66
ፕርዳነ ኡፋይስ
1 ጎዳይ ያጌስ፤
ሳሎይ ታ አራታ፥
ሳእ ታ ቶሆይ የꬍያ በሰ።
ያትን ህንተ ታዉ ኬፅያ ኬꬃይ፥
አይ መላ ኬꬄ?
ታ ሸምፓና በሳይ አዉሴ?ማቶ 5:34፤ 23:22.
2 ሀይሳ ኡባ ታ ኩሸይ ኦꬅስ፤
ኤንትካ ሀንዶሶና።
ሽን ታኒ ባና ዝቅ ኦꬅያ ኡራ፥
ባ አያናን መቅዳ ኡራነ
ታ ቃላን ኮኮርያ ኡራ ፄላና።
3 ኮርማ ያርሸይ አሰ ዎꬍያ አሳ መላ፤
ኡርገ ዶርስ ያርሸይ ካና ያርሽያ አሳ መላ፤
ካꬃ ያርሾ ያርሸይ፥
ጉዱንꬆ ሱꬅ ያርሽያ አሳ መላ፤
ቆፍሶ እፃነ ጩይሰይ ኤቃ ጎይንያ አሳ መላ።
አሳ ኡባይ ባዉ እንጀትያ ኦገ ዶርዶሶና፤
ኤንታ ሸምፖይ ኤንታ ቱናተꬃን ኡፋይቴስ።
4 ሄሳ ግሾ፥ ታኒ ኤንታ መቶስ አꬃ እማና፤
ኤንቲ ያይዳባ ኤንታ ቦላ ኤሀና።
ታኒ ፄግዳ ዎደ ኦንካ ኮይቤና፤
ታኒ ኦድያ ዎደ ኦንካ ስእቤና።
ኤንቲ ታ ስንꬃን ኢታባ ኦꬅዶሶና፤
ታና ኡፋይሶናባ ዶርዶሶና።
5 ህንተኖ፥ ጎዳ ቃላስ ኮኮረይሳቶ
እያ ቃላ ስእተ፦
“ህንተና እፅያ ህንተ እሻት፥ ታ ሱንꬃ ግሾ፥
ህንተና ኩረይሳት፥ ‘ህንተ ኡፋይትን ኑኒ በአና መላ
አነ ጎዳይ ቦንቸቶ’ ” ያግዶሶና፤
ሽን ኤንቲ ዬላታና።
6 ካታማፐ ያ ዋሱዋ ስእተ፤
ፆሳ ኬꬃፈ ከይያ ግርሳ ስእተ።
ሄ ግርሳይ ባ ሞርከታስ ኤንታ ኦሱዋዳ
ኩሸ ዛርያ ጎዳ ግርሳ።
7 “እቀቶና ናአ የልያ ማጫስ ደኢ?
ባናኮና አደ ናአ የልያ ማጫስ ደኢ?ቆን 12:5.
8 ሀይሳ መላባ ኦነ ስእዳይ?
ሄሳ መላባ ኦነ በእዳይ?
እስ ደረይ እስ ጋላስ የለታናዉ ዳንዳእዬ?
እስ ካዎተꬅ ቅጵ ዛሮን መትዬ?
ፅዮነይ ቡሮ እቀꬅ ኦይኮና፥
ኤለሳዳ ባ ናይታ የላሱ።
9 የላና ዎደ ጋꬅያ ታኒ
ኤንቲ የላናዳ ኦꬅክናዬ?
የላናዳ ኦꬅያ ታኒ
የልያ ኡሎ ጎርዳይናዬ?
