1 ካናነን ኦላ ሜዘትቦና እስራኤለ አሳ ፓጫናዉ ጎዳይ ካናነን አሽዳ አሳይ ሀይሳታ። 2 እ ሄሳ ኦꬅዳይ ሀይሳፈ ካሰ ኦላ ሜዘትቦና እስራኤለ የለተꬃ ኦላ ሂላ ታማርሳናሳ። 3 ሄሳትካ እቻሹ ፍልስፄመ ሀላቃታ፥ ካናነታ፥ ስዶናታነ ባኣል-አርሞና ዙማፐ ዶምድ ሀማታ ጋካናዉ ልባኖሰ ዙማ ቦላ ደእያ ህወታ። 4 ጎዳይ ሙሰ ባጋራ ካሰ እስራኤለ ማይዛታስ እምዳ ኪታ ኤንቲ ኪተትያኮነ ኪተቶናኮ ፓጫናዉ ኤንታ ከሶና አግስ። 5 ያትን፥ እስራኤለ አሳይ ካናነታራ፥ ህተታራ፥ አሞረታራ፥ ፓርዘታራ፥ ህወታራነ ያቡሰታራ እስፈ ደእዶሶና። 6 ኤንታ ማጫ ናይታ ባንታዉ ኤክዶሶና፤ ባንታ ማጫ ናይታ ኤንታ አደ ናይታስ እምዶሶና። ያትድ ኤንታ ፆሳታ ጎይንዶሶና።

7 እስራኤለ አሳይ ጎዳ ስንꬃን ኢታባ ኦꬅዶሶና። ኤንቲ ጎዳ ባንታ ፆሳ ዶግድ፥ ባኣለነ አሼራ ጌተትያ ፆሳታ ጎይንዶሶና። 8 ሄሳ ግሾ፥ ጎዳ ሀንቆይ እስራኤለ አሳ ቦላ ኤፅስ። ጎዳይ ማሰጰፆመ ካዋ ኩሻን-ርሻታይም ኤንታ ሃራና መላ አꬅድ እምን፥ ኤንቲ እያዉ ሆስፑን ላይꬅ ሃረትዶሶና።

9 ሽን እስራኤለ አሳይ ጎዳኮ ዋስዳ ዎደ ኤንታ አሽያ፥ ካለባ ካሎ እሻ ቃናዘ ናኣ ጎቶንያላ ደንꬅስ። 10 ጎዳ አያናይ እያ ቦላ ዎꬍን፥ እ እስራኤለ ቦላ ፕርደይሳ ግድስ። እ ኦላስ ከይዳ ዎደ ጎዳይ ማሰጰፆመ ካዋ ኩሻን-ርሻታይማ እያዉ አꬅድ እምን ፆንስ። 11 ያትን፥ ቢታይ ኦይታሙ ላይꬅ ዎፑ ግድ ደእስ። ሄሳፈ ጉየ፥ ቃናዘ ናአይ ጎቶንያል ሀይቅስ።

12 እስራኤለ አሳይ ዛሪድ ጎዳ ስንꬃን ኢታባ ኦꬅዶሶና። ሄሳ ግሾ፥ ጎዳይ ሞአበ ካዎይ ኤግሎን እስራኤለ ቦላ ዎልቃታናዳ ኦꬅስ። 13 ኤግሎን አሞነታነ አማለቃታ ሺሽድ እስራኤለ አሳ ኦል ፆንድ፥ ዛምባ ካታማ እያርኮ ኦይክስ። 14 ያትን፥ እስራኤለ አሳይ ሞአበ ካዋ ኤግሎናስ ታማነ ሆስፑን ላይꬅ ሃረትዶሶና።

