55
ሳሞትዳ ኡባይ ዮ
1 ህንተኖ፥ ሳሞትዳይሳቶ፥ ኡባይ ታኮ ሃ ዪተ፤
ሚሸይ ባይናይሳቶ፥ ሃ ዪተ።
ሻምድ ሚተ፤
ሃ ይድ፥ ሚሸ ቃንፆና
ጮ ዎይነ ኡሽነ ማꬅ ሻምተ። ቆን 21:6፤ 22:7.
2 ካꬅ ግዶናባስ ህንተ ሚሽያ አይስ ከሴቲ?
ካልሶናባን ህንተ ዎልቃ አይስ ዉርሴቲ?
አነ ታና ስእተ፥ ታኒ ኦደይሳ ሀይዝተ፤
ሎኦ ካꬃ ሚተ፤
ሎኦ ካꬃን ህንተ አሳተꬃ ኡፋይስተ።
3 “ህንተ ሀይꬃ ታኮ ዛሪድ ታና ስእተ፤
ደኦን ዳናዉ ታ ኦደይሳ ስእተ፤ ሀዋ 13:34.
ታኒ ዳዊታስ ገልዳ ኡፋይሳ ቃላን ህንተና አንጃና።
4 ሄኮ፥ ታኒ እያ ካዎተꬃታስ ማርካ፥
ካለይሳነ ሀላቃ ኦꬃስ።
5 ጎዳይ፥ ነ ፆሳይ፥ እስራኤለ ጌሻይ
ነና ቦንችዳ ግሾ፥
ኔኒ ኤሮና ካዎተꬃታ ፄጋና፤
ነና ኤሮና ካዎተꬃት ኤለስድ ኔኮ ያና።”
6 “ጎዳይ በንትያ ዎደ እያ ኮይተ፤
ማታን ደእያ ዎደ እያ ፄግተ።
7 ኢታ አስ ባ ኦግያፐ ስሞ፤
ናጋራንቾይ ባ ቆፋ አጎ።
ጎዳኮ ስሞ፥ እካ እያ ማራና፤
እ ኑ ፆሳኮ ስሞ፥ እያዉ አቶ ጋና።
8 ታ ቆፋይ ህንተ ቆፋ መላ፥
ታ ኦገይ ህንተ ኦግያ መላ ግደና”
ያጌስ ጎዳይ።
9 ሳሎት ሳኣፐ ꬎቀይሳዳ፥
ታ ኦገይ ህንተ ኦግያፐ፥
ታ ቆፋይ ህንተ ቆፋፐ ꬎቄስ።
10 እርነ ሻች ሳሎፐ ዎꬍድ፥2 ቆሮ 9:10.
ቢታ ላክስድ፥ ካꬅ ዶላና መላነ
አይፋና መላ ኦይሳዳ፥ ዘረይሳስ ዘረ፥
መይሳስ ካꬅ እሞና ጉየ ሳሎ ስመና።
11 ታ ዶናፐ ከይያ ቃላይ ሄሳ ማላ፤
እ ታኒ ሀልችዳይሳ ፖሎናነ
ታ ኪትዳይሳ ኦꬆና ታኮ ጮ ስመና።
12 “ህንተ ኡፋይሳን ከያና፤ ሳሮን ሞይዘታና፤
ደረትነ ዙማት ህንተ ስንꬃን ኡፋይትድ የፃና፤
ባዞ ምꬃት ኡባይ ባንታ ኩሽያ ባቃና።
13 አጉንꬃ ግሾ ፂዳ፥
ጎምኦረ ግሾ ፃይꬅ ዶላና።
ሄስ ጎዳ ቆፍስያባነ
መርናዉ ꬋዮና ማላ ግዳና”
ያጌስ ጎዳይ።