1 ጎዳ ኪታንቾይ ጋልጋላፐ ቦክማ ብድ፥ እስራኤለ አሳኮ ሀይሳዳ ያግስ፤ “ታኒ ህንተና ግብፀፈ ከሳዳ በን ህንተ ማይዛታስ እማና ጋዳ ጫቅዳ ቢታ ህንተና ገልሳዳ፥ ‘ታኒ ህንተራ ጫቅዳ ጫቁዋ መንꬅከ፤ 2 ህንተ ሀ ቢታን ደእያ አሳታራ ጫቆፍተ፤ ኤንታ ያርሾ በሳ ላልተ’ ያጋስ። ሽን ህንተ ታዉ ኪተትበከታ፤ አይስ ሄሳ ሀንደቲ? 3 ሄሳ ግሾ፥ ታኒ ኤንታ ህንተ ስንꬃፈ ጎድከ፤ ኤንቲ ህንተዉ ሞርከ ግዳና፤ ኤንታ ፆሳት ህንተዉ ፅሄ ግዳና” ያግስ። 4 ጎዳ ኪታንቾይ እስራኤለ አሳስ ሄሳ ኦድዳ ዎደ አሳይ ባንታ ቃላ ꬎቁ ኦꬅድ ዬክዶሶና። 5 ያትድ ሄ በሳ ቦክማ *ቦክማ፦ እብራወꬆ ዶናን ሀ ሱንꬃ ብርሸꬃይ ዬከይሳታ ጉሱ። ያግድ ሱንꬅድ ያን ጎዳስ ያርሽዶሶና።

6 እያሱይ እስራኤለ አሳ የድዳፐ ጉየ፥ አሳይ እሶይ እሶይ ባና ጋክዳ ላታ ቢታ ኤካናዉ ብስ። 7 እያሱይ ፓፃ ደእያ ላይꬃንነ ጎዳይ እስራኤለ አሳስ ኦꬅዳ ግታ ኦሶ ኡባ በእዳ ጭማት ደእያ ዎደ አሳይ ጎዳስ ኪተትዶሶና።

8 ጎዳ አይለይ፥ ናወ ናአይ እያሱይ ላይꬃይ ፄታነ ታማ ግድን ሀይቅስ። 9 ኤንቲ እያ ጋኣሳ ዙማፐ ፑደሀ ባጋን፥ ኤፍሬማ ገዘ ቢታን፥ ትምናት-ሳራሀ ጌተትያ በሳን እያ ላታ ቢታን ሞግዶሶና። 10 ሄ የለተꬃ ኡባይ ሀይቅድ ባንታ ማይዛታን ጋሄትዶሶና። ሄሳፈ ጉየ ጎዳ ዎይኮ ጎዳይ እስራኤለ አሳስ ኦꬅዳባ ኤሮና ሀራ የለተꬅ ደንድስ።

11 ሄሳፈ ጉየ፥ እስራኤለ አሳይ ጎዳ ስንꬃን ኢታባ ኦꬅዶሶና፤ ባኣለ ኤቃ ምስለታ ጎይንዶሶና። 12 ግብፀ ቢታፈ ኤንታ ከስዳ ጎዳ፥ ባንታ ማይዛታ ፆሳ አግዶሶና። ኤንታ ዩሹዋን ደእያ አሳ ኤቃታኮ ስሚድ፥ ኤንታዉ ጎይንዶሶና፤ ሄሳን ጎዳ ሀንቀꬅዶሶና። 13 ቃስ ጎዳ አግድ፥ ባኣለነ አስታሮተ ኤቃ ጎይንዶሶና። 14 ያትን፥ ጎዳ ሀንቆይ እስራኤለ አሳ ቦላ ኤፅስ፤ ቦንቀይሳት ኤንታ ቦንቃና መላ ኦꬅስ። ኤንታ ዩሹዋን ደእያ ሞርከታስ አꬅድ እሚስ። ያትን፥ ኤንቲ ባንታ ሞርከታራ ኤቀታናዉ ዳንዳእቦኮና። 15 ኤንቲ ኦለታናዉ ከይያ ዎደ ኡባን፥ ጎዳይ ካሰ ኤንታዉ ኦድዳይሳዳነ ጫቅዳይሳዳ ኤንቲ ፆነታና መላ እ ኤንታ ቦላ ደንድስ። ያትን፥ ኤንቲ ዳሮ ኡንኤትዶሶና።

16 ያትን፥ ጎዳይ አይሰይሳታ ኤንታዉ ደንꬅን፥ ኤንቲ እስራኤለ አሳ ቦንቀይሳታ ኩሸፐ አሽዶሶና። 17 ግዶሽን እስራኤለ አሳይ ሃረይሳታስ ኪተትቦኮና፤ ጎዳስ አማነቶና እፅድ ሀራ ፆሳታ ጎይንዶሶና። ኤንታ አዋት ጎዳስ ኪተትድ ሄመትዳ ኦግያ አግድ ሀራ ሶ ስምዶሶና። 18 ጎዳይ ኤንታዉ አይሰይሳታ ደንꬅዳ ዎደ ኡባን እ አይሰይሳታራ እስፈ ግድድ ሄ አይሰይስ ፓፃ ደእያ ላይꬃ ኡባን ኤንታ ሞርከታ ኩሸፐ አሽስ። ኤንቲ ኡንአንነ መቶን ግድድ ጎዳኮ ዋስያ ዎደ ኡባን ጎዳይ ኤንታዉ ቃቴስ። 19 ሽን አይሰይስ ሀይቅዳፐ ጉየ፥ አሳይ ጉየ ስሚድ፥ ካሰ ኤንታ አዋት ኦꬅዳ ኢታፐ አꬍዳ ኢታ ኦꬅዶሶና። ኤንቲ ሀራ ፆሳታኮ ስሚድ፥ ኤንታዉ ጎይንዶሶና። ባንታ ኢታ ኦሱዋነ ጌላ ኦግያ አጎና እፅዶሶና። 20 ጎዳይ እስራኤለ አሳ ቦላ ይሎ ኤፅድ፥ “ሀ አሳይ ታኒ ኤንታ ማይዛታስ ጫቅዳ ጫቁዋ መንꬅዳ ግሾነ ታዉ ኪተቶና እፅዳ ግሾ፥ 21 እያሱይ ሀይቅያ ዎደ ቢታ ቦላ አትዳ ካዎተꬃታፐ እሱዋካ ታኒ ኤንታ ስንꬃፈ ጎዳዳ ከስከ። 22 እስራኤለ አሳይ ካሰ ባንታ ማይዛታዳ ታ ኦግያ ካልያኮነ ካሎናኮ ፓጫናዉ ታኒ ሀ አትዳ ካዎተꬃታ ጎኤታና” ያግስ። 23 ሄሳ ግሾ፥ ጎዳይ ሄ ካዎተꬃት ቢታፈ ጎደቶና ጋምአና መላ ኦꬅስ። እ ኤንታ ኤለስድ ጎድ ከስቤና፤ ኤንታ እያሱስ አꬅድ እምቤና።