1 “እስ አስ ባ ማችዉ የድን፥ እያ ባዳ ሀራ አዝና ገልኮ፥ ሄ አደይ እዮ ዛሪ? ዛርኮ ሄ ቢታይ ቱና ግደኔ? ሽን ነ ላይማታናዉ ኮያዳ ዳሮ ላገꬆታራ ደአዳሳ፤ ሀእ ኔኒ ታኮ ስማኔ? ያጌስ ጎዳይ 2 ꬎቁ ጋዳ አይኮይ ባይና ደረታ ፄላ። ላይማታናዉ ነ ዝንአቦና በሲ ደኢ? አራበ አስ መላ ቢታን ኡተይሳዳ፥ ኔኒ ላገꬆታ ናጋዳ ኦገ ዶናን ኡታዳሳ። ነ ላይማተꬃንነ ነ ኢታተꬃን ቢታ ቱንሳዳሳ። 3 ሄሳ ግሾ፥ ቶርቸ እራይ ተቀትስ፤ ስላ እራይካ ቡኮና እፅስ። ሄስ ሀንንካ፥ ነዉ ላይማተꬃ መꬎይ ደኤስ፤ ነ ዬላቶና እፃዳሳ። 4 ሀእ ኔኒ፥ ‘ታ አዋዉ፥ ታ ናአተꬃ ላግያዉ ነ ታና ሲቃሳ። 5 ነ ኡባ ዎደ ይሎታይ? ነ ሀንቆይ መርናዉ አገኔ?’ ያጋሳ። ሽን ነ ኦꬃናዉ ዳንዳእያ ኢታ ኡባ ኦꬃሳ” ያጌስ ጎዳይ።

6 ካዋ እዮስያሳ ዎደ ጎዳይ ታኮ ሀይሳዳ ያግስ፦ “አማኖይ ባይና እስራኤለይ ኦꬅዳባ ነ በአዲ? እያ ደረ ቦላነ ዳሻ ምꬃ ኡባ ጋርስ ባዳ ያን ላይማታሱ። 7 እያ ሀይሳ ኡባ ኦꬅንካ ታኮ ስማንደ ጋዳ ቆፓስ፥ ሽን ስማቡኩ። እ ምችያ፥ አማነቶና ይሁድካ ሄሳ በአሱ። 8 አማኖይ ባይና እስራኤለይ ዳሮ ዎደ ላይማትዳ ግሾ ፕርማ እማዳ እዮ የዳስ። ሄስ ሀንንካ እስራኤለ ምችያ፥ አማነቶና ይሁድ፥ ያዮናይሳ ታ በአስ፤ እያካ ከያዳ ላይማታሱ። 9 ላይማተꬃይ እዉ ላፋባ ግድያ ግሾ፥ ምꬃራነ ሹቻራ ላይማታዳ ቢታ ቱንሳሱ። 10 ሄ ኡባን እ ምችያ፥ አማነቶና ይሁድ ስምዳባ ዳናዉሱፐ አትሽን፥ ኩመꬃ ዎዛናፐ ታኮ ስማቡኩ” ያጌስ ጎዳይ።

11 “አማነቶና ይሁዳፐ አማኖይ ባይና እስራኤለይ ፅሎ። 12 ባዳ ፑደሀ ባጋን ደእያ አሳስ ሀይሳዳ ያጋዳ አዋጃ፦ ‘አማኖይ ባይና እስራኤለ፥ ስማ! ታኒ ማሮት ኩምዳ ጎዳ ግድያ ግሾ ነና ኢታ አይፈን ፄልከ። መርናዉ ሀንቀትከ’። 13 ግዶሽን፥ ‘ታኒ ጎዳ፥ ታ ፆሳ ቦላ ማካላስ። አላጋ ፆሳታራ ዳሻ ምꬃ ጋርሳን ላይማታስ። ነ ቃላ ኪተታብከ’ ጋዳ ነ ቆሁዋ አማና” ያጌስ ጎዳይ።

