1 ታ እሻቶ፥ ህንተፈ ዳሮት አስታማረ ግዶፖ። ኑ፥ አስታማረት ሀራታፐ አꬍያ ፕርዳ ኤካናይሳ ህንተ ኤሬታ። 2 ኑ ኡባይ ዳሮባን ባለቶስ። ባ ኦዳን ባለቶና ኦንካ ባናተꬃ ናጋናዉ ዳንዳእያ ፖሎ አስ። 3 ፓራት ኑስ ኪተታና መላ ብፃላ ባርስድ ኑኒ ኮይያ በሲ ኡባ ኤፎስ። 4 ማርካበይ ሄሳ መላ ግታ ግድሸ ዎልቃማ ጫርኩዋን ሱገትኮካ፥ ኤንታ ላገይስ ባ ኮይያ በሲ ዛሪድ ላግያ ጉꬃ ምꬃን ላገትድ ቤስ። 5 ሄሳዳ እንፃርስ አሳተꬃ ግዶን ጉꬃ ግድኮካ ዳሮ ግታባን ጬቀቴስ።

ጉꬃ ታም ዳሮ ግታ ዎራ ፁጌስ። 6 እንፃርስ ታማ መላ። እንፃርስ ኑ አሳተꬃ ግዶን ኢታን ኩምዳ አላመ፤ አሳተꬃ ኡባ ቱንሴስ። ጋናመፐ ከይያ ታማዳ ኑ ደኡዋ ዎꬃ ኡባ ፁጌስ። 7 ዶአታነ ካፎታ፥ ኡሎራ ጎሸተይሳታነ አባን ደእያ መተꬃታ ኡባ አስ ሃሬስ፤ ኤንትካ ሃረትዶሶና። 8 ሽን ኦንካ እንፃርስ ሃራናዉ ዳንዳእቤና። እንፃርስ ዎꬍያ ማርዘይ ኩምዳ ሃረቶና ኢታ መተꬅ። 9 ኑ እንፃርሳን፥ ኑ፥ ጎዳነ ፆሳ ጋላቶስ። ቃስ እያራ ፆሳ ሌምሶን መትዳ አሳ ባዶስ። 10 እስ ዶናፐ ጋላትነ ባደꬅ ከዬስ። ታ እሻቶ፥ ሄሳዳ ሀናናዉ በሰና። መ 1:26. 11 ፑልቶይ እስ ኦላፈ ማልእያ ሃꬅነ ጫምያ ሃꬅ ፑልታናዉ ዳንዳኢ? 12 ታ እሻቶ፥ ባላሰ ምꬅ ሻማሆ አይፋናዉ ዳንዳኢ? ዎይኮ ዎይነ ምꬅ ባላሰ ምꬃ አይፈ አይፋናዉ ዳንዳኢ? ጫሞ ሃꬃፈ ማልኦ ሃꬅ ከያናዉ ዳንዳኤና።

13 ህንተ ግዶን ጭንጭነ አኬካንቾይ ኦኔ? ባ ሎኦ ደኡዋ፥ አሽከተꬃንነ ጭንጫተꬃን ኦሰትዳ ኦሶን በሶ። 14 ሽን ህንተ ዎዛናን ጫምያ ቅናተይነ ባና ዶሶይ ደእኮ ጬቀቶፍተ፤ ቱማ ቦላ ዎርዶቶፕተ። 15 ሄሳ መላ ጭንጫተꬃይ ሳሎፐ ይዳባ ግዶናሽን፥ ሄስ አሳባ፥ አላመባ፥ ፃላሄባ። 16 ቅናተይነ ባና ዶሶይ ደእያ ሶን ኦሽነ ኢታ ኦሶ ኡባይ ደኦሶና። 17 ሽን ቦላፈ ያ ጭንጫተꬃይ ኡባፈ ስን ጌሽ። ቃስ ሳሮተꬅ፥ አዳተꬅ፥ ስእድ ኤከይሳ፥ ቃተይሳ፥ ሎኦ አይፈይ ኩምዳይሳ፥ አሰ ሻኮናይሳነ ጩቦተꬅ ባይናይሳ። 18 ሳሮተꬃ ዶሰይሳት ሳሮተꬅ ዘርድ ፅሎተꬅ ቡጮሶና።