1 ጎዳ ቃላይ ታኮ ሀይሳዳ ያግሸ ይስ፦ 2 “ባዳ የሩሳላመ አሳ ሀይꬃን ሀይሳዳ ያጋዳ አዋጃ። ነ ናአተꬃን ታዉ አይ መላ አማነትዳኮ፥ ነ ቡሮ መዳን ደእያ ዎደ ታና አይ መላ ሲቅዳኮ፥ ታ አኬካይስ። ኔኒ መላ ቢታን ዘረꬅ ዘረት ኤሮና ቢታን ታና ካላዳሳ። 3 ሄ ዎደ እስራኤለይ ጎዳስ ጌሽ፤ እያዉ ባይራ ካꬃ መላ። እያፐ ምዳ ኡባይ ባላ ግዶሶና፤ ኤንታ ቦላ ꬋዮይ ይስ። ሄሳ ኦደይ ጎዳ” ያጌስ።

4 ህንተኖ፥ ያይቆባ ናይቶ፥ እስራኤለ ዛረ፥ ኡባይ ጎዳ ቃላ ስእተ! 5 ጎዳይ ያጌስ፤ ካሰ ህንተ አዋት ታፐ አይ ባላ ደምድ ታፐ ሃክድ ብዶና? ኤንቲ ፓꬆና ኤቃታ ጎይንድ ፓꬆናባ ግድዶሶና። 6 ኤንቲ፥ “ኑና ግብፀፈ ከስዳ፥ መላ ቢታን ካለꬅዳ፥ አፎራነ መላ ቢታራ አꬅዳ፥ ኮሽነ ሳካና ꬉም ደእያ ቢታራ ፕንꬅዳ፥ ኦንካ አꬎናነ ደኦና በሳራ ካለꬅዳ ጎዳይ አዉን ደኢ?” ያግድ ኦይችቦኮና። 7 ህንተ ሄ ቢታ አይፍያፐ ሎኡዋ ማና መላ ታ ህንተና አራዳ ቢታ ኤሀስ። ሽን ህንተ ይድ፥ ታ ቢታ ቱንስደታ፤ ታ ላታ ኢስደታ። 8 ካህነት፥ “ጎዳይ አዉኔ?” ያግድ ኦይችቦኮና። ታ ህገይ ኤንታ ኩሸን ደእያ አሳት ታና ኤርቦኮና። ደርያ አይሰይሳት ታ ቦላ ማካልዶሶና። ናበት ባኣለ ኤቃ ሱንꬃን ትንብተ ኦድድ ፓꬆና ኤቃታ ጎይንዶሶና።

9 “ሄሳ ግሾ፥ ታ ህንተራ ቡሮ ሞተታና፤ ህንተ ናይታ ናይታራ ሞተታና። 10 አነ ዉሎሀ ባጋ ብድ፥ ዩሾይ አባን ተቀትዳ ቢታ ቆጵሮሳ ፄልተ፤ ዶሎሀ ባጋ ብድ ቀዳረ ቢታ አሰ ኪትድ ፆሞስተ። ሀይሳ መላባይ ሀይሳፈ ካሰ ሀንዳኮ በእተ። 11 ኤንቲ ቱማ ፆሳታ ግዶና እፅኮካ ባ ፆሳታ ላምዳ ደረይ ኦኔ? ሽን ታ አሳይ ኤንታዉ ቦንቾ ግድዳ ታና ፓꬆና ኤቃታራ ላምስ።”

14 “እስራኤለይ ሻመትዳ አይለዬ? ዎይኮ ሶን የለትዳ አይለዬ? ያትን፥ ሞርከት አይስ ዶኦዳ ሻንካቶና? 15 እያ ሞርከት ጋሞዳ እያ ቦላ ጉዶሶና። ኤንቲ ባንታ ቃላ ꬎቁ ኦꬅድ ዳሮሶና። ኤንቲ እያ ቢታ ካይስ ከስዶሶና፤ እያ ካታማት ላለትድ አስ ባይና ሶ ግድዶሶና። 16 ሄሳ ቦላካ መምፕሳነ ፃፍናሳ አሳት እያ ሁጵያ ሜድዶሶና። 17 ነኖ እስራኤለ፥ ኦገ ኡባን ነና ካለꬅያ፥ ጎዳ ነ ፆሳ አጋዳ ሀይሳ ነ ቦላ ኤህዳይ ነና ግድኪ? 18 ናይለ ሻፋፐ ሃ ኡያናዉ ግብፀ ቡስ ነና አይ ማዳኔ? ኤፍራፂሳ ሻፋፐ ሃ ኡያናዉ አሶረ ቡስ ነና አይ ማዳኔ? 19 ህዛ ነ ኢታተꬃይ ነና ሴራና፤ ነ ታና ካድዳይስ ነ ቦላ ፕርዳና። ነ ታና ጎዳ ነ ፆሳ አግዳይስ አይ መላ ኢታነ ጫሞ ግድያኮ አኬካ በአ። ነ ታዉ ያይያ ያሻይ ባዋ” ያጌስ ጎዳይ፥ ኡባፈ ዎልቃማ ፆሳይ።

