1 “አነ የሩሳላመ ኦግያ ቦላ ከይተ፤ ፑደነ ዱገ ሄመትተ፤ እያ ዩሹዋ ፄልተነ አኬክተ፤ እያ ጉታራንካ ኮይተ። ፅሎ ፕርድያነ ቱማ ኮያ እስ አስ ህንተ ደምኮ፥ ታ የሩሳላመ ማራና። 2 ኤንቲ፥ ‘ደኦ ጎዳይ ኤርያ መላ’ ግድ ጫቅኮካ፥ ዎርዶ ጫቆሶና” ያጌስ ጎዳይ።

3 አቤት ጎዳዉ፥ ነ አይፈት ቱማ ፄሎኮናዬ? ነ ኤንታ ሾጫዳሳ ሽን ኤንታ ሳክቤና። ነ ኤንታ መንረꬃዳሳ ሽን ኤንቲ ስሞና እፅዶሶና። ኤንቲ ባንታ ሶምኡዋ ዛላፈ አꬅድ ምንꬅድ ባንታ ናጋራፐ ስሞና እፅዶሶና።

4 ሄሳፈ ጉየ፥ ታኒ፥ “ሀይሳቲ ጎዳ ኦግያነ ባንታ ፆሳ ህግያ ኤሮና ግሾ፥ ማንቆነ ኤያ” ያጋዳ ቆፓስ። 5 ህዛ፥ ታ ግታ አሳታኮ ባዳ ኤንታዉ ኦዳና። ጎዳ ኦግያነ ባንታ ፆሳ ህግያ ኤሮሶና። ሽን ኤንቲ ኡባይ እያ ቃምባራ መንꬅዶሶና፤ እያ ቃሹዋካ ዱꬅዶሶና። 6 ኤንታ ማካላይነ ኤንታ ኩንደꬃይ ዳሮ ግድያ ግሾ፥ ጋሞይ ዎራፐ ከይድ፥ ኤንታ ዎꬋና። ሱꬉመይ ባዞፈ ከይድ፥ ኤንታ ማና። ማሄይ ኤንታ ካታማታ ሆክድ ናጋና። ሄ ካታማታፐ ከይያ ኡባይ ፑዘታና።

7 “ታኒ ህንተ ናጋራ አይስ አቶ ጎ? ህንተ ናይት ታና አግድ፥ ዎርዶ ፆሳታን ጫቅዶሶና። ታኒ ኤንታ ሙዛዳ ካልሳስ፥ ሽን ኤንቲ ላይማትዶሶና፤ ኤንታ ኬꬃን አቅዶሶና። 8 ኤንቲ ꬊከትዳ ኮርማ ፓራዳ፥ ሀራ አሳ ማቾ ላገꬃናዉ ስንገꬆሶና። 9 ቱማ ታ ሀ ኦሶታ ግሾ፥ ኤንታ ሴራናዉ በስክና? ሀይሳ መላ ካዎተꬃ ቦላ ታ ሃሉዋ ከይክና?” ያጌስ ጎዳይ።

10 “እ ዎይነ ጋድያ ግዶ ገልድ ኢስተ፥ ሽን ኩመꬅ ꬋይሶፍተ። ኤንቲ ጎዳባ ግዶና ግሾ እ ታሸታ ካርድ የግተ። 11 እስራኤለ አሳይነ ይሁዳ አሳይ ኩመꬅ ካድዶሶና” ያጌስ ጎዳይ።

12 ኤንቲ ሀይሳዳ ግድ ጎዳ ቦላ ዎርዶ ኦደትዶሶና፦ “እ አይኮካ ኦና፤ ቆህያባይ አይብካ ኑ ቦላ ዬና። ሞርከ ማሻይ ዎይኮ ኮሽ ኑና ፖሎ ደመና። 13 ናበት ጫርኮ መላ፤ ኤንታን ፆሳ ቃላይ ባዋ። ሄሳ ግሾ፥ ኤንቲ ግያባ ኡባይ ኤንታ ጋኮ” ያጎሶና።

14 ሄሳ ግሾ፥ እስራኤለ አሳኮ፥ “ኤንቲ ሀ ቃላ ኦድዳ ግሾ ታኒ ታ ቃላ ነ ዶናን ታማ ኦꬃና፤ ሀ አሳይ ምꬅ ግዳና፤ ታማይካ ኤንታ ማና” ያጌስ ጎዳይ፥ ኡባፈ ዎልቃማ ፆሳይ።