ሀይሳ ግዳይ ታና፥ ጎዳ፥ ነ ፆሳ።
10 ህንተኖ የሩሳላሞ ዶስያ ኡባዉ፥ ኢራ ኡፋይትተ፤
እ ግሾ ኡፋይሳን ኖጩ ጊተ።
ህንተኖ እዉ ዬክያ ኡባዉ፥
ኢራ ኡፋይትተ።
11 ህንተ፥ እያ ምንꬅያ ꬋንꬃ ꬋምድ ካላና፤
እ ዳሮ ቦንቹዋፈ ሎይꬅ ኡይድ፥ ኡፋይታና።”
12 ጎዳይ ያጌስ፤
“ታኒ እዉ ሳሮተꬃ ሻፋዳ ዳርሳና፤
እዉ ካዎተꬃታ ዱረተꬃ ክፃ ሻፋዳ ኤሀና።
ህንተ ሄሳ ꬋማና፤ እ ሀሽያን ቶከታና፤
እ ክኦን ኡትድ ባሎታና።
13 አይያ ባ ናአ ምንይሳዳ
ታኒ ህንተና ምንና፤
ህንተ የሩሳላመን ምነታና።
14 ሄሳ ህንተ በእያ ዎደ ህንተ ዎዛናይ ኡፋይታና፤
ህንተ መቀꬃይ ማታ መላ አጫና።
ጎዳ ኩሸይ እያ አይለታ ቦላ ደኤይስን
እያ ሀንቆይ እያ ሞርከታ ቦላ ደኤይስ ኤረታና።
15 ሄኮ፥ ጎዳይ ታማራ ያና፤
እያ ፓራ ጋረት ጎተ መላ።
ባ ሸንያ ሀንቆን፤
ባ ሴራካ ታማ ላጮን ቆንጭሴስ።
16 ጎዳይ አሾ ማእዳ ኡባ
ታማንነ ማሻን ፕርዳና፤
ዳሮት ጎዳ ማሻን ሀይቃና።
17 “ባንታ ኤቃ ጎይናናዉ አታክልተ ጋደ ባናዉ፥
ባንታና ዱማየይሳትነ ጌሸይሳት፤
ጉዱንꬆ፥ ኤጨረነ ሀራ ቱናባታ መይሳታ ግዶፈ
እሱዋ ካልድ በይሳት ኡባይ ꬋያና።
18 “ታኒ ኤንታ ኦሱዋነ ኤንታ ቆፋ ኤርያ ግሾ፥
ካዎተꬃታነ ዱማ ዱማ ዶናን ኦደተይሳታ፥
እስፈ ሺሻና፤ ኤንቲ ሺቅድ፥ ታ ቦንቹዋ በአና።
19 ታኒ ኤንታ ግዶን ማላታ ኦꬃና፤
ኤንታፈ አትዳይሳታ ግዶፈ
ታ ግታተꬃ ስእቦናነ
ታ ቦንቹዋ በእቦና ካዎተꬃታኮ፥
ታርሰሳኮ፥ ሊበኮ፥ ሊደኮ፥ ቱባላኮ፥
ያዋናኮነ ዩሾይ አባን ተቀትድ ሃሆ ቢታታኮ ኪታና፤
ኤንቲ ታ ቦንቹዋ ካዎተꬃታ ግዶን አዋጃና።
20 እስራኤለ አሳይ ካꬃ ያርሹዋ
ጌሻ ሚሸን ዎꬅድ ፆሳ ኬꬅ ኤሄይሳዳ፥
ኤንቲ ህንተ እሻታ ኡባ ካዎተꬃታ ግዶፈ፥
ፓራታን፥ ፓራ ጋረታን፥ ግማለታን፥ ባቁሎታንነ
ጫነ ጋረታን ኡትስድ፥ ጎዳስ እሞ ኦꬅድ
ታ ጌሻ ዙማ ቦላ የሩሳላመ ኤሀና።
21 ኤንታፈ እሶታ እሶታ ካህነነ ሌወ ኦꬃና”
ያጌስ ጎዳይ።
22 “ታኒ መꬍዳ ኦራꬃ ሳሎትነ
ኦራꬃ ሳእ ታ ስንꬃን ምንድ ደኤይሳዳ፥
ህንተ ኮቻይነ ህንተ ሱንꬃይ ምንድ ዳና። እሳ 65:17፤ 2 ጰፅ 3:13፤ ቆን 21:1.
23 አጌና ፄሮፐ ብድ አጌና ፄሮ ጋካናዉ፥
ሳምባታፐ ብድ ሳምባታ ጋካናዉ
አሳ ኡባይ ታ ስንꬃን ጎይናናዉ ያና።
24 ኤንቲ ከይድ ብሸ፥
ታ ቦላ ማካልዳ አሳ አሀ በአና።
ኤንታ ምያ ጉፁነይ ሀይቀና፤
ኤንታ ፁግያ ታማይ ቶኤና፤
ኤንቲ አሳ ኡባስ ሻትያባ ግዳና”ማር 9:48.
ያጌስ ጎዳይ።