ጌሻ ማፃፋ እሳያሳ ማፃፋ 57

1 ፅሎ አስ ሀይቄስ፤

ሽን ሄሳ ቆፐይ ባዋ።

ባንታና ፆሳስ እምዳ አሳይ ቢታፈ ኤከቶሶና፥

ሽን ፅሎ አስ ኢት ያናፐ ስንꬃትድ፥

ኤከተይሳ ኦንካ አኬከና።

2 እ፥ ብድ ሳሮተꬅ ደእያ በሲ ገሌስ፤

ሱረተꬃን ሄመተይሳት ሀይቅድ፥

ሸምፖ ደሞሶና።

3 “ህንተኖ፥ ማሮ ናይቶ፥ ህንተኖ ላምያነ

ላይማትያ ዛረቶ፥ ሃ ዪተ።

4 ህንተ ኦና ቀልቅሴቲ?

ህንተ ኦና ቦሬቲእ?

ህንተ እንፃርሳ ኦደ ቦላ ከሴቲ?

ህንተ ጌላታነ ዎርዳንቾ ናይታ ግደከቲ?

5 ህንተ ዎላ ጋርሳንነ

ዳሻ ምꬃ ጋርሳን አሞን ፁገቴታ።

ህንተ ናይታ ዛንጋራንነ

ዛላ ቆጶን ሹክድ ያርሼታ።

6 ዛንጋራን ደእያ ሊቆ ሹቻት ህንተ ፆሳታ፤

ህንተ ኤንታዉ ኡሻ ያርሾ ትግደታ።

ካꬃ ያርሾካ እምደታ

ያትን፥ ታኒ ሀይሳን ሀንቀትክና?

7 ዙማ ሁጰን ሂፃ የግደታ፤

ያን ያርሻናዉ ከይደታ።

8 ህንተ ፐንግያፈነ ጎባነታፐ

ሶ ባጋራ ኤቃ ምስለታ ኤስደታ።

ታና አግድ ህንተ አርሳ ዳልግስድ፥ ያ ከይደታ፤

ኤንታራ ጫቅደታ፤ ያትድ ኤንታ አርሳ ዶስደታ፤

ኤንታ ካሉዋ በእደታ።

9 ዛይተነ ሽቶ ኤክድ ሞሎካ ጌተትያ ኤቃኮ ብደታ፤

ህንተ ኪታንቾታ ሃሆ ሶ ኪትደታ፤

ሀር አቶሽን ስኦለ ጋካናዉ ዎꬍደታ።

10 ህንተ ሀራ ፆሳታ ኮይሸ ዳቡርደታ፤

ሽን፥ ‘ኡፋይስ ባዋ’ ግቤከታ።

ህንተ ዎልቃይ ሃ ኦራፅስ፤

ሄሳ ግሾ፥ ላባንድ ኩንድቤከታ።

11 “ህንተ ኦና ያይድ፥ ታዉ ዎርዶትደቲ?

ህንተ ታና ቆፕበከታ፤

ህንተ ዎዛናን ቆፕበከታ።

ህንተ ታዉ ያዮና እፅዳይ

ታኒ ዳሮ ዎደ ስእ ግዳ ግሾ ግደኔ?

12 ታኒ ህንተ ፅሎተꬃነ ህንተ ኦሶታ አዋጃና፤

ሽን ህንተና አይኮካ ጎኦኮና።

13 ህንተ ማዶ ደማናዉ ዋስያ ዎደ

ህንተ ሺሽዳ ኤቃት ህንተና አሸና!

ኤንታ ኡባ ጫርኮይ ኤፋና፤

እስ ቶሆ ጫርክያ ጫርኮይ ኤንታ ፑንድ ꬋይሳና።

ሽን ታና ባዉ ባቃትድ አትያ በሰ ኦꬅያ

ኡራይ ቢታ ላታና፤

ታ ጌሻ ዙማ ኤካና”

ያጌስ።

ዎዛን መቅዳ አሳስ ምንꬆ

14 “ባስተ፥ ባስተ! ኦገ ጊግስተ፤

ታ አሳ ኦግያፐ ꬉብያባ ኡባ ድግተ”

ያጌስ ጎዳይ።

15 መርናዉ ደኤይስ፥ ግታይ፥ ꬎቃ በሳን ደኤይስ፥

እያ ሱንꬃይ ጌሻ ጌተተይስ፥ ያጌስ፦

“ካዉይዳ አሳ አያና ደንꬃናዉ፥

መቅዳ ዎዛን ደኤይሳታ ኮላናዉ፥

ካዉይዳነ መቅዳ አያን ደኤይሳራ ዳና።

16 ታ መꬍዳ አሳ አያናይነ ሸምፖይ፥

ታ ስንꬃን ዶጮና መላ ታኒ መርናዉ ሞትከ፤

ኡባ ዎደ ሀንቀትከ።

17 ኤንታ ናጋራ ጋሶን ታኒ ኤንታ ሀንቀታዳ ሴራስ፤

ታ ሶምኡዋ ኤንታፈ ገንꬃስ፤

ሽን ኤንቲ ሀእካ ባንታ ዎዛና ቆፋን ብዶሶና።

18 ታኒ ኤንታ ኦግያ በአስ፤

ሽን ታኒ ኤንታ ፓꬃና፥ ካለꬃና፤

እያዉነ እያ ግሾ ዬከይሳታ ምንꬃና።

19 እስራኤለ ቢታን ዬከይሳታ፥

መተርሻን ጋላታ ኩንꬃና።

ሃሆንነ ማታን ደኤይሳታስ፥

ሳሮይ ግዶ፤ ታኒ ኤንታ ፓꬃና”

ያጌስ ጎዳይ።

20 ሽን ኢታት ኡርቃነ ስልሞ ከስያ፥

ዎፑ ጋናዉ ዳንዳኦና አባ ቤታ መላ።

21 “ኢታታስ ሳሮይ ባዋ”

ያጌስ ታ ፆሳይ።