1 እያሱይ እስራኤለ አሳ ኡባ ሴከማን ፄግስ። ጭማታ፥ ሀላቃታ፥ ዳይናታነ ኦላ ሞጮናታ ፄግን፥ ኤንቲ ፆሳ ስንꬃን ሺቅዶሶና። 2 እያሱይ አሳኮ፥ “ጎዳይ እስራኤለ ፆሳይ ሀይሳዳ ያጌስ፤ ‘በን ህንተ አዋት ኤፍራፂሳ ሻፋፐ ሄፍንꬃን፥ ሀራ ፆሳታስ ጎይንሸ ደእዶሶና። ኤንታፈ እሶይ አብራሃመነ ናኮራ አዋ ታራ። 3 ሽን ህንተ አዋ አብራሃመ፥ ኤፍራፂሳ ሻፋፐ ሄፍንꬃን ደእያ ቢታፈ ፄጋዳ፥ ካናነ ቢታን ካለꬃስ። እያ ኮቻ ዳርሳስ፤ ይሳቃካ እያዉ እማስ። 4 ይሳቃስ ያይቆባነ ኤሳዌ እማስ። ኤሳዌ፥ ደረይ ዳርያ ሳይረ ቢታ ላትሳስ፥ ሽን ያይቆብነ እያ ናይት ግብፀ ብዶሶና።

5 “ ‘ጉየፐ ሙሳነ አሮና ኪታዳ ግብፀ ቢታ ጋዶን ሾጫስ፤ ዉርሰꬃን ህንተና ከሳስ። 6 ህንተ አዋታ ግብፀፈ ከስዳ ዎደ ዞኦ አባኮ ብዶሶና። ግብፀት ፓራታንነ ፓራ ጋረታን ህንተ አዋታ ጉየ ዛራናዉ የደꬅዶሶና። 7 ኤንቲ ታኮ ዋስዳ ዎደ ኤንታ ግዶንነ ግብፀታ ግዶን ꬉማ የጋስ። ያታዳ፥ አባይ ኤንታ ቦላ ስማናዳነ ኤንታ ምታናዳ ኦꬃስ። ታኒ ግብፀታ ቦላ ኦꬅዳባ ህንተ ህንተ አይፈን በእደታ። ህንተ መላ ቢታን ዳሮ ዎደ ደእደታ። 8 ሄሳፈ ጉየ፥ ዮርዳኖሰ ሻፋፐ ዶሎሀ ባጋን ደእያ አሞረታ ቢታ ህንተና ኤሀስ። ኤንቲ ህንተና ኦልዶሶና፥ ሽን ታ ህንተዉ ፆኖ እማስ። ታ ኤንታ ꬋይስን፥ ህንተ ኤንታ ቢታ ላትደታ። 9 ሄሳፈ ጉየ፥ ሞአበ ቢታ ካዎይ፥ ስፎራ ናአይ ባላቅ፥ ደንድድ፥ እስራኤለታራ ኦለትስ። እ ህንተና ባዳና መላ ብኦራ ናኣ፥ ባላማ ፄግስ። 10 ሽን ታ ባላማ ስአብከ፤ እ ህንተና አንጃና መላ ኦꬃዳ፥ ህንተና ባላቃ ኩሽያፐ አሻስ። 11 ህንተ ዮርዳኖሰ ሻፋ ፕንድ፥ እያርኮ ይደታ። እያርኮ አሳይ፥ አሞረት፥ ፓርዘት፥ ካናነት፥ ህተት፥ ገርገሰት፥ ህወትነ ያቡሰት ህንተራ ኦለታናዉ ደንድዶሶና፥ ሽን ታ ህንተና ፆንሳስ። 12 ዮርዳኖሰ ሻፋፐ ዶሎሀ ባጋን ደእያ ናምኡ አሞረ ካዎታ ቦላ ኦꬅዳይሳዳ፥ ካዠ ኪታዳ ኤንታና ህንተ ስንꬃፈ ጎዳ ከሳስ። ሄስ ሀንዳይ፥ ህንተ ማሻና ዎይኮ ህንተ ዶንግያና ግደና። 13 ህንተ ቄፅ ከስቦና ቢታነ ህንተ ኬፅቦና ካታማታ ታኒ ህንተዉ እምን ደኤታ። ሀእ ህንተ ቶክቦና ዎይነ አይፍያነ ሻማሆ አይፍያ ሜታ’ ” ያጌስ።

14 ቃስካ እያሱይ ካልድ፥ “ጎዳ ቦንችተ፤ ፖሎ አማነተꬃንነ ሱረ ዎዛናን እያዉ ኪተትተ። ህንተ ማይዛት ኤፍራፂሳ ሻፋፐ ሄፍንꬃንነ ግብፀን ጎይንዳ ኤቃታ አግድ ጎዳ ጎይንተ። 15 ህንተ ጎዳ ጎይናናዉ ኮዮና እፅኮ፥ ህንተ አዋት ኤፍራፂሳ ሻፋፐ ሄፍንꬃን ደእሸ ጎይንዳ ኤቃታ ግድን፥ ዎይኮ ሀእ ህንተ ደእያ አሞረታ ኤቃታ ግድን፥ ህንተ ጎይናና ፆሳ ሀች ዶርተ። ሽን ታኒ፥ ታ ሶ አሳራ ኑ ጎዳ ጎይናና” ያግስ።

