1 እያሱይ ሀይቅዳፐ ጉየ እስራኤለ አሳይ፥ “ካናነ ቢታ ኦላናዉ ኑ ኮቻታፐ ኮይሮትድ ከያናይ ኦኔ?” ያግድ ጎዳ ኦይችዶሶና።

2 ጎዳይ፥ “ይሁዳ ኮቻይ ኮይሮትድ ከዮ። ታኒ ቢታ እያ ኩሸን አꬃዳ እማስ” ያግስ።

3 ይሁዳ አሳይ ባንታ እሻታ፥ ስሞና ኮቻታ፥ “ኑኒ ካናነታ ኦላና መላ ኑና ግሾን ጋክዳ ቢታ ኑራ የꬍተ። ኑካ ህንተና ግሾን ጋክዳ ቢታ ህንተራ ባና” ያግስ። ስሞና ኮቻይ ይሁዳ ኮቻራ እስፈ ኦላናዉ ብስ። 4 ጎዳይ ካናነታነ ፓርዘታ ኤንታ ኩሸን አꬅድ እምን፥ ቤዘቃ ካታማን ታሙ ሙኩሉ አሳ ዎꬍዶሶና። 5 ቤዘቃ ካታማን ካዋ አዶን-ቤዘቃ ደምድ፥ እያራ ኦለትድ ካናነታነ ፓርዘታ ፆንዶሶና። 6 አዶን-ቤዘቅ ባቃትያ ዎደ ኤንቲ የደꬅ ኦይክድ፥ እያ ኩሽያነ እያ ቶሁዋ ዎጋ ብራታ ቃንፅዶሶና።

7 አዶን-ቤዘቅ፥ “ኩሸነ ቶሆ ዎጋ ብራታ ታኒ ቃንፅዳ ላፑን ታሙ ካዎት ታ ጋይታፐ ዎꬍዳ ቲፍያ ማፅድ ሞሶና። ታኒ ኤንታ ቦላ ኦꬅዳይሳዳ ፆሳይ ታ ቦላ ኦꬅስ” ያግስ። እያ የሩሳላመ ኤህን ያን ሀይቅስ።

8 ይሁዳ አሳይ የሩሳላመ ኦል ኦይክድ አሳ ማሻን ዎꬍድ፥ ካታማ ታማን ፁግዶሶና። 9 ሄሳፈ ጉየ፥ ይሁዳ አሳይ ደረይ ዳርያ ቢታን፥ ነገባ መላ ቢታንነ ጋꬋን ደእያ ካናነታ ኦላናዉ ብዶሶና። 10 ካሰ ቅርያት-አርባ ጌተትያ ከብሮና ካታማን ደእያ ካናነታ ኦልድ ሰሳያ፥ አክማናነ ታልማያ ጌተትያ ኮቻታ ፆንዶሶና።

11 ያፐ ደንድድ ይሁዳ አሳይ ደብራ ካታማን ደእያ አሳ ኦላናዉ ብዶሶና። ደብራ ካታማይ ካሰ ቅርያት-ሰፈራ ጌተቴስ። 12 ካለብ፥ “ቅርያት-ሰፈራ ኦልድ ኦይክያ ኡራስ ታኒ ታ ናእዉ አክሶ እማና” ያግስ። 13 ካለባ ካሎ እሻ ቃናዛ ናአይ ጎቶንያል ሄ ካታማ ኦልድ ኦይክን፥ ካለብ ባ ናእዉ አክሶ እያዉ እሚስ።

14 አክሳ ጎቶንያላ ገልያ ዎደ፥ እ አዋይ እዉ ጋደ እማናዳ ዎሳና መላ ጎቶንያል እዮ ዞርስ። እያ ባቁሎ ቦላፈ ዎꬍሽን ካለብ ታ ናተ፥ “አይ ኮያይ?” ያግድ ኦይችስ።

15 እያ፥ “ታዉ ዎይቶ እማ። ኔኒ ካሰ ታዉ እምዳ ቢታይ ቃኤ ግድዳ ግሾ ሃꬃ ፑልቶታ ታዉ እማርክ” ያጋሱ። ካለብ ቆሞ ፑልቱዋነ ጋርሳ ፑልቱዋ እዉ እሚስ።

