56
አቶተꬅ ሀራታስ
1 “ሱረ ፕርዳ ናግተ፤ ፅሎ ኦꬅተ፤
ታ አቶተꬃይ ኤለስድ ያና፤
ታ ፅሎተꬃይ ማታን ቆንጫና።
2 ሀይሳ ኦꬅያ ኡራይ፥
ሳምባታ ቱንሶና ቦንችያ ኡራይነ
ባ ኩሸይ ኢታባ ኦꬆና መላ ተቅያ ኡራይ አንጀትዳይሳ”
ያጌስ ጎዳይ።
3 ጎዳኮ ሺቅዳ በተ አስ፥
“ጎዳይ ታና ባ አሳፐ ሻካና” ጎፖ፤
ሹፋይ፥ “ታኒ መልዳ ምꬅ” ጎፖ።
4 “ታ ሳምባታ ቦንችያ፥
ታና ኡፋይስያባ ዶረይነ
ታ ጫቁዋ ምንꬅድ ናግያ ሹፋታስ፥
5 ኤንታዉ ታኒ ታ ኬꬃንነ ታ ድርሳ ግምብያ ግዶን
ኤንቲ ሀሳየትያባ እማና።
ኤንቲ ማጫ ናአነ አደ ናአ የልድ፥
ደምያ ቦንቹዋፈ አꬍያ
ሱንꬅ ታኒ ኤንታዉ እማና፤
ታኒ መርናዉ ꬋዮና ሱንꬅ ኤንታዉ እማና።
6 ጎዳ ሀጋዛናዉ፥ ጎዳ ዶሳናዉነ
እያ አይለ ግዳናዉ ባንታና እያኮ ሺሽያ፥
ሳምባታ ቱንሶና ቦንችያነ
ታ ጫቆ ቃላ ምንꬅድ ናግያ በተ አሳታ፥
7 ታኒ ታ ጌሻ ዙማ ቦላ ኤሀዳ
ታ ዎሳ ኬꬃን ኤንታ ኡፋይሳና።
ኤንቲ ታ ያርሾ በሳን ሺሽያ ፁሳ ያርሾይነ
ሀራ ያርሾይ ኤከታና፤
ታ ኬꬃይ አሳ ኡባይ ፆሳ ዎስያ ኬꬅ ጌተታና”ማቶ 21:13፤ ማር 11:17፤ ሉቃ 19:46.
ያጌስ።
8 “ሽቅዳይሳታ ቦላ ጉጃዳ ሀራታካ ታኒ ሺሻና”
ያጌስ እስራኤለፐ ላለትዳይሳታ ሺሽያ፥ ኡባ ሃርያ ጎዳይ።
ፆሳይ ኢታታ ሞቴስ
9 ህንተኖ ባዞ ዶአቶ፥
ህንተኖ ዎራ ዶአቶ፥
ኡባይ ሃ ይድ ሚተ።
10 እስራኤለ አሳ ናገይሳት ቆቀ፤ ኤንታዉ ኤር ባዋ፤
ኤንቲ ኡባይ ቦጫናዉ ዳንዳኦና ቡታለ ካናታ፤
ኤንቲ ዝንእድ ኤልሞቶሶና፤ ꬍስኮ ዶሶሶና።
11 ኤንቲ ምድ ካሎና ያራምባ ካና መላ፤
ኤንቲ አኬክ ፓጭዳ ሄንꬃንቾ።
ኤንቲ ኡባይ ባንታ ኦገ ብዶሶና፤
ኡባይ ባንታ ጎአ ፃላላ ኮዮሶና።
12 ኤንቲ፥ “ሃ ዪተ፤ ዎይነ ኡሻ አነ ኡዮስ፤
ማꬆይያ ኡሻ አነ ጋኖስ!
ዎንቶይ ሀች መላ ግዳና፤
ሀችፈካ አꬍድ ሎአና” ያጎሶና።