20 “ታ ነ ቃምባራ ዳሮ ዎደፐ ካሰ መንꬃስ፤ ነ ቃሹዋ ዱꬃስ። ኔኒ፥ ‘ታ ነና ጎይንከ’ ያጋዳሳ። ደረ ቦላነ ዳሻ ምꬃ ጋርሳን ላይማታናዉ ዝንአዳሳ። 21 ታ ነና ዶረትዳ ዘረꬃፈ ኤካዳ፥ ሎኦ ዎይነ ጋደን ቶካስ። ያትን፥ ዋናዳ፥ ጉየ ስማዳ፥ ዎራን ዶልዳ፥ ኢታ ዎይነ ግዳዲ?” ያጌስ ጎዳይ።

22 “ነ ሳንጌኖራ ሜጨትያኮካ፥ ሳሙናን ጎርፐትያኮካ ነ ቅታይ ታ ስንꬃና። 23 ኔኒ ዋናዳ፥ ‘ታ ቱናብከ፤ ባኣለ ኤቃ ጎይናብከ’ ጋይ? ኔኒ ዛንጋራን ሀንዳባ ፄላ፤ ነ ኦꬅዳባ አኬካ። ኔኒ ያነ ሃነ ዎፅያ ዚታ ከይዳ ግማለ መላ። 24 ኔኒ ባዞ ሜዘትዳ፥ ዚታ ዎደ ጫርኮ ስንገꬅያ ሀረ መላ። እ አሞይ ደንድን፥ ኦን እዮ ተቃናዉ ዳንዳኢ? እያ ባዉ ኮያዳ ጋክያ ግሾ አይ አደ ሀረይካ እዮ ደማናዉ ዳቡረና። 25 ነኖ፥ እስራኤለ፥ ነ ጫማይ ዉራና ጋካናዉ ነ ኮቶኖይ መላና ጋካናዉ ሀራ ፆሳታ ጌዶ ዎፆፋ። ሽን ኔኒ፥ ‘አቶ፥ ሄስ ታና ማደና። ታኒ እማꬃ ፆሳታ ዶሳስ፤ ታኒ ኤንታ ጎይናና’ ያጋዳሳ።

26 “ካይሶይ ኦይከትዳ ዎደ ዬላተይሳዳ እስራኤለ አሳይ ዬላትዶሶና፤ ኤንቲ፥ ኤንታ ካዎት፥ ኤንታ ሀላቃት፥ ኤንታ ካህነትነ ኤንታ ናበት ኡባይ ዬላታና። 27 ኤንቲ ምꬃኮ፥ ‘ነ ታ አዋ’ ያጎሶና፤ ሹቻ፥ ‘ታና ነ የላዳሳ ያጎሶና። ኤንቲ ባንታ ሶምኡዋ አግድ፥ ባንታ ዞኩዋ ዛርዶሶና። ሽን ኤንቲ መቶ ዎደ ኑና አሻ!’ ያጎሶና። 28 ሽን ህንተ፥ ህንተዉ መꬍዳ ፆሳት አዉን ደኦና? ህንተ መቶን ገልያ ዎደ ህንተና አሻናዉ ዳንዳእኮ ደንድድ ህንተና አሾ። ህንተኖ፥ ይሁዳ አሳዉ፥ ህንተ ፆሳት ህንተ ካታማታ መላ ዳሮ” ያጌስ ጎዳይ።

29 “ህንተ ታራ አይስ ሞተተቲ? ህንተ ኡባይ ታዉ ማካልደታ። 30 ታ ህንተና ጮ ሴራስ፤ ህንተ ህንተ ኦሱዋፐ ስምያባ ግደከታ። ኮሻትዳ ጋሞዳ ህንተ ማሻይ ህንተ ናበታ ምስ” ያጌስ ጎዳይ።

31 ህንተኖ፥ ሀ ዎድያ የለታዉ፥ ጎዳ ቃላ ስእተ። ታ እስራኤለታስ ባዞ ዎይኮ ሳካና ꬉማን ደእያ ቢታ ግዳድናዬ? ያትን፥ አይስ ታ አሳይ፥ “ኑኒ ኑ ሸነዳ ባና፤ ኔኮ ስሞኮ” ያግዶና? 32 ጌላእያ ባ አሌቁዋ፥ ሙሹርያ ባ ማኡዋ ዶጋይ? ሽን ታ አሳይ ታና ታይቦይ ባይና ጋላስ ዶግዶሶና። 33 ኔኒ ነ ላገꬆታ ጌዶ ዎꬃ ዋናዳ ሜዘታዲ? ዳሮ ኢታ ማጫሳት ነ ኦግያ ታማሮሶና። 34 መንꬅድ ገልሽን ኦይክዳ አሳ ሱꬃን ግዶናሽን ፅሎ ማንቆታ ሱꬃን ነ ማኦይ ኢትስ። ኔኒ ሄሳ ኡባ ኦꬃዳካ፥ 35 ኔኒ፥ “ ‘ታኒ ፅሎ፤ ቱማ ጎዳይ ታ ቦላ ሀንቀተና፤ ታኒ ናጋራ ኦꬃብከ’ ግያ ግሾ ታ ነ ቦላ ፕርዳና። 36 ኔኒ ነ ኦግያ ላማሸ አይስ ዎፃይ? ነና አሶረይ ዬላይዳይሳዳ ግብፀይ ዬላያና። 37 ጎዳይ ነ አማነተይሳታ ካዉሽዳ ግሾነ ነ ኤንታፈ ማደ ደሞና ግሾ ነ ሁጵያ ኦይካዳ ያፐ ከያና” ያጌስ ጎዳይ።