1 ጎዳይ ያጌስ፥ “እስራኤለ አሳዉ፥ ስምኮ፥ ታኮ ስምተ። ህንተ ታና ሻትያ ህንተ ኤቃታ ታ ስንꬃፈ ድግኮ፥ ታ ኦግያፐ ካረ ከዮና እፅኮ፥ 2 ቱማን፥ ሱረተꬃንነ ፅሎተꬃን፥ ‘ደኦ ፆሳይ ኤርያ መላ’ ግድ ጫቅኮ፥ ሄ ዎደ ካዎተꬃት እያን አንጀታናነ እያን ጬቃና።”

3 ጎዳይ ይሁዳነ የሩሳላመ አሳኮ ሀይሳዳ ያጌስ፦ “ህንተ ኦ ቢታ ጎይተ፤ አጉንꬃ ቦላ ዘሮፕተ። 4 ህንተኖ፥ ይሁዳነ የሩሳላመ አሳዉ፥ ህንተ ፆሳስ ቃፃረትተ፤ ህንተ ዎዛና ሾሁዋ ድግተ። ሄስ ሀኖና እፅኮ ህንተ ኢታተꬃ ግሾ፥ ታ ሀንቆይ ታማዳ ኤፃና፤ እያ ኦንካ ቶይሳናዉ ዳንዳኤና” ያጌስ ጎዳይ።

5 ይሁዳን አዋጅተ፤ የሩሳላመን ሞይዘ ፑንተ! ህንተ ቃላ ꬎቁ ኦꬅድ ሀይሳዳ ግድ ዋስተ! እስፈ ሺቅድ ግምበትዳ ካታማታኮ የꬍተ። 6 አሳይ ፅዮነ ባና መላ ማልተ! ህንተ ሸምፑዋ አሻናዉ ጋምኦና ባቃትተ! ጋምኦፍተ! ታ ፑደሀ ባጋፈ ጋዶነ ꬋዮ ቢታ ቦላ ኤሀና ሀናይስ። 7 ጋሞይ ዎራፐ ከየይሳዳ ካዎተꬃታ ꬋይሰይስ ባ በሳፈ ደንድድ ህንተ ቢታ ꬋይሳናዉ ይስ። ህንተ ካታማት ላለትድ ባይሳ ግዳና። 8 ሄሳ ግሾ፥ ካዮ ማኦ ማእድ፥ “ዎ! ዎ!” ግድ ዘሌልተነ ዬክተ። ጎዳ ሱልያ ሀንቆይ ኑ ቦላፈ ክችቤና።

9 “ሄ ዎደ ካዋነ ሀላቃታ ዎዛናይ ትልአና፤ ካህነት ዳጋማና፤ ናበት ህርጋና” ያጌስ ጎዳይ።

10 ታኒ፥ “ኡባ ሃርያ ጎዳዉ፥ ማሽ ኤንታ ቆን ዎꬍያ ዎደ ‘ህንተዉ ሳእ ሳሮ ግዳና’ ያጋዳ ሀ አሳነ የሩሳላመ አይስ ጭማይ” ያጋስ።

11 ሄ ዎደ ሀ አሳስነ የሩሳላመስ ሀይሳዳ ያግድ ኦደታና፦ “መላ ቢታን ደእያ አይኮይ ባይና ꬎቃ ደረታፐ ምችያ ጫርኮይ ታ አሳ ቦላ ጫርካና፤ ሄስ ካꬅ ጌሻናሳ ግደና። 12 ታ ኪታን ዎልቃማ ጫርኮይ ጫርካና፤ ታ ኤንታ ፕርዳና” ጌስ።

13 ሄኮ፥ ሞርከይ ሻራዳ ከዬስ። እያ ፓራ ጋረት ጎተ መላ፤ እያ ፓራት አርጋንꬃፈ አꬍድ ኤሶቶሶና። ኑና አየ! ኑ ꬋይዳ!

