሄን ኦይከትስ፥
ቃሾ ኬꬃን ኤንታ ቦላ ጎርደትስ።
ኤንቲ ቦንቀትዶሶና፥ ሽን ኤንታ አሸይ ባዋ፤
ድኤትዶሶና፥ ሽን ኦንካ “ኤንታ ጉየ ዛራ”
ግያ አስ ባዋ።
23 ህንተ ግዶፈ ሀይሳ ስኤይ ኦኔ?
ስንꬃፈ ያና ዎድያባ ቆፐይ ኦኔ?
24 ያይቆባ ድኤተꬃስ፥
እስራኤለ ቦንቄስ አꬅድ እምዳይ ኦኔ?
ናጋራ ኦꬅድ ኑ ቆህዳ፥
እያ ኦግያ ካላናዉነ፥ እያ ህግያ ኪተታናዉ
ኑኒ እፅዳ ጎዳ ግደነዬ?
25 ሄሳ ግሾ፥ እ ኤንታ ቦላ ባ ኤፅያ ሀንቁዋ ጉስስ፤
ኤንታ ዩሹዋ ታማ ላጮን ተቅስ፥
ሽን ኤንቲ ኤርቦኮና፤
እ ኤንታ ፁግስ፥
ሽን ኤንቲ አኬክቦኮና።