“ታኒ ህንተ አይዉ የድዳ ፕርማ ዎርቃተይ አዉን ደኢ?

ታኒ ኦደስ ህንተና ባይዛድና?

ህንተ ናቁዋ ግሾ ህንተ አይያ የደታሱ።

ታኒ ፄግዳ ዎደ፥ ‘ዬ!’ ጋናዉ አይስ አስ ꬋይዴ?

ህንተና አሻናዉ ታዉ ዎልቅ ባወዬ?

ሻፋታ መላ ቢታ ኦꬃይስ።

ሳሞይ ዎꬍን ሀይቆሶና።

ኤንታ ካማይ ካዮ ማኦ ዳኔስ” ያግስ።

ኡባ ሃርያ ጎዳይ ታዉ ታማርዳ እንፃርስ እሚስ።

ታኒ ታማረዳ ስአናዳ ታ ሀይꬃ ዶዬስ።

ታኒ ጌላ ግዳብከ፤ ጉየ ስማብከ።

ታ ቡቻ ሾደይሳታስ

ታ ጋጩዋ አꬃዳ እማስ።

ታ ሶምኡዋ ገንꬃብከ።

ታኒ ዬላትከ።

ታኒ ዬላቶናይሳ ኤራይስ።

ያትን፥ ታና ሞተይ ኦኔ?

አነ ታራ ሞተታናዉ ኤቆ!

ያትን፥ ታ ቦላ ፕርደይ ኦኔ?

ኤንታ ብል ማና።

እያ አይልያ ቃላስ ኪተተይ ኦኔ?

ሄ ኡራይ ጎዳ ሱንꬃን አማነቶ፤ ባ ፆሳን ዘምፖ።

ላጮ ፆምፐ ህንተዉ ሺሸይሳቶ፥

ህንተ ኤꬅዳ ታማ ፖኡዋን ሄመትተ።

ህንተ ታ ኩሸፐ ኤካናዉ ደኤይ ሀይሳ፤

ህንተ ዎልቃማ መቶ ሴላን ዝንአና።