14 “ነኖ የሩሳላመ፥ አታና መላ ነ ዎዛና ሜጫዳ ኢታተꬃፈ ጌያ። ኢታ ቆፋይ ነ ዎዛናን አዉደ ጋካናዉ ጋምአኔ? 15 ዳነ ካታማፐነ ኤፍሬማ ዙማፐ ይዳይሳት ኢታባ አዋጆሶና። 16 ይሁዳ ካታማታ ቦላ ኦላ አዋጅያ ኦላንቾት ሃሆ ቢታፈ ዩሳ ቦላ ደኦሶና ግድ ካዎተꬃታስ ኦድተ፤ የሩሳላመስካ አዋጅተ። 17 እ ታ ቦላ ማካልዳ ግሾ፥ ጋደን ደእያ ካꬃ ናገይሳዳ ኦላንቾት ይሁዳ ዩሹዋ ተቃና” ያጌስ ጎዳይ።

18 ይሁዳ አሳዉ፥ ህንተ ሀኖይነ ህንተ ኦሶይ ሀይሳ ኡባ ህንተ ቦላ ኤህስ። ሀይስ ህንተዉ ሴራ። እ አይ መላ ጫም! ህንተ ዎዛና አይ መላ ጫድ!

19 ታና አየ! ታ ሀይሳ ዋታ ዳንዳአነ! አየ ታ ዎዛና! ታ ዎዛናይ ኮኮሬስ፤ ታ ስእ ጋናዉ ዳንዳእከ። ታኒ ሞይዘ ፑኖነ ኦላ ግርስ ስእዳ ግሾ ስእ ጋናዉ ዳንዳእከ። 20 ꬋዮይ ꬋዮ ቦላ ዬስ፤ ቢታይ ኩመꬅ ꬋይስ። ታ ዱንካነይ ኩንድስ፤ ታ ሻቃራይካ ላለትስ። 21 ታኒ አዉደ ጋካናዉ ኦላ ማላ በአኔ? አዉደ ጋካናዉ ሞይዘ ፑኖ ስአኔ?

22 “ታ አሳይ ኤያ፤ ኤንቲ ታና ኤሮኮና። ኤንቲ ቆፍ ባይና ናይታ መላ፤ ኤንታዉ አኬክ ባዋ። ኤንቲ ኢታባ ኦꬃናዉ ጭንጫ፤ ሽን ሎኦባ ኦꬅድ ኤሮኮና” ያጌስ ጎዳይ።

23 “ታኒ ሳኣ በእያ ዎደ፥ ሳእ አይኮይካ ባይና ባይሳ ግድዳይሳ በአስ። ቃስ ሳሎታ ፄልያ ዎደ፥ ፖኦይ ባይናይሳ ፄላስ። 24 ታ ደረታ ፄልያ ዎደ ኤንቲ ቃፆሶና፤ ታኒ ዙማታ በእያ ዎደ ያ ሃ ዎፆሶና። 25 ታ ፄልያ ዎደ አስ ባዋ፤ ሳሎ ካፎት ኡባይ ፓልድ ባቃትዶሶና። 26 ታ ፄልያ ዎደ አራዳ ቢታይ ቃኤ ግድዳይሳ በአስ። ጎዳ ስንꬃንነ እያ ሱልያ ሀንቁዋ ስንꬃን ሄ ቢታ ካታማት ላለትዶሶና።

27 “ቢታይ ꬋያና፤ ሽን ታ እያ ኩመꬅ ꬋይስከ። 28 ሳአይ ዬካና፤ ሳሎይ ꬉማና። ታ ኦዳስ፤ ማርስከ። ታ ቆፋ ቃቻስ፤ አግከ” ያጌስ ጎዳይ።

29 ፓራ አሳታነ ዶንገ አሳታ ዋሱዋን፥ አሳይ ካታማ ኡባፈ ባቃታና። ባጋት ዎፅድ ዎራ ገላና፥ ባጋት ዛላ ቦላ ከያና። ካታማ ኡባይ ባይስ ግድን ደእያ አስ ꬋያና።

30 ነኖ፥ ꬋዮስ አትዳረ ነ ዋናይ? ነ ዞኦ ማኡዋ አይስ ማአዲ? ዎርቃ አሌቆ አይስ ዎꬃዲ? ነ አይፍያ ስጵንꬃ አይስ ትያይ? ኔኒ ጮ ነና ሎይꬃሳ፤ ነ ላገꬆት ነና ካꬍዶሶና፤ ኤንቲ ነና ዎꬋናዉ ኮዮሶና። 31 ታኒ እቀꬅ ኦይክዳ ማጫስ ዋስያ ዋሱዋ መላ ስአስ። እ ዋሶይ ኮይሮ ናአ የልያ ማጫሳ ዋሶ መላ። ሄ ዋሶይ፥ የሩሳላመይ ሸምፖ ꬋያዳ፥ ባ ኩሽያ ምጫዳ፥ “ታና አየ! ታ ꬋያስ! ታና ዎꬋናዉ ሀኖሶና!” ያጋዳ ዋስያ ዋሱዋ።