14 “ህንተኖ፥ አማነቶና አሳዉ፥ ታ ህንተዉ አዝና ግድያ ግሾ ስምተ። ታኒ እስ ካታማፐ እስኖ፥ እስ ያራፐ ናምአ ዶራ ኤካዳ ፅዮነ ኤሀና። 15 ታ ዎዛናዳ ህንተና ሄምያ ሄንꬃንቾታ ህንተዉ እማና። ኤንቲ ህንተና ኤራተꬃንነ አኬካን ሄማና” ያጌስ ጎዳይ።

16 “ሄ ጋላሳታን ህንተ ሄ ቢታን ዳርያ ዎደ አሳይ፥ ‘ጎዳ ጫቆ ታቦትያ’ ግድ ኦደቶኮና። እ ኤንታዉ ቆፈተና፤ ሀሳየተና፤ ባይናይስ ኤንታዉ ኤረተና፤ ሀርካ ኦሰተና። 17 ሄ ዎደ ኤንቲ የሩሳላመ፥ ‘ጎዳ አራታ’ ግድ ፄጋና። ካዎተꬃ ኡባፈ አሳይ ጎዳ ሱንꬃ ቦንቻናዉ የሩሳላመ ሺቃና። ሄሳፈ ጉየ፥ ኤንቲ ባንታ ዎዛና ኢታተꬃ ካሎኮና። 18 ሄ ዎደ ይሁዳ አሳይነ እስራኤለ አሳይ ጋሄትድ ፑደሀ ባጋ ቢታፈ ታ ህንተ አዋታ ላትስዳ ቢታ እስፈ ያና” ያጌስ ጎዳይ።

19 “ታ ህንተና ናአꬆ ኤካዳ፥ ቢታ ኡባፈ ሎእያነ አራዳ ቢታ ህንተዉ እማናዉ ኮያስ። ‘ታ አዋዉ’ ግድ ፄጋናነ ታና ካላና ጋዳ ቆፓስ። 20 ሽን እስራኤለ አሳዉ፥ ህንተ ባ አዝናስ አማነቶና ማችዳ ታዉ አማነትበከታ” ያጌስ ጎዳይ።

21 ኤንቲ ባንታ ኦግያ ጌላይዳ ግሾነ ባንታ ፆሳ አግዳ ግሾ ማንቆ ዙማታፐ እስራኤለ አሳ ዋሶይነ ዬሆይ ስኤቴስ። 22 “ህንተኖ፥ አማኖይ ባይና አሳዉ፥ ታኮ ስምተ። ህንተ አማነታና መላ ታ ህንተና ፓꬃና” ያጌስ ጎዳይ።

ህንተ፥ “ኔኒ፥ ኑ ጎዳ ፆሳ ግድያ ግሾ ኔኮ ስማና። 23 ደረታ ቦላነ ዙማታ ቦላ ኤቃ ጎይኖይ ቱማ ጭሞ። ቱማ እስራኤለ አቶተꬃይ ጎዳ፥ ኑ ፆሳ። 24 ኑ ናአተꬃፈ ዶምን፥ ኑ አዋት ዳቡርድ ደምዳ፥ ኤንታ ዶርሳነ መህያ፥ ኤንታ ማጫነ አደ ናይታ ዬላይያ ኤቃት ምድ ꬋይስዶሶና። 25 ናአተꬃፈ ሀች ጋካናዉ፥ ኑነ ኑ አዋት ጎዳ ኑ ፆሳ ቦላ ናጋራ ኦꬅዳ። ጎዳ ኑ ፆሳ ቃላ ኪተትቦኮ። ሄሳ ግሾ፥ ኑኒ ዬላን ጉፋናናዉ ቃስ ካዉሻተꬅ አፍላዳ ኑና ካሞ” ያጎሶና።