15 ሽን እስራኤለ አሳይ ጎዳኮ ዋስዳ ዎደ ኤንታ አሽያ፥ ብንያመ ኮቸ ግድዳ ጌራ ናኣ ናኦዳ፥ ሀድርሳ ኩሸን ኦይሳ ደንꬅስ። እስራኤለ አሳይ ናኦዳ ሞአበ ካዋ ኤግሎናኮ ጊራራ ኪትስ። 16 ናኦድ ናምኡ ባጋራ ቃራትዳ እስ ዋꬋ ማሸ ጊግስድ ኡሻቻ ባጋን ባ ማኡዋ ጋርሳን ዳንጭስ። 17 ሄሳፈ ጉየ፥ ዳሮ ኦርደ ግድዳ ሞአበ ካዋ ኤግሎናስ ጊራ ኤፍድ እሚስ። 18 ናኦድ ጊራ ካዋስ እምዳፐ ጉየ፥ ጊራ ቶክድ ብዳ አሳ ሞይዝስ። 19 ሽን ናኦድ ጋልጋላ ማታን ደእያ ማሰትዳ ሹቻታ ማታፐ ኤግሎናኮ ጉየ ስም ብድ፥ “ካዋዉ፥ ታ ነዉ ኦድያ እስ ፁር ደኤስ” ያግስ።

ካዎይ፥ “ስእ ጋ” ያግስ። እያ ናገይሳት ኡባይ ካረ ከይዶሶና።

20 ሄ ዎደ ካዎይ ፖቅያ ቦላ እስ ክፍልያን ባርካ ኡትዳሽን፥ ናኦድ እያኮ ሺቅድ፥ “ፆሳይ ነዉ ኪትዳባይ ደኤስ” ያግን፥ ካዎይ ባ ኡትዳ በሳፈ ደንድ ኤቅስ። 21 ናኦድ ባ ሀድርሳ ኩሽያ የድድ፥ ኡሻቻ ባጋ ፄሳን ደእያ ማሻ ሾድድ፥ ካዋ ኡሉዋን ድርግም ኦꬅስ። 22 ማሻ ቱይተይ አቶና ኡሎ ግዶ ገልድ፥ ዞኩዋራ ካንꬅ ከይስ። ሞꬎይ ካምዳ ግሾ ናኦድ ማሻ ካዋ ኡሉዋፐ ሾድቦና። 23 ሄሳፈ ጉየ፥ ናኦድ ካረ ከይድ፥ ክፍልያ ፐንግያ ጎርድድ እያ ቦላ ቁልፕስ።

24 ናኦድ ብዳፐ ጉየ አይለት ይድ፥ ፐንገይ ጎርደትዳይሳ በእድ፥ “ካዎይ ግዶ ክፍልያን ሼሻስ ኡቶና አገና” ያግድ ቆፕዶሶና። 25 ኤንቲ ሳለታና ጋካናዉ ናግዶሶና። ሽን ካዎይ ፐንግያ ዶዮና እፅን፥ ቁልፐ ኤክድ ፐንግያ ዶይድ፥ ባንታ ጎዳይ ሀይቅድ፥ ዉይገን ኩንድዳይሳ በእዶሶና።

26 ኤንቲ ያን ኤቅድ ናግሽን፥ ናኦድ ከስ ኤክድ ኤቃ ሹቻታ ማታራ አꬍድ ሳኢራ ባቃትስ። 27 እ ብድ ደረይ ዳርያ ኤፍሬማ ቢታ ጋክዳ ዎደ እስራኤለ አሳይ ኦላስ ሺቃና መላ ሞይዘ ፑንን፥ አሳይ እያ ካልድ ዱገ ዎꬍዶሶና። 28 እ ኤንታኮ፥ “ታና ካልተ፤ ጎዳይ ህንተ ሞርከታ፥ ሞአበታ ህንተ ኩሸን አꬅድ እሚስ” ያግስ። ኤንቲ እያ ካል ዎꬍድ፥ ዮርዳኖሰ ሻፋ ፕንያ በሳ ኦይክዶሶና። ሞአበ አሳፐ እስ አስካ ያራ አꬎና መላ ተቅዶሶና። 29 ሄ ዎደ ሞአበ አሳፐ ታሙ ሙኩሉ ግድያ ዶረትዳ ምኖ ኦላንቾታ ዎꬍዶሶና፤ እስ አስካ ከስ ኤክቤና። 30 ሄ ጋላስ እስራኤለ አሳይ ሞአበ አሳ ፆንዶሶና። ቢታይ ሆስፑን ታሙ ላይꬅ ዎፑ ግድ ደእስ።

31 ናኦዳፐ ጉየ፥ አናታ ናአይ ሳምጋር ደንድድ፥ ፍልስፄመ አሳፐ ኡሱፑን ፄቱ አሳ ቦሩ ላግያ ብራታ ፃምአን ዎꬍድ እስራኤለ አሳ አሽስ።