ጌሻ ማፃፋ እሳያሳ ማፃፋ 49

ጎዳ አይለ

1 ህንተኖ፥ ዩሾይ አባን ተቀትዳ ቢታቶ፥

ታኒ ኦደይሳ ስእተ።

ህንተኖ፥ ሃሆሶን ደእያ ካዎተꬃቶ አኬክተ፤

ታኒ የለታናፐ ካሰ ጎዳይ ታና ፄግስ፤

ታ አየ ኡሎን ደእሽን፥ ታ ሱንꬃ ሱንꬅስ።

2 ታ እንፃርሳ ቃራ ማሽ ኦꬅስ፤

ባ ኩሽያ ኩያን ታና ገንꬅስ።

እ ታና ፖሸትዳ ዶንገ ዪሽ ኦꬅድ

ባ ሾሁዋን ታና ቆትስ።

3 እ ታኮ፥ “እስራኤለ፥ ኔኒ ታ አይለ፤

ታኒ ታ ቦንቹዋ ነናን ቆንጭሳና” ያግስ።

4 ሽን ታኒ፥ “ታኒ ጮ ዳቡራስ፤

ታ ዎልቃ ጎእ ባይናባንነ ሀዳባን ዉርሳስ።

ግዶሽን፥ ታ ፕርዳይ ጎዳ ማታና፤

ታ ጋተይ ታ ፆሳ ማታና” ያጋስ።

5 ታኒ ጎዳ አይፈ ስንꬃን ቦንቸትዳ ግሾ፥

ታ ፆሳይ ታዉ ዎልቃ ግድዳ ግሾ፥

ያይቆባ እያኮ ዛራናዉ

እስራኤለ እያኮ ሺሻናዉ፥

ታኒ እያ አይለ ግዳና መላ

ታና ታ አየ ኡሎን ዶርዳ

6 ጎዳይ ታኮ ሀይሳዳ ያጌስ፤

ኔኒ ያይቆባ ኮቻ ደንꬃናዉ

እስራኤለፐ አትዳ ጉꬃታ ዛራዳ ኤሀናዉ

ኔኒ ታዉ አይለ ግደይስ ዳሮ ጉꬃባ።

ሄሳፈ አꬃዳ፥ ታ አቶተꬃይ ቢታ ጋፃ ጋካና መላ

ታኒ ነና ካዎተꬃታስ ፖኦ ኦꬃና።

7 ካትዳይሳስነ እፀትዳይሳስ

ቃስ ካዎተꬃታ ሃርያ አይልያስ፥

እስራኤለ ዎዝያ ጎዳይ፥

እስራኤለ ጌሻይ ሀይሳዳ ያጌስ፤

አማንꬅያ ጎዳ ግሾ፥

ነና ዶርዳ እስራኤለ ጌሻ ግሾ

ካዎት በእድ ደንድ ኤቃና፤

ደርያ ሃረይሳት በእድ ጎይናና።

የሩሳላመይ ኦራፃና

8 ጎዳይ ያጌስ፤

“ታኒ ዶርዳ ዎደን ነ ኦይሻ ዛራና፤

አቶተꬃ ጋላስ ታኒ ነና ማዳና።

ታኒ ነና ናጋና፤

ኔኒ ቢታ ዛራዳ ኤሳና መላ፤

አስ ዶና ቢታ ኔኒ ላትሳና መላ

ታኒ ነና አሳስ ጫቆ ኦꬃዳ እማስ።

9 ድኤትዳይሳታ፥ ‘ከይተ!’

ꬉማ ቃሾን ደኤይሳታ፥ ‘ብርሸትተ!’

ጋና መላ ታኒ ነና ኦꬃና።

ኤንቲ ኦገ ማታን ሄመታና፤

መላ ደረ ቦላ ሄመትያ በሲ ደማና።

10 ኤንቲ ኮሻቶኮና ዎይኮ ሳሞቶኮና፤

ኤንታ መላ ቢታ ምሻይ ፁገና፤

አዋይ ኤንታ ሜና።

ኤንታዉ ቃተይስ ኤንታ ካለꬃና፤

ፑልቶ ሃꬃኮ ኤንታ ላጋና።

11 ታኒ ታ ደረታ ኡባ ኦገ ከሳና፤

ታ ዎጋ ኦገታ ꬎቁ ኦꬃና።

12 ሄኮ፥ ታ አሳይ ሃሆሶፐ ያና፦

ፑደሀ ባጋፈነ ዉሎሀ ባጋፈ፥

ቃስ አስዋና ቢታፈ ያና” ያጌስ።

13 ህንተኖ ሳሎቶ፥ ኡፋይሳን የፅተ፤

ነኖ ቢታዉ ኡፋይታ።

ህንተኖ ደረቶ፥ እልልተ!

