ጰፅሮስ ፃፍዳ
ኮይሮ ኪታ
ጋꬃ ቆፋ
ሀዋርያ ጰፅሮስ ፃፍዳ ኮይሮ ኪታይ፥ “ዶረትዳ ፆሳ አሳታ” ጌተትድ ፄገትዳይሳታስነ ጉꬃ ኢሰን ፑደሀ ባጋን ላለትዳ አማንያ አሳሳ። ሀ ኪታይ ፃፈትዳ ጋሶይ፥ አማኖ ጋሶን መቶይነ ዋየይ ጋክዳ አሳ ምንꬃናሳ። ሀ ማፃፋ ፃፈይ፥ እያ ሀይቁዋ፥ እያ ደንዱዋ፥ እያ ናምአንꬆ ዩሳ ኦድያ የሱስ ክርስቶሳ ዎንገላ ቃላ ኤንታ አኬክሴስ። የሱስ ክርስቶሳ ደኡዋ ሌምሶ ኦꬅ ፄልድ፥ መቶ ዳንዳአን ካንꬃና መላ ኤንታ ቆፍሴስ። ሄሳራ ጋꬅድ፥ መቶይ ኤንታ አማኑዋ ፓጨይሳነ የሱስ ክርስቶሲ ቆንጭያ ጋላስ በሲያ ዎይቶ ኤንቲ ኤካናዉ ደኤይሳ ሀሳይሴስ።
ፃፈይ፥ ኤንቲ መቶ ዳንዳአና መላ ምንꬅ ስሚድ፥ ክርስቶሳ ካልያ አሳት ደኤይሳዳ ኤንቲ ዳና መላ ቆፍሴስ።
ማፃፋ አይፈ ቆፋታ
ሳሮꬆ (1:1-2)
ፆሳይ ኑስ እምዳ አቶተꬃ (1:3-12)
ጌሻተꬃን ዱሱ (1:13—2:17)
ክርስቶሳ ዋይያ ሌምሶ (2:18-25)
መቶ ዎደ አማንያ አሳ ሀኖታ (3:1—4:19)
ጭማታስነ ናአተꬃታስ እመትዳ ዞረ (5:1-11)
ሞይዞ ሳሮꬆ (5:12-14)
1
1 ታኒ፥ የሱስ ክርስቶሳ ሀዋረይ ጰፅሮስ፤ ጳንፆሳን፥ ጋላትያን፥ ቃጳዶቃን፥ ኢሰንነ ብታነን በታንቾዳ ላለትድ ደእያ ፆሳይ ዶርዳ፥ አሳስ ሀ ዳብዳብያ ፃፋስ። 2 የሱስ ክርስቶሳስ ህንተ ኪተታና መላነ እያ ሱꬃን ጌያና መላ፥ ፆሳ አዋይ ባ ካሰ ኤራን ዶርዳይሳታስነ ጌሻ አያናን ጌይዳ፥ ህንተዉ አꬎ ኬሀተꬃይነ ሳሮተꬃይ ግዶ።
ꬋዮና ኡፋይስ
3 የሱስ ክርስቶሳ ሀይቆፐ ደንꬅድ ባ ግታ ማሮተꬃን ናምአንꬆ የለተꬃነ ꬋዮና ኡፋይሳ እምዳ ኑ ጎዳ የሱስ ክርስቶሳ አዋይ፥ ፆሳይ ጋላተቶ። 4 ቃስ ፆሳይ ህንተዉ ꬋዮና፥ ኢቶናነ ቡቆና ላታ ሳሎን ጊግስስ። 5 ሄ ላታይ ዎደ ዉርሰꬃን ቆንጫናዉ ደእያ አቶተꬃስ ፆሳ ዎልቃን አማኖን ህንተዉ ናገትድ ደኤስ።
6 ሀእ ጉꬃ ዎደስ ህንተ ዱማ ዱማ ፓጨን ኡንኤትኮካ ሄሳን ኡፋይትተ። 7 ሄ ፓጨይ ህንተና ጋክዳይ፥ ታማን የግን ꬋይያ ዎርቃፈ ህንተ አማኖይ አꬎነ ቱማ ግደይሳ በሳናሳ። ሄ ፓጨትዳ አማኑዋን የሱስ ክርስቶሲ ቆንጭያ ዎደ ጋላታ፥ ቦንቾነ ሳባ ህንተ ኤካና። 8 ህንተ የሱሳ በእቤከታ፥ ሽን እያ ሲቀታ። ህንተ ሀእ እያ በእቦናባ ግድኮካ፥ እያ አማነታ። ቃስ ኦዳን ቆንጭሳናዉ ዳንዳኤቶና ኡፋይሳንነ ቦንቾን ኩምደታ። 9 ህንተ አማኖን ናግያ ህንተ ሸምፑዋ አቶተꬃ ኤካና።
