65
ፕርዳነ አቶተꬅ
1 “ታና ኦይችቦናይሳታስ ቆንጫስ፤
ታና ኮይቦናይሳታስ በንታስ።
ታ ሱንꬃ ፄግቦና ካዎተꬃስ፥
‘ዬ! ዬ!’ ያጋዳ ኮያስ። ሮመ 10:20.
2 ባንታ ቆፋ ካልድ፥
ሎኦ ግዶና ኦግያን ሄመትያ ጌላ አሳስ
ጋላስ ኩመꬅ ታ ኩሽያ ምጫስ።
3 ሀ አሳይ፥ ታ ስንꬃን አታክልተ ጋደን ያርሽሸነ
ፁበ ያርሾ በሳን እፃነ ጩይስሸ
ታና ኡባ ዎደ ሀንቀꬆሶና።
4 ኤንቲ ዱፎን ኡተይሳታ፥ ጌማ በሳን አቀይሳታ፥
ጉዱንꬆ አሾ መይሳታ፤ ኤንታ ፃሩዋን፥
ቱና አሾ ጫምብ ደኤይሳታ።
5 “ኤንቲ፥ ‘ነዉ ያን ደአ፤
ታኒ ኔፐ ጌሽ ግድያ ግሾ
ታኮ ሺቆፓ!’ ያጎሶና።
ሄሳ መላ አሳት ሲ ቱጭያ ጩያ መላ፤
ጋላስ ኩመꬅ ኤፅያ ታማ መላ።
6 “ሄኮ፥ ታ ስንꬃን ፃፈት ኡትስ፤
ታኒ ኤንታዉ ዛራና ስእ ጊከ፤
ኤንታ ሴራናዉ ደንዳስ።
7 ታኒ ኤንታ ናጋራነ ኤንታ አዋታ ናጋራ
አጩዋ እስፈ ኤንታዉ ቃንፃና።
ኤንቲ ደርያ ቦላ እፃነ ጩይስዶሶና፤
ዙማታ ቦላ ታና ጫይዶሶና።
ኤንቲ ካሰ ኦꬅዳ ኦሱዋ አጩዋ
ታኒ ኤንታዉ ቃንፃና” ያጌስ ጎዳይ።
8 ጎዳይ ያጌስ፦
“ኢታ ዎይነ ሱሳ ግዶን
ሎኦ ዎይነ አይፈይ ደኤይሳዳ፥
አሳይ፥ ‘እያ ግዶን ሎኦ ዎይነ አይፈይ ደእያ ግሾ
ኡባ ዎራ ሆሎፕተ’ ገይሳ መላ፥
ታኒ ታ አይለታ ሀይሳዳ ኦꬃና፤
ታኒ ኤንታ ኡባ ꬋይስከ።
9 ታኒ ያይቆባፐ ኮቸ፥
ይሁዳፐ ታ ደርያ ላተይሳታ ከሳና፤
ታ ዶርዳይሳት እያ ላታና፤ ታ አይለት ያን ዳና።
10 ታና ምንꬅድ ኮይያ ታ አሳስ፥
ሳሮን ዶርሳ ዉደይ ሄመትያ በሲ ግዳና፤
አኮራ ዛንጋራይ ሚዛ ዉደይ አላትያ በሲ ግዳና። እያ 7:24-25.
