1 ህንተኖ፥ ዱረቶ፥ ህንተ ቦላ ኢታ መቶይ ያ ግሾ ዬክተነ ዘሌልተ። 2 ህንተ ሻሎይ ቡቅስ፤ ህንተ አፍላይካ ብላን ሜተትስ። ማቶ 6:19. 3 ህንተ ዎርቃይነ ህንተ ብራይ ሽእስ። ሄ ሽአይ ህንተ ቦላ ማርካ ግዳና። እ ህንተ አሳተꬃ ታማዳ ማና። ህንተ ሀ ዉርዳ ቃማታን ህንተዉ ሻሎ ዳጋዬታ። 4 ህንተ ጋደን ኦꬅ ፔእዳ አሳ ኡነ ሚሽያ ቃንፅበከታ። ሄስ ህንተ ቦላ ዋሴስ። ሄ አሳታ ዋሶይ ዎልቃማ ጎዳ ሀይꬃን ስኤትስ። ዛረ 24:14-15. 5 ሀ ሳአን ህንተ ኡሎ ፃላላስ ቆፕድ፥ እንጀን ደእደታ። ሹካስ ጊገትዳ መሄዳ ህንተና ꬍክደታ። 6 ህንተራ ኤቀታናዉ ዳንዳኦና ፅሎ አሳ ቦላ ፕርድደታ እያ ዎꬍደታ።

7 ታ እሻቶ፥ ጎዳይ ያና ጋካናዉ ገንጭተ። ጎሻንቾይ ቶርቸ እራይነ ስላ እራይ ያና ጋካናዉ ገንጭድ አልኦ ካꬃ ናግድ ዋት ጋꬅ ኤክያኮ ቆፕተ። 8 ሄ ጎሻንቹዋዳ ህንተካ ገንጭተ። ጎዳ ዩሳይ ማታትዳ ግሾ ኡፋይሳን ናግተ።

9 ታ እሻቶ፥ ፆሳይ ህንተ ቦላ ፕርዶና መላ እሶይ እሱዋ ቦላ ዙዙሞፍተ። ፕርደይስ ፐንገን ኤቅስ። 10 ታ እሻቶ፥ ዋያን ገንጭዳ፥ ጎዳ ሱንꬃን ኦድዳ ናበታ ሌምሶ ኦꬅድ ኤክተ። 11 ዳንዳአን ገንጭዳይሳታ ኑኒ አንጀትዳይሳታ ጎስ። እዮብ ዋንድ ገንጭዳኮ ህንተ ስእደታ። ጎዳይ ዉርሰꬃን እያ ዋት ማድዳኮ በእደታ። እ ማሮትነ ቃይ ኩምዳ ጎዳ ግድያ ግሾ ሄሳ ኦꬅስ።እዮ 1:21-22፤ 2:10፤ ማዝ 103:8.

12 ሽን ኡባፈ ስን፥ ታ እሻቶ፥ ሳሉዋን ግድን ዎይኮ ሳአን ግድን ዎይኮ ሀራ አይብንካ ጫቆፍተ። ፆሳ ፕርዳን ህንተ ገሎናዳ ህንተ ኦዳይ ኤ ግድኮ፥ “ኤ” ጊተ፤ አካይ ግድኮ፥ “አካይ” ጊተ። ማቶ 5:34-37.

13 ህንተ ግዶን መቶ ኤክያ ኦንካ ደእኮ ፆሳ ዎሶ። ኡፋይትያ ኦንካ ደእኮ ጋላታን የፆ። 14 ህንተፈ ሀርገትያ ኦንካ ደእኮ ዎሳ ኬꬃ ጭማታ ፄጎ። ኤንቲ ጎዳ ሱንꬃን ሻማሆ ዛይተ ትይድ እያዉ ፆሳ ዎሶ። ማቶ 5:34-37. 15 አማኖን ዎስዳ ዎሳይ ሀርጋንቹዋ ፓꬃና። ጎዳይ እያ፥ ሀርግያፈ ደንꬃና፤ እ ናጋራ ኦꬅዳባ ግድኮካ ጎዳይ እያ ማራና። 16 ሄሳ ግሾ፥ ህንተ ፓፃና መላ ህንተ ናጋራ እሶይ እሱዋስ ፓፅተነ እሶይ እሱዋስ ዎስተ። ፅሎ አሳ ዎሳይ ዎልቃማ ኦሶ ኦꬄስ። 17 ኤልያስ ኑ መላ አሰ። እር ሳአን ቡኮና መላ ምንꬅድ ፆሳ ዎስን ሄꬑ ላይꬅነ ኡሱፑን አጌና ሳአን እር ቡክቤና። 1 ካዎ 17:1፤ 18:1. 18 ዛሪድ እ ፆሳ ዎስን ሳሎፐ እር ቡክስ፤ ሳእካ ካꬅ ዶልሰስ። 1 ካዎ 18:42-45.

19 ታ እሻቶ፥ ህንተፈ ኦንካ ቱማ ኦግያፐ ቡትኮ፥ ሀራይ እያ ቱማኮ ዛርኮ፥ 20 ናጋራንቹዋ እያ ባላ ኦግያፐ ዛርያ ኦንካ፥ እያ ሸምፑዋ ሀይቆፐ አሸይሳነ እያ ዳሮ ናጋራስ ማሮታ እመይሳ ኤሮ። ሌም 10:12፤ 1 ጰፅ 4:8.