1 ዳሮ ዎደ ጋካናዉ ጎዳይ እስራኤለ አሳ ኤንታ ዩሹዋን ደእያ ሞርከታፐ ሸምፕስስ። ሄ ዎደ እያሱይ ጭምን፥ ላይꬅ ሱገትስ። 2 እያሱይ፥ እስራኤለ አሳ ኡባ፥ ጭማታ፥ ሀላቃታ፥ ዳይናታነ ቶራ ሞጮናታ እስፈ ፄግድ፥ “ታኒ ሀእ ዳሮ ጭማስ። 3 ጎዳይ፥ ህንተ ፆሳይ ሀ ቢታን ደእያ ካዎተꬃታ ኦል ፆናና መላ ዋትድ ህንተና ማድዳኮ በእደታ። 4 ዶሎሀን ዮርዳኖሰ ሻፋ፥ ዉሎሀን መደትራነ አባ ጋካናዉ ደእያ ኦይከትዳ ቢታነ ኦይከቶና ቢታ ኡባ ህንተ ኮቻስ ሻካ እማስ። 5 ጎዳይ፥ ህንተ ፆሳይ ኤንታ ህንተ ስንꬃፈ ጎድድ ከሳና። ጎዳይ፥ ህንተ ፆሳይ ህንተዉ ጫቅዳይሳዳ ህንተ ኤንታ ቢታ ላታና።

6 “ሙሰ ህገ ማፃፋን ፃፈትዳ ኡባ ምንድ ናግተነ ፖልተ፤ እያፐ ኡሻች ዎይኮ ሀድርስ ጎፕተ። 7 ህንተ ግዶን አትዳ ደርያራ ዋላከቶፍተ። ኤንታ ፆሳታ ሱንꬃ ፄጎፕተ ዎይኮ ኤንታ ሱንꬃን ጫቆፍተ። ኤንታዉ ኦꬆፍተ ዎይኮ ኤንታዉ ጎይኖፍተ። 8 ሽን ሀች ጋካናዉ ህንተ ኦꬅዳይሳዳ ጎዳ ህንተ ፆሳስ አማነትተ።

9 “ጎዳይ፥ ግታነ ምኖ ካዎተꬃታ ህንተ ስንꬃፈ ጎድድ ከስስ። ህንተራ ሀች ጋካናዉ ኦንካ ኤቀታናዉ ዳንዳእቤና። 10 ጎዳይ፥ ህንተ ፆሳይ ህንተዉ ጫቅዳይሳዳ፥ እ ህንተዉ ኦለትያ ግሾ፥ ህንተፈ እስ አስ ሙኩሉ አሳ የደꬃና። 11 ጎዳ፥ ህንተ ፆሳ ኡባ ዎደ ሲቅተ። 12 ሽን ህንተ ጉየ ስሚድ፥ ህንተ ግዶን አትዳ ደርያራ ዋላከትኮ፥ ህንተ ኤንታ ማጫሳ፥ ቃስ ኤንቲ ህንተ ማጫሳ ኤክድ ኤንታራ ቃሸትኮ፥ 13 ጎዳይ፥ ህንተ ፆሳይ ሄ ደርያ ህንተ ስንꬃፈ ጎድድ ከሶናይሳ ኤርተ። ጎዳይ፥ ህንተ ፆሳይ ህንተዉ እምዳ ሀ ሎኦ ቢታፈ ህንተ ꬋያና ጋካናዉ፥ ኤንቲ ህንተዉ ፅሄነ ግተ ግዳና። ኤንቲ ህንተ ዞኩዋስ ልሶ፥ ህንተ አይፍያስ አጉንꬁ ግዳና።

14 “ሀእ ታ ሀይቃናዉ ማታስ። ጎዳይ፥ ህንተ ፆሳይ ህንተዉ እማና ግድ ጫቅዳ ሎኦባ ኡባፈ እሶይካ አትቦናይሳ ህንተ ኡባይ፥ ህንተ ዎዛናንነ ሸምፑዋን ኤሬታ። እ ህንተዉ እማና ግድ ጫቅዳባፐ እሶይካ አቶና ኡባይ ፖለትስ። 15 ጎዳይ፥ ህንተ ፆሳይ ህንተራ ጫቅዳ ጫቁዋ ህንተ መንꬅድ፥ ሀራ ፆሳታስ ኦꬅኮነ ጎይንኮ፥ ጎዳ ሀንቆይ ህንተ ቦላ ኤፃና። 16 ጎዳይ፥ ህንተ ፆሳይ ህንተዉ እማና ግድ ጫቅዳ ሎኦባ ኡባ አሾና ፖልዳይሳዳ፥ እ ህንተዉ እምዳ ሀ ሎኦ ቢታፈ ህንተና ꬋይሳና ጋካናዉ ኢታ ኡባ ህንተ ቦላ ኤሀና። እ ህንተዉ እምዳ ሎኦ ቢታፈ ኤለስድ ህንተ ꬋያና።”