16 አሳይ ዛሪድ፥ “ጎዳ አግድ፥ ሀራ ኤቃ ፆሳታ ጎይናናይስ ኑፐ ሃኮ። 17 ኑ ጎዳ ፆሳይ ኑናነ ኑ አዋታ ግብፀ አይለተꬃፈ ከስስ፤ እ ኦꬅዳ ግታ ማላታታ በእዳ። ኑ ካንꬅድ አꬍዳ ቢታ ኡባን ጎዳይ ኑና ናግስ። 18 ጎዳይ አሞረታነ ሄ ቢታን ደእያ ሀራ ካዎተꬃታ ኑ ስንꬃፈ ጎድድ ከስስ። ሄሳ ግሾ፥ እ ኑ ፆሳ ግድያ ግሾ ኑ እያ ጎይናና” ያግዶሶና።

19 እያሱይ ዛሪድ፥ “ጎዳይ ጌሽነ ቃናትያ ፆስ *ቃናትያ ፆስ፦ ፆሳይ ባ ቦንቹዋ ሀራራ ሻከቶና ፆስ ዎይኮ ባርካ ደእያ ዎይኮ ዱማ ፆስ ግደይሳ በሳናሳ። ግድያ ግሾ፥ ህንተ እያ ጎይናናዉ ዳንዳኤከታ። እ ህንተ ናቁዋ ዎይኮ ህንተ ናጋራ አቶ ጌና። 20 ህንተ ጎዳስ ዞኮ ዛሪድ፥ ኤቃ ፆሳታ ጎይንኮ፥ እ ህንተዉ ካሰ ሎኦ ግድኮካ ስሚድ ህንተና ቆሀናነ ꬋይሳና” ያግስ።

21 አሳይ ዛሪድ፥ “ኑ ሀራ ኤቃ ፆሳታ ጎይኖኮ፤ ኑኒ ጎዳ፥ እያ ፃላላ ጎይናና” ያግስ።

22 እያሱይ፥ “ህንተ ጎዳ ጎይናና ግዳይሳስ ህንተ፥ ህንተ ሁጰን ማርካ” ያግስ።

ኤንትካ፥ “ኤ ኑኒ ማርካ” ያግዶሶና።

23 እያሱይ ዛሪድ፥ “ህንተ ግዶን ደእያ ኤቃ ፆሳታ ድግተ፤ ህንተ ዎዛና ጎዳኮ፥ እስራኤለ ፆሳኮ ዛርተ” ያግስ።

24 ኤንትካ፥ “ኑኒ ጎዳ፥ ኑ ፆሳ ጎይናና፤ እያ ኪታ ናጋና” ያግዶሶና።

25 ሄ ጋላስ እያሱይ፥ ሴከማን አሳይ ፆሳራ ጫቃና መላ ኦꬅስ። ኤንቲ ካላና ህግያ ኤንታዉ ጊግስድ፥ 26 ህገ ማፃፋን ፃፍስ። ሄሳፈ ጉየ፥ እስ ግታ ሹች ኤክድ፥ ጎዳ ዱንካንያ ማታን ደእያ ዎላ ጋርሳን ኤስስ። 27 እያሱይ አሳኮ፥ “ሀ ሹቻ በእተ፤ እ ኑ ቦላ ማርካ። ጎዳይ ኑስ ኦድዳባ ኡባ ሀ ሹቻይ ስእስ። ህንተ ፆሳ ቦላ ማካልኮ፥ ሀ ሹቻይ ህንተ ቦላ ማርካ ግዳና” ያግስ።

28 ያትድ፥ እያሱይ አሳ ኡባ ሞይዝስ። አሳ ኡባይ ባንታ ላታ ቢታ ስሚድ ብዶሶና። 29 ጎዳ አይለይ፥ ናወ ናኣ እያሱይ ፄታነ ታሙ ላይꬃን ሀይቅስ። 30 አሳይ እያ ጋኣሳ ዙማፐ ፑደሀ ባጋን፥ ደረይ ዳርያ ኤፍሬማን ደእያ እያ ላታ ቢታን፥ ትምናት-ሳራን እያ ሞግዶሶና።

31 እያሱይ ፓፃ ደእዳ ዎደ ኡባን እስራኤለ አሳይ ጎዳ ጎይንዶሶና። እያፐ ጉየ፥ ፆሳይ እስራኤለ አሳስ ኦꬅዳ ኦሶ ኡባ ባንታ አይፈን በእዳ ጭማታ ዎደ ኡባን ጎዳ ጎይንዶሶና።

32 እስራኤለ አሳይ ግብፀ ቢታፈ ኤክ ከይዳ፥ ዮሰፋ መቀꬃ ሴከማን ሞግዶሶና። ሄ በሳ ያይቆብ ሴከማ አዋ ሀሞራ ናይታፐ እስ ፄቱ ብራ ሳንትመን ሻምስ። ሄ ቢታ ጉየፐ ዮሰፋ ኮቻይ ላትዶሶና።

33 አሮና ናአይ አላዛር ሀይቅድ፥ እያ ናኣ ፕንሃሳስ እመትዳ ደረይ ዳርያ ኤፍሬማ ቢታን ደእያ ግብአን ሞገትስ።