“ነ ቃላ ꬎቁ ኦꬃዳ ዋሳ፤ ጉየ ጎፓ፤

ነ ቃላ ሞይዘዳ ꬎቁ ኦꬃ።

ያይቆባ ኬꬃስ ኤንታ ናጋራ ኦዳ።

ታ ኦግያ ካላናዉ ዶስያ ዳኖሶና።

ኤንቲ ታና ሱረ ፕርዳ ኦይቾሶና፤

ታኮ ፆሳኮ ሺቃናዉ ዶስያ ዳኖሶና።

‘ኑኒ ፆሞስ፥ ሽን ኔኒ አይስ ኑና ፄልኪ?

ኑኒ ኑናተꬃ ካዉሽዳ፥

ሽን ኔኒ አይስ ኤሮናዳ ሀናድ’ ያጎሶና።

ህንተና ኡፋይስያባ ኦꬄታ፤

ህንተ ኦሳንቾታ ኡንኤꬄታ።’

ቃይ ባይና ኢታ ደሸꬅ ደቻናዉ ፆሜታ።

ስኤቶና መላ ኦꬄስ።

እስ አስ ባናተꬃ ካዉሸይ ሀይሳ መላ ጋላሳ ፃላላኔ?

ካፅዳ ጋሸዳ ሆክሳና መላነ

ብዶ ትየትድ ካዮ ማኦ ማእድ ኡተዬ?

ሄ ፆማ ጋላሳይ ጎዳ ስንꬃን ኤከትዬ?

ሱረ ፕርዳ ꬋዮ ሳንꬃላታ ብላና መላነ

ቃምባራ መንꬅድ ኡንኤትዳይሳታ

ላአ ከሳና መላ ግደነዬ?

ኬꬅ ባይና ማንቆታ ሶ ኤካና መላ፥

ካሎትዳይሳ በአዳ ማይዛና መላነ

ማዶ ኮይያ ህንተ ዳቡዋፈ

ህንተና ገንꬆና መላሳ ግደኔ?

ህንተ ፓፆተꬃይ ኤሶን ያና።

ጎዳ ቦንቾይ ህንተፈ ጉየራ ግድድ፥

ህንተና ናጋና።

ጎዳይ ህንተዉ ኮያና።

እ፥ ‘ሄኮ፥ ታኒ ሀይሳን ደአይስ!’ ያጋና።

ብራን ማለይሳነ ኢታባ ኦደተይሳ አግኮ፥

መቶትዳይሳታ ኮሽያባን ማድኮ፥

ሄ ዎደ ህንተ ፖኦይ ꬉማን ፖአና፤

ህንተ ቃማይ ሴታ ጋላስ ግዳና።

ህንተና መላ ቢታን ኮሽያባን ካልሳና፤

ህንተ ፃጱዋ ፃልሳና።

መል ኤሮና ሃꬃ ፑልቶ መላ ግዳና።

ዳሮ ዎደፐ ካሰ ባሰትዳ ባሶታ ኬፅድ ꬎቁ ኦꬃና።

አሳይ ደእያ በሳነ ዎጋ ኦገይ

ደእያ ካታማታ ኤሰይሳታ ጌተታና።’

ታ ጌሻ ጋላስ ህንተ ጎአ የደይሳ አግኮ፥

ሳምባታ ኡፋይስነ ቦንቸትዳ፥

ጎዳ ጋላሳ ቦንቾ ጋዳ ፄግኮ፥

ህንተ ህንተ ኦግያ ቦና አግድ ሄ ጋላሳ ቦንችኮ፥

ህንተና ኡፋይስያባ ኦꬆናነ ሀዳባ ኦደቶና አግኮ፥

14 ሄ ዎደ ህንተ ጎዳን ኡፋይታና፤

ታኒ ህንተና ዳሮ ቦንቸትዳይሳታ ኦꬃና፤

ህንተ አዋ ያይቆባ ላታ ህንተ ማና መላ ኦꬃና።