16 ሙሰይ ቦሉዋ ቀናት ኮቻት ይሁዳ አሳራ ዛምባ ካታማ ጌተትያ እያርኮ ካታማፐ ደንድድ አራዳ ካታማፐ ዱገሀ ባጋራ፥ ነገባን ደእያ ይሁዳ መላ ቢታ ብድ ያን ደእያ አሳ ግዶን ኡትዶሶና። 17 ይሁዳ አሳይ ስሞና አሳራ እስፈ ብድ፥ ፃፋታ ካታማን ደእያ ካናነታ ፆንድ ካታማ ኩመꬅ ꬋይስድ፥ ሄ ካታማ ሆርማ *ሆርማ፦ ሀ ሱንꬃ ብርሸꬃይ ꬋይሶ ጉሱ። ግድ ሱንꬅዶሶና። 18 ይሁዳ አሳይ ጉጅድ ጋዛ፥ አስቃሎና፥ ኤቅሮናነ ኤንታ ዩሹዋን ደእያ ጉታታ ኦይክዶሶና። 19 ጎዳይ ይሁዳ አሳራ ደእያ ግሾ፥ ደረይ ዳርያ ቢታ ላትዶሶና። ሽን ደምባ ቢታን ደእያ አሳታስ ብራታፐ ኦሰትዳ ኦላ ፓራ ጋረት ደእያ ግሾ፥ ይሁዳ አሳይ ኤንታ ጎድድ ከሳናዉ ዳንዳእቦኮና። 20 ሙሰይ ኪትዳይሳዳ፥ ከብሮና ካታማ ካለባስ እምን ካለብ አናቀ ኮቸ ግድዳ ሄꬑ ኮቻታ ጎድድ ከስስ። 21 ሽን ብንያመ ኮቻት የሩሳላመን ደእያ ያቡሰታ ጎድድ ከስቦኮና። ሄ ዎደፐ ዶምን ያቡሰት ብንያመ ኮቻታራ እስፈ የሩሳላመን ደእዶሶና።

22 ቃስ ዮሰፋ ኮቻት ቤተለ ካታማ ኦልዶሶና፤ ፆሳይ ኤንታራ ደኤስ። 23 ዮሰፋ ኮቻት ካሰ ሎዛ ጌተትያ ቤተለ ካታማ ዎችያ አሳታ ኪትዶሶና። 24 ኤንቲ ካታማፐ ከይያ እስ አድያ ደምድ፥ “ካታማ ግዶ ዋንድ ገላናዉ ዳንዳኤትያኮ ኑና በሳ፤ ኑኒ ነዉ ኬሀና” ያግዶሶና። 25 እ ኤንታ በስን ካታማን ደእያ አሳ ማሻን ቡꬅዶሶና፤ ሽን ሄ አድያነ እያ ሶ አሳ ኡባ አሽዶሶና። 26 ጉይፐ ሄ አደይ ህተታ ቢታ ብድ፥ ያን ካታማ ኬፅድ ሎዛ ግድ ሱንꬅስ። ሀች ጋካናዉ ሄ ካታማይ ሄ ሱንꬃን ፄገቴስ።

27 ምናሰ ኮቻት ቤት-ሳና፥ ታናካ፥ ዶራ፥ ይብላማ ማግዶነ ኤንታ ዩሹዋን ደእያ ጉታታን ደእያ አሳታ ጎድድ ከስቦኮና። ያትን፥ ካናነት ያን ዱሱ ኦይክዶሶና። 28 እስራኤለ አሳይ ምንዳ ዎደ ካናነታ ባንታዉ ዎልቃን ኦስስዶሶና፤ ሽን ኤንታ ኩመꬅ ቢታፈ ከስድ ጎድቦኮና። 29 ኤፍሬማ ኮቻትካ ገዘራ ካታማን ደእያ ካናነታ ጎድድ ከስቦኮና፤ ያትን፥ ካናነት ያን ኤንታራ ደእዶሶና። 30 ዛብሎና ኮቻት ቅትሮናንነ ናህላላን ደእያ አሳታ ጎድድ ከስቦኮና፤ ያትን፥ ካናነት ያን ኤንታራ እስፈ ደእዶሶና። ሽን ዛብሎና ኮቻት ኤንታ ባንታዉ ዎልቃን ኦስስዳሶና። 31 አሴራ ኮቻት አኮን፥ ስዶናን፥ አህላባን፥ አክዚባን፥ ሄልባን፥ አፌቃንነ ረሆባን ደእያ አሳታ ጎድ ከስቦኮና። 32 ካናነት ከዮና አትዳ ግሾ አሴራ ኮቻት ኤንታራ ያን እስፈ ደእዶሶና። 33 ንፍታለመ ኮቻት ቤት-ሳሜሳንነ ቤት-አናታን ደእያ አሳታ ጎድ ከስቦኮና፤ ሽን ካናነታራ ያን እስፈ ደእዶሶና። ቤት-ሳሜሳነ ቤት-አናታ አሳታ ባንታዉ ዎልቃን ኦስስዶሶና። 34 አሞረት ዳነ ኮቻታ ደረይ ዳርያ ቢታ የደꬅዶሶና፤ ኤንቲ ደምባ ቢታ ዎꬎና መላ ተቅዶሶና። 35 አሞረት ሄሬሳ ደርያን፥ ኤሎናንነ ሻአልብማን ዱሱ ኦይክዶሶና፤ ሽን ዮሰፋ ኮቻት ምን ምን ብድ ባንታዉ ዎልቃን ኦስስዶሶና። 36 አሞረታ ቢታ ዛዋይ ሰላአ ማታን ደእያ አክራብማ ፑደꬃ ከዬስ።