15 ጎዳይ እስራኤለ አሳኮ፥ “ህንተኖ፥ እስራኤለ አሳዉ፥ ታ ህንተ ቦላ ሃሆ ቢታፈ እስ ካዎተꬅ ኤሀና። ኤንታ ቃላ ህንተ ኤሮና፥ ኤንታ ኦዳይ ህንተዉ ገሎና ዎልቃማነ በን ካዎተꬅ። 16 ኤንታ ዶንገ ፓልኤ ሾሆይ ዶያ ዱፎ መላ፤ ኤንታ ኦላንቾት ዎልቃማ። 17 ኤንቲ ህንተ ካꬃነ ህንተ ጎሻ አይፍያ ማና፤ ህንተ አደ ናይታነ ማጫ ናይታ ዎꬋና፤ ህንተ ዶርሳነ መህያ ቦንቃና፤ ህንተ ዎይንያነ ባላሰ ምꬃ ꬋይሳና። ህንተ አማነትያ፥ ግምበትዳ ካታማታ ባንታ ማሻን ኦልድ ꬋይሳና” ያጌስ።

18 “ግዶሽን፥ ሄ ጋላሳታን ግድኮካ፥ ታኒ ታ አሳ ኩመꬅ ꬋይስከ” ያጌስ ጎዳይ 19 አሳይ ነና፥ “ ‘ጎዳይ ኑ ፆሳይ ኑ ቦላ ሀይሳ ኡባ አይስ ኦꬅዴ?’ ግድ ኦይችኮ፥ ነ ኤንታኮ፥ ‘ህንተ ታና አግድ፥ ህንተ ቢታን እማꬃ ፆሳታ ጎይንዳይሳዳ፥ ህንተካ አሳ ቢታን ሀራታስ ሀጋዛና’ ያጋ” ያግስ።

20 “ሀይሳ ያይቆባ አሳስ ኦዳ፤ ይሁዳ ቢታን አዋጃ። 21 ህንተኖ፥ አይፈይ ደእሽን በኦናይሳቶ፥ ሀይꬅ ደእሽን ስኦናይሳቶ፥ ኤያነ አኬኮና አሳዉ ሀይሳ ስእተ! 22 ህንተ ታዉ ያያናዉ በሰኔ? ህንተ ታ ስንꬃን ኮኮራናዉ ኮሸኔ? ያጌስ ጎዳይ። አባይ አꬍድ ቦና መላ ሻፈ እያዉ ዛዋ ኦꬅዳይ ታና? ዙለይ ሱግኮካ እያፐ አꬋናዉ ዳንዳኤና፤ ሆበይ ደንድኮካ ካንꬅድ አና። 23 ሽን ሀ አሳስ ሙመነ ማካላ ዎዛን ደኤስ። ኤንቲ ሀራ ሶ ስሚድ ዎራ ብዶሶና። 24 ኤንቲ ባንታ ዎዛናን፥ ‘ኑስ ስላ እራነ ቶርቸ እራ ዎደን ዎደን እምያ፥ ካꬃ ሺሽያ ዎደ ኑስ እምያ ጎዳ አነ ያዮስ’ ያግቦኮና። 25 ህንተ ባላይ ሄሳ ተቅስ፤ ህንተ ናጋራይ ህንተና ሎኦባፐ አሽስ” ያጌስ።

26 “ታ አሳ ግዶን ኢታ አሳት ደኦሶና። ካፎ ኦይካናዉ ናግያ አሳዳ ሆክድ ናጎሶና። ኤንቲ ግተ የግድ አሳ ኦይኮሶና። 27 ካፎ ኬꬃን ካፎይ ኩምዳዳ፥ ኤንታ ኬꬃይ ጭሞን ኩምስ፤ ኤንቲ ዎልቃማነ ዱረ። 28 ኤንቲ ኦርደነ ሞꬎ ግድዶሶና፤ ኤንታ ኢታ ኦሱዋስ ዛው ባዋ። ኤንቲ ይኦ ናይታ ግሾ ሞተቶኮና፤ ማንቆታስ ሱረ ፕርድቦኮና። 29 ያትን፥ ታኒ ሄሳ ግሾ ኤንታ ሴራናዉ በሰኔ? ሀይሳ መላ ካዎተꬃ ቦላ ታ ሃሉዋ ከያናዉ በሰኔ?” ያጌስ ጎዳይ።

30 “ዳሮ ኢታባይነ ዳጋንꬅያባይ ቢታ ቦላ ሀንስ። 31 ናበት ዎርዶ ኦዶሶና፤ ካህነት ኤንታ ዞርያን አይሶሶና። ታ አሳይካ ሄሳ መላባ ዶሴስ። ሽን ዉርሰꬃን ህንተ ዋናኔ?” ያጌስ ጎዳይ።