10 አꬎ ኬሀተꬃ ባጋራ ህንተዉ ጊግዳ ሀ አቶተꬃባ ናበት ኤራናዉ ግታ ኮሻንነ ናጎን ኮይዶሶና። 11 ኤንታን ደእያ ክርስቶሳ አያናይ እያ ዋያባነ ሄሳፈ ጉየ ያና ቦንቹዋባ ካሰትድ ማርካትሸ፥ አዉደ ዎይኮ ዋንድ ሀናኔኮ አኬካን ፕልግዶሶና። 12 ናበት ኦድዳ ትንብተይ ባንታዉ ግዶናሽን፥ ህንተዉ ግደይሳ ፆሳይ ህንተዉ ቆንጭስስ። ሀእ አሳይ ህንተዉ ኦድዳ ዎንገላ ሳሎፐ ኪተትዳ ጌሻ አያና ዎልቃን ህንተዉ ኦድዶሶና። ኪታንቾትካ ሄሳ በአናዉ አሞትዶሶና።
ጌሻተꬃን ደእተ
13 ሄሳ ግሾ፥ ኦሶስ ህንተና ጊግስተ፤ ህንተና ሃርተ። የሱስ ክርስቶሲ ቆንጭያ ዎደ ህንተ ኤካና አꬎ ኬሀተꬃ ኡፋይሳን ናግተ። 14 ፆሳ ናይታዳ እያዉ ኪተትተ፤ ህንተ ካሰ ኤሮና ኦꬅዳ ኢታ አሙዋ ካሎፍተ። 15 ሽን ህንተና ፄግዳ ፆሳይ ጌሽ ግድዳይሳዳ ህንተካ ህንተ ዱሳ ኡባን ጌሽ ግድተ። 16 ጌሻ ማፃፋን፥ “ታኒ ጌሽ ግድዳ ግሾ ህንተካ ጌሽ ግድተ” ጌተትድ ፃፈትስ። ሌወ 11:44-45፤ 19:2.
17 አሳ ሶምኦ በኦና እያ ኦሱዋዳ ፕርድያ ፆሳ፥ “ኑ አዋዉ” ግድ ፄግያባ ግድኮ፥ ሀ ሳኣ እማꬃተꬃ ዱሳ ያሻን ደእተ። 18 ህንተ፥ ህንተ አዋታፐ ላትዳ ፓꬆና ደኡዋፐ ዎዘትዳይስ፥ ꬋይያ ብራን ዎይኮ ዎርቃን ግዶናይሳ ኤሬታ። 19 ቦረይ ዎይኮ ቦርሶይ ባይና ዶርሳ ሱꬃዳ አልኦ ግድዳ ክርስቶሳ ሱꬃን ዎዘትደታ። 20 ፆሳይ አላመይ መታናፐ ካሰ ክርስቶሳ ዶርስ፥ ሽን ሀ ዉርሰꬃ ዎድያን ክርስቶስ ህንተ ግሾ ቆንጭስ። 21 ህንተ አማኖይነ ህንተ ኡፋይሳይ ፆሳን ግዳና መላ እያ ሀይቆፐ ደንꬅድ፥ ቦንችዳ ክርስቶሳ ባጋራ ፆሳን አማነታ።
22 ህንተ ቱማተꬃስ ኪተትድ ህንተናተꬃ ጌሽደታ። ህንተ እሶይ እሱዋ ዎዛናፐ ሲቀታ፥ ሽን ሀእካ ቱማ ዎዛናፐ ምንꬅድ ሲቅተ።
23 ህንተ ናምአንꬆ የለትዳይ ꬋይያ ዘረꬃፈ ግዶናሽን፥ መርናዉ ደእያ ፆሳ ቃላን ꬋዮና ኮቻፈ የለትደታ። 24 ፆሳ ቃላይ፥
“አስ ኡባይ ማታ መላ፤
እያ ቦንቾ ኡባይ ጪሻ መላ።
ማታይ መሌስ፥ ጪሻይካ ቆለቴስ። እሳ 40:6-8.
25 ሽን ጎዳ ቃላይ መርናዉ ደኤስ”
ያጌስ። ህንተዉ ኦደትዳ ዎንገላ ቃላይ ሀይሳ።