ጎዳይ ባ አሳ ምንꬅስ፤

ባ መቶተትዳ ባ አሳስ ቃትስ።

14 ሽን ፅዮነይ፥ “ጎዳይ ታና አግስ፤

ፆሳይ ታና ዶግስ” ያጋሱ።

15 አይያ ባ ꬋንꬅያ ናኣ ዶጋናዉ ዳንዳአይ?

ባ ኡሎፐ ከይዳ ናአስ ቃተኬ?

እያ ዶግኮካ፥ ታኒ ነና ዶግከ!

16 ሄኮ፥ ታኒ ነና ታ ኩሸ ቃቃን ፃፋ ዎꬃስ፤

ነ ድርሳ ግምበት ኡባ ዎደ ታ ስንꬃን ደኦሶና።

17 ነና ዛሪድ ኬፀይሳት ኤለስድ ያና፤

ነና ላልዳይሳት ኔፐ ሃካና።

18 አነ ꬎቁ ጋዳ ነ ዩሹዋ ፄላ፤

ነ ናይት ኡባይ እስፈ ሺቅድ ኔኮ ያና።

ታኒ ጎዳይ፥ ታናን ጫቃስ፦

ኔኒ ኤንታ ኡባ አሌቆዳ ማአና፤

ገላናዉ ሀንያ ማጫስ አሌቀተይሳዳ

ኔኒ ኤንታን አሌቀታና።

19 ኔኒ ላለታዳ ባይሳ ግድኮካ፥

ነ ቢታይ ꬋይኮካ፥

ሀእ ነናን ደእያ አሳስ ዳሮ ፁማና፤

ነና ላልዳይሳት ኔፐ ሃካና።

20 ኔኒ ካዮትያ ላይꬃን

ነዉ የለትዳ ናይት ነ ሀይꬃን፥

“ሀይስ በሳይ ኑስ ዳሮ ፁንꬁ ግድያ ግሾ፥

ኑ ዳና ዳልጋ በሲ እማ” ያጋና።

21 ኔኒ ነ ዎዛናን፥ “ሀ ናይታ ኡባ ታዉ ኦነ የልዳይ?

ታኒ የላዳ ꬎንꬁ ግዳስ፤ ታኒ ድኤታስ፥ እፀታስ።

ያትን፥ ሀይሳታ ኦነ ድችዳይ?

ታኒ ታርካ አታስ፤

ያትን ሀ ናይት ኡባይ አዉፐ ይዶና? ያጋና።”

22 ኡባ ሃርያ ጎዳይ ሀይሳዳ ያጌስ፦

“ሄኮ፥ ታኒ ካዎተꬃታ ማላታ በሳና፤

አሳስ ታ ባንድራ ኤሳና።

ኤንቲ ነ አደ ናይታ እድምድ፥

ነ ማጫ ናይታ ባንታ ሀሽያን ቶክድ ኤሀና።

23 ካዎት ነና ድችያ አዋታ ግዳና፤

ኤንታ ማጫ ካዎት ነና ꬋንꬅያ አዮ ግዳና።

ኤንቲ ጉፋንድ ነዉ ጎይናና፤

ነ ቶሆ ባና ላጫና።

ታኒ ጎዳ ግደይሳ ኔኒ ሄሳን ኤራና፤

ታናን አማነትድ ናገይሳት ዬላቶኮና” ያጌስ።

24 ኦላንቹዋፈ ድኦ የግሳናዉ፥

ዎዛን ኢታ አሳ ኩሸፐ ድኤትዳ አስ

ከስ ኤካናዉ ዳንዳኤትዬ?

25 ሽን ጎዳይ ያጌስ፦

ኦላንቾ ኩሸፐ ድኤትዳ አስ ከስ ኤካናዉ፥

ዎዛና ምኖ አሳፐ ድኦ የግሳናዉ ዳንዳኤቴስ።

ኔራ ኦለተይሳታራ ታኒ ኦለታና፤

ነ ናይታካ አሻና።

26 ነና ኡንኤይሳት ባንታ አሹዋ ማና መላ ኦꬃና፤

ዎይነ ኡይድ ማꬆተይሳዳ

ኤንቲ ባንታ ሱꬃ ኡይድ ማꬆታና።

ሄ ዎደ አሳ ኡባይ ታኒ ጎዳ፥

ነና አሽያ፥ ዎዝያነ ያይቆባ ዎልቃማ

ግደይሳ ኤራና።