1 ኦሽነ ኦል ህንተ ግዶ አዉፐ ዪ? ኤንቲ የይ ህንተ አሳተꬃ ሃራናዉ ኦለትያ ህንተ አሾ አሙዋፐ ግደነዬ? 2 ህንተ አሞቴታ፥ ሽን ደመከታ፤ ሄሳ ግሾ፥ ዎꬌታ። ምንꬅ ኮዬታ፥ ሽን ደማናዉ ዳንዳኤከታ፤ ሄሳ ግሾ፥ ኦየቴታነ ኦለቴታ። ህንተ ፆሳ ዎሶና ግሾ ኮያባ ደመከታ። 3 ህንተ ዎሰታ፥ ሽን ደመከታ። ህንተ አሾ አሙዋ ፖላናዉ ዎበ ኦገን ዎስያ ግሾ ደመከታ። 4 ህንተኖ፥ ላይማተይሳቶ! ሀ አላምያ ዶሰይ ፆሳራ ሞርከ ግደይሳ ኤረከቲ? ሀ አላምያራ ዳቦታናዉ ኮየይ ኦንካ ፆሳራ ሞርከ። 5 ጌሻ ማፃፋይ፥ “ፆሳይ ኑናን ዳና መላ ኦꬅዳ አያናይ፥ ኑኒ እያዉ ቡዞ ግዳና መላ አሞቴስ” ግዳይሳ ጮ ግዳባ ዳኒ? 6 ሽን ጌሻ ማፃፋይ፥ “ፆሳይ ኦቶራንቾታ እፄስ፥ ሽን አሽከታስ ማሮተꬅ እሜስ” ግያ ግሾ፥ ፆሳይ ማሮተꬅ ዳርስድ እሜስ። ሌም 3:34.

7 ሄሳ ግሾ፥ ፆሳስ ሃረትተ፤ ፃላህያራ ኤቀትተ፤ እ ህንተፈ ሃካና። 8 ፆሳኮ ሺቅተ፤ እ ህንተኮ ሺቃና። ህንተኖ፥ ናጋራንቾቶ፥ ህንተ ኩሽያ ሜጨትተ፤ ናምኡ ቆፍ ደኤይሳቶ፥ ህንተ ዎዛና ጌሽተ። 9 ካዮትተ፥ ዬክተነ አፉፅተ። ህንተ ሚቻይ ዬሆን፥ ህንተ ኡፋይሳይ አዛኖን ላመቶ። 10 ጎዳ ስንꬃን ህንተናተꬃ ካዉሽተ፤ ህንተና ꬎቁ ꬎቁ ኦꬃና።

11 ታ እሻቶ፥ እሶይ እሱዋ ዝግሮፕተ። ባ እሻ ዝግረይነ እያ ቦላ ፕርደይ ህገ ዝግረስነ ህገ ቦላ ፕርዴስ። ኔኒ ህገ ቦላ ፕርድኮ ህገ ቦላ ፕርደይሳ ግዳሳፐ አትሽን፥ ህገ ፖለይሳ ግዳካ። 12 ህገ እመይነ ፕርደይ ፆሳ ፃላላ። አሻናዉነ ꬋይሳናዉ ዳንዳኤይ እያ። ያትን፥ ነ አሳ ቦላ ፕርደይ ኔኒ ኦኔ?

13 ህንተ፥ “ኑኒ ሀች ዎይኮ ዎንቶ ያ ካታማ ዎይኮ ሀ ካታማ ባና፤ ያን ላይꬅ ኡታና፤ ዛልእድ ዎꬍሳና” ያገይሳቶ፥ ስእተ። ሌም 27:1. 14 ዎንቶ አይብ ሀናኔኮ ህንተ ኤረከታ። ህንተ ደኦይ ዋናነኮ ኤረይ ኦኔ? ህንተ ጉꬃ ዎደ በንትድ ꬋይያ አካ መላ። 15 ሄሳ አግድ፥ “ጎዳይ ጊኮ ኑኒ ዳና፤ ሀይሳ ዎይኮ ሄሳ ኦꬃና” ያጋናዉ በሴስ። 16 ሽን ህንተ ሀእ ኦቶርተታነ ጬቀተታ። ሄሳ መላ ጬቆ ኡባይ ኢታ።

17 ሄሳ ግሾ፥ ሎኦባ ኦꬃናዉ ኤርሸ ኦꬆና ኡራስ ሄስ ናጋራ።