51
መርና አቶተꬅ ፅዮነስ
1 ህንተኖ ፅሎተꬅ ካለይሳቶ፥
ህንተኖ ጎዳ ኮየይሳቶ ስእተ።
ህንተ ጳልቀትድ ኤከትዳ ሹቻ
ህንተ ቦከትድ ከይዳ ኦላ ፄልተ።
2 ህንተ አዋ አብራሃመነ
ህንተና የልዳ ሳሮ ፄልተ።
እ ባርካ ደእሽን፥ ታኒ እያ ፄጋዳ
አንጃስነ ታይቦን ዳርሳስ።
3 “ጎዳይ ፅዮነነ
ላለትዳ በሳን ደእያ አሳ ኡባ ምንꬃና።
እ መላ ቢታ ኤደነ፥
ካሎትዳ ቢታ ጎዳ አታክልተ ጋደዳ ኦꬃና።
ያን ኡፋይስነ ሀሹ ጉስ ዳና፤
ጋላትነ ማዝሙረይ ስኤታና።
4 “ታ አሳዉ፤ ታ ኦድያባ ስእተ፤
ታ ደርያዉ፥ ህንተ ሀይꬃ ታኮ ዛርተ።
ህገይ ታፐ ከዬስ፤
ታ ሱረ ፕርዳይ ካዎተꬃታስ ፖኦ ግዳና።
5 ታ ፅሎተꬃይ ኤለስድ ሺቃና፤ ታ አቶተꬃይ ማትስ፤
ታ ቀሰይ ካዎተꬃታስ ሱረ ፕርዳ ኤሀና።
ዩሾይ አባን ተቀትዳ ቢታት ኡባይ
ታናን አማነትድ ናጋና፤
ታኒ ኤንታ ታ ዎልቃን አሻናይሳ ኡፋይሳን ናጋና።
6 ፑደ ꬎቁ ግድ ሳሎታ ፄልተ፤
ዱገ ሳኣካ ፄልተ።
ሳሎት ጩያዳ ላለትድ ꬋያና፤
ሳእ አፍላዳ ዉራና፤
እያን ደእያ አሳ ኡባይ ኡዱንፀዳ ሀይቃና።
ሽን ታ አቶተꬃይ መርናዉ ዳና፤
ታ ፅሎተꬃይ ዉረና።
7 “ህንተኖ ፅሎተꬃ ኤረይሳቶ፥
ታ ህገይ ህንተ ዎዛናን ደኤይሳቶ፥ ስእተ።
አሳ ቦረ ያዮፍተ፤
ኤንታ ጫሻስ ዳጋሞፕተ።
8 ብል ማኦ፥ ዶርሳ እክሰ ጉፁነይ መይሳዳ፥
ኤንቲ ሜተታና።
ሽን ታ ፅሎተꬃይ መርናዉ ዳና፤
ታ አቶተꬃይ የለተꬃ ኡባስ ግዳና” ያጌስ።
9 አቤት ጎዳዉ፥ ደንዳ! ደንዳ!
ጎዳ ቀስያዉ፥ ዎልቃ ማአ።
በን ዎደታንነ የለተꬃን ሀንዳይሳዳ ደንዳ፤
ራኣባ ጌተትያ ዳውያ ቃንፀረꬅዳይነ
ጫድዳይ ነና ግድክዬ?
10 አባነ ግታ ጪሞ ሃꬃ
መልስዳይ ነና ግድክዬ?
ነ ዎዝዳይሳት ፕናና መላ
ጪሞ አባ ኦገ ኦꬅዳይ ነና ግድክዬ?
11 ጎዳይ ዎዝዳይሳት የፅሸ ስሚድ ፅዮነ ያና፤
መርና ኡፋይሳይ ካላቻ መላ ኤንታ ቦላ ኡታና።
ኤንቲ ኡፋይስነ ሀሹ ግያባ ደማና፤
አዛኖይነ ዬሆይ ኤንታፈ ሃካና።
12 ጎዳይ፥ “ታኒ፥ ህንተና ምንይ ታና፤
ያትን፥ ሀይቅያ አሰነ ማታዳ ሹልያ
አሳ ናአ ያያናዉ ህንተ ኦኔ?
13 ሳሎታ ምጭዳነ ሳአ ባሱዋ ኤስዳ ጎዳ፥
ህንተና መꬍዳ ፆሳ ዶግደታ።
ኤንቲ ህንተና ꬋይሳናዉ ኡንኤꬅያ
አሳ ሀንቁዋ ጋሶን ኡባ ጋላስ ያሻን ደኤታ።
ሽን ህንተና ኡንኤይሳታ ሀንቆይ አዉን ደኢ?
14 ድኤትዳይሳት ኤሶን ብርሸታና፤
ቃሸትዳ ኦላን ሀይቆኮና፤ ኮሻቶኮና።”
15 “ታኒ ጎዳ፥ ነ ፆሳ፤
ጉማና መላ አባ ቃይ ታና፤
ታ ሱንꬃይ ኡባፈ ዎልቃማ ጎዳ።
16 ታ ቃላ ነ ዶናን ዎꬅዳይ፥
ታ ኩሸ ኩያን ነና ገንꬅዳይ፥
ሳሎታ ምጭዳይ፥ ሳኣ ባሱዋ ኤስዳይ፥
ፅዮነኮ፥ ‘ኔኒ ታ አሰ’ ” ያግዳይ ታና።
ፆሳ ሀንቆ ፁአ
17 ነኖ፥ ጎዳ ኩሸፐ ጋንድጋርስያ
ሀንቆ ፁኣ አሾና ኡይዳ የሩሳላመ፥
ባርካ! ደንዳ! ደንዳ። ቆን 14:10፤ 16:19.
18 እያ የልዳ ናይታፐ እዮ ካለꬅያ እሶይካ ባዋ፤
እያ ድችዳ ናይታፐ እ ኩሽያ ኦይክድ
ኤፍዳ እሶይካ ባዋ።
19 ሀ ናምኡባት ነ ቃዳ ግድዶሶና፤
ሄሳት ላለተꬅነ ꬋዮ፤
ኮሽነ ማሽ ነ ቦላ ያና፤
ያትን፥ ነና ኦን ምንꬃኔ?
20 ነ ናይት ግተን ገልዳ ገንኤዳ
ኦገ ጋፃን ኩንድድ ላባንዶሶና።
ኤንቲ ጎዳ ሀንቁዋንነ
ነ ፆሳ ሴራን ኩምዶሶና።
21 ሄሳ ግሾ፥ ዎይነ ኡሻን ግዶናሽን
መቶን ማꬆትዳይሳቶ፥ ህንተ ሀይሳ ስእተ።
22 “ባ አሳስ ሞተትያ ነ ጎዳይ፥
ነ ፆሳይ ያጌስ፤
ሄኮ፥ ነና ጋንድጋርስያ፥
ታ ሀንቆ ፁኣ ታኒ ነ ኩሸፐ ኤካስ፤
ኔኒ ዛራዳ ሄ ማꬆይያ ኡሻ ኡያካ።
23 ታኒ ሄሳ ነና ኡንኤꬅያ
አሳ ኩሸን ዎꬃና፤
ኤንቲ ኔኮ፥ ‘ኑኒ ነ ቦላራ ሄመትድ
አꬋና መላ ዛቁላ’ ” ያግዶሶና።
ኔኒ ኤንቲ አꬋና ጋካናዉ
ነ ዞኩዋ ኤንታዉ ቢታዳነ ኦገዳ ኦꬃዳሳ።