1 ብንያመ ቢታን፥ አናቶታ ካታማን ደእያ ካህነታፐ እሱዋ ግድዳ ካልቀ ናኣ ኤርምያሳ ቃላይ ሀይሳ። 2 አሞነ ናአይ፥ ይሁዳ ካዎይ እዮስያስ ካዎትዳ ታማነ ሄꬓንꬆ ላይꬃን ጎዳ ቃላይ ኤርምያሳኮ ይስ። 3 እዮስያሳ ናአይ፥ ይሁዳ ካዎይ እዮአቄም ካዎትዳ ላይꬃታን ጎዳ ቃላይ ኤርምያሳኮ ይስ። ቃስ እዮስያሳ ናአይ፥ ሰደቅያስ ካዎትን፥ ታማነ እስ ላይꬅ ጋካናዉነ፥ እቻሻንꬆ አጌናን የሩሳላመ አሳይ ድኤትድ ብዳ ዎድያ ጋካናዉ ጎዳ ቃላይ እያኮ ይስ።

4 ጎዳ ቃላይ ታኮ ሀይሳዳ ያግሸ ይስ፦ 5 “ኔኒ ነ አየ ኡሎን መታናፐ ስን ታ ነና ኤራይስ። ነ የለታናፐ ስን ታ ነና ዱማያዳ ዎꬃስ፤ ካዎተꬃታስ ነና ናበ ኦꬃዳ ሹማስ” ያግስ።

6 ታኒ፥ “ኡባ ሃርያ ጎዳዉ፥ ታኒ ናአ ግድያ ግሾ ዋታዳ ኦደታነኮ ኤርከ” ያጋስ።

7 ሽን ጎዳይ፥ “ ‘ታኒ ናአ ጎፓ’፤ ታኒ ነና ኪትያ በሳ ባዳ ታ ኪታ ኡባ አሳስ ኦዳ። 8 ታኒ ነና አሻናዉ ኔራ ደእያ ግሾ ኤንታዉ ያዮፋ። ሀይሳ ኦደይ ጎዳ” ያግስ።

9 ጎዳይ ባ ኩሽያ የድድ፥ ታ ዶና ቦችድ፥ “ሄኮ፤ ታኒ ታ ቃላ ነ ዶናን ዎꬃስ። 10 ሾዳናዉነ ላላናዉ፥ ꬋይሳናዉነ ሽራ የጋናዉ፥ ኬፃናዉነ ቶካናዉ፥ አሳ ቦላነ ካዎተꬃታ ቦላ ታ ነና ሀች ሹማስ” ያግስ።

11 ጎዳ ቃላይ ታኮ፥ “ኤርምያሳ፥ ኔኒ አይ በአይ?” ያግስ።

ታኒ ዛራዳ፥ “ላዉዘ ምꬃ ፃምአ በአይስ” ያጋስ። 12 ጎዳይ፥ “ኔኒ ልከ በአዳሳ። ታካ ታ ቃላ ፖላናዉ ሀይሳዳ በአይስ” ያግስ። 13 ዛሪድ ጎዳይ፥ “ሀራ አይ በአይ” ያግስ።

ታኒ ዛራዳ፥ “እስ ፐንትያ ፃሮይ ፑደሀ ባጋፈ እስ ባጋ ገድ ግድ ኡትዳይሳ በአይስ” ያጋስ።

14 ጎዳይ፥ “ፑደሀ ባጋፈ ꬋዮይ ፖꬍድ፥ ቢታን ደእያ አሳ ኡባ ቦላ ጉካና። 15 ታኒ ፑደሀ ባጋ ካዎተꬃታን ደእያ አሳ ኡባ ፄጋና ሀናይስ። ኤንታ ካዎት ይድ፥ የሩሳላመ ገልያ ፐንገታን፥ ድርሳ ዩሹዋንነ ይሁዳ ካታማታ ኡባን ባንታ አራታ ዎꬃና። 16 ይሁዳ አሳይ ታና አግድ፥ ኢታ ኦꬅዳ ግሾ፥ ሀራ ፆሳታስ እፃነ ጩይስዳ ግሾነ ባንታ ኩሸን ኦꬅዳ ፆሳታ ጎይንዳ ግሾ ታ ፕርዳ ኤንታ ቦላ ኤሀስ።

17 “ሽን ኔኒ ጊገታ! ደንዳዳ ታኒ ነና ኪትያባ ኡባ ኤንታዉ ኦዳ። ኤንታዉ ያዮፋ፤ ነ ኤንታዉ ያይኮ፥ ታ ነና ኤንታ ስንꬃን ጉጃዳ ያሽሳና። 18 ሀች ታ ነና ሀ ቢታ ቦላ፥ ይሁዳ ካዎታ ቦላ፥ ሀላቃታ ቦላ፥ ካህነታ ቦላነ ሀ አሳ ቦላ ግምበትዳ ካታማዳ፥ ብራታ ቱሳዳነ ናሰ ብራታን ድርዳ ድርሳዳ ኦꬃዳ ምንꬃስ። 19 ኤንቲ ኔራ ኦለታና፤ ሽን ታ አሻናዉ ኔራ ደእያ ግሾ ነና ፆኖኮና። ሀይሳ ኦደይ ጎዳ” ያግስ።