11 “ሽን ህንተኖ፥ ጎዳ አግድ፥
ታ ጌሻ ዙማ ዶግዳይሳቶ፥
‘ቃዳ’ ጌተትያ ኤቃስ ግብራ ጊግሰይሳቶ፥
ህንተ ዉርሰꬃ ኤራናዉ
‘ሳማ’ ጌተትያ ኤቃስ ዋላሀ ዎይነ
ኡሻ ዋንጫን ኩንይሳቶ፥
12 ታኒ ህንተ ዉርሰꬃ ማሻስ አꬃዳ እማና፤
ህንተ ኡባይ ጎይረታናዉ ሆካና።
ታኒ ህንተና ፄግን ኮይበከታ፤
ኦድስን ስእቤከታ።
ህንተ ታ ስንꬃን ኢታባ ኦꬅደታ፤
ታኒ ዶሶናባ ዶርደታ።”
13 ኡባ ሃርያ ጎዳይ ያጌስ፦
“ታ አይለት ማና፥ ሽን ህንተ ኮሻታና፤
ታ አይለት ኡያና፥ ሽን ህንተ ሳሞታና፤
ታ አይለት ኡፋይታና፥ ሽን ህንተ ዬላታና።
14 ታ አይለት ዎዛናፐ ኡፋይትድ የፃና፥
ሽን ህንተ ዎዛናፐ ካዮታና፤
ህንተ አያናይ መቅዳ ግሾ፥
ህንተ ዘሌልድ ዬካና።
15 ህንተ፥ ህንተ ሱንꬃ ታ ዶረትዳ ደርያስ
ቃንገꬅ ኦꬅድ እማና።
ኡባ ሃርያ ጎዳይ ህንተና ዎꬋና፤
ሽን እ ባ አይለታ ዱማ ሱንꬃን ፄጋና።
16 ካሰ መቶት ዶገትዳ ግሾነ
ታ አይፍያ ስንꬃፈ ጌምዳ ግሾ
ሄ ቢታን አንጆ ኮይያ ኡባይ
ቱማ ፆሳ ሱንꬃን ዎሳና።
ሄ ቢታን ጫቆ ጫቅያ ኡባይ
ቱማ ፆሳ ሱንꬃን ጫቃና።
ኦራꬃ ሳሎነ ሳአ
17 “ሄኮ፥ ታኒ ኦራꬃ ሳሎታነ
ኦራꬃ ሳአ መꬋና፤
ካሰባ ኡባይ ሀሳየተና፤ ቆፈተና።
18 ሽን ታኒ መꬍያባን
መርናዉ ኡፋይትተነ ሀሹ ጊተ።
ታኒ የሩሳላመ ኡፋይሳስነ
እ አሳካ ጋላታን ኩምዳይሳታ ኦꬃዳ መꬋና።
19 ታኒ የሩሳላመን ኡፋይታና፤
ታ አሳን ሀሹ ጋና።
ህዛፐ ጉየ ዬሆይነ
ኡንአ ዋሶይ ያን ስኤተና።
20 “የሩሳላመን ህዛፐ ጉየ፥
ጉꬃ ዎደ ደእድ ሀይቅያ ናእ፥
ባ ላይꬃ ዉርሶና ሀይቅያ ጭማ አስ ዴና።
ፄቱ ላይꬃራ ሀይቅያ ኡራይ፥
ናአተꬃን ሀይቅስ ጌተታና፤
ፄቱ ላይꬅ ጋꬆና ሀይቀይ፥
ባደትዳ አሳዳ ታይበታና።
21 ሄ ዎደ አሳይ ኬ ኬፅድ ዳና፤
ዎይነ ቶክድ እያ አይፍያ ማና።
22 ኤንቲ ኬፅን ሀር ዴና፤
ኤንቲ ቶክን ሀር ሜና።
ታ አሳ ላይꬃይ ምꬃ ላይꬃዳ አዱቃና፤
ታኒ ዶርዳይሳት አዱሳ ዎደ
ባንታ ኩሸ ኦሱዋን ኡፋይታና።
23 ኤንቲ ጮ ዳቡሮኮና
ቃድ ባይና ናአ የሎኮና።
ኤንቲ ባንታ ናይታራ
ጎዳን አንጀትዳ ኮቻታ ግዳና።
24 ኤንቲ ታና ፄጋናፐ ስን፥
ታኒ ኤንታዉ ኮያና፤
ኤንቲ ቡሮ ሃሳዮና ደእሽን
ታኒ ኤንታ ስአና።
25 ሱꬉመይነ ዶርሳ ኡርገይ እስፈ ሄመታና፤
ጋሞይ ቦራዳ ካለ ማና፤
ባን ሾሻስ ካꬅ ግዳና።
ሄ ዎደ ታ ጌሻ ዙማ ቦላ
ኤንቲ ቆሄቶኮናነ ꬋዮኮና”እሳ 11:6-9.
ያጌስ ጎዳ ፆሳይ።