ጌሻ ማፃፋ አይሰይሳታ ማፃፋ 5

ፆኖ ገረርስ

1 ሄ ጋላስ ድቦራነ አብኖማ ናአይ ባራቅ ሀ ማዝሙርያ የፅዶሶና።

2 ሀላቃት እስራኤለ አሳ ካለꬅዳ ግሾ፥

አሳይካ ባና አꬅድ እምዳ ግሾ፥

ጎዳ ጋላትተ።

3 ህንተኖ ካዎቶ፥ ስእተ፤

ህንተኖ ሃረይሳቶ፥ ሀይዝተ፤

ታኒ ጎዳስ የፃና።

እስራኤለ ፆሳ ጋላታና።

4 አቤት ጎዳዉ፥ ኔኒ ሳይረ ዙማፐ ደንድያ ዎደ፥

ኤዶመ ቢታፈ ነ ከይያ ዎደ፥

ቢት ቃፅስ፤ ሳሎፐ እር ቡክስ፤

ሃꬅ ሻራፐ ጎግስ።

5 ሲና ጎዳ፥

እስራኤለ ፆሳ ስንꬃን፥

ደረት ቃፅዶሶና፤

6 አናታ ናኣ ሳምጋራ ዎደነ

ያኤላ ዎደ ኦገይ ዶገትስ፤

ዛልአንቾት ዩሾ ኦገራ ቦሶና።

7 ድቦር እስራኤለ አሳስ፥

አዮ ግዳዳ ደንዳና ጋካናዉ፥

እስራኤለ ጉታት ባይሳትዶሶና፤

8 እስራኤለ አሳይ አላጋ ፆሳታ ዶርዳ ዎደ፥

ቢታ ቦላ ኦል ደንድስ።

ኦይታሙ ሙኩሉ እስራኤለ ኦላንቾታ ግዶን፥

እስ ጎንዳለይ ዎይኮ እስ ቶር በንትቤና።

9 ታ ዎዛናይ እስራኤለ ቶራ ሞጮናታራ፥

አሳ ግዶፈ ዶሳን ባንታና አꬅድ፥

እምዳይሳታራ ደኤስ።

ጎዳ ጋላትተ፤

10 ህንተኖ፥ ቦꬃ ሀረታ ቶገይሳቶ፥

ሎኦ ግላስያ ቦላ ኡትድ ድንጫከተይሳቶ፥

ኦገ ጋፃራ ሄመተይሳቶ ሀይሳ ስእተ።

11 ሃꬃ ኦላታ ማታን፥

ሺቅዳ አሳ የꬃ ስእተ።

ኤንቲ ጎዳ ፆኑዋ የፆሶና፤

እስራኤለ አሳ ፆኑዋ ኦዶሶና።

ሄሳፈ ጉየ፥ ጎዳ አሳይ

ካታማ ፐንገታኮ ዎꬍዶሶና።

12 ድቦራ፥ ደንዳ! ደንዳ!

ደንዳ! ደንዳዳ ማዝሙረ የፃ።

አብኖማ ናአዉ፥ ባራቃ፥ ደንዳ!

ነ ድእዳባ ኤካዳ ያ።

13 ሄሳፈ ጉየ፥ አትዳ አሳት፥

ሀላቃታኮ ዎꬍዶሶና።

ጎዳ አሳት ኦለታናዉ ጊግድ

ባራቃኮ ይዶሶና።

14 አማለቃ ኮቻት በን ደእዳ በሳን

ደእያ ኤፍሬማ አሳት ይዶሶና።

ብንያመ አሳት ኤንታ ካልዶሶና።

ማክራፐ ሀላቃት፥

ዛብሎናፐ ካዎተꬃ

ፃምአ ኦይከይሳት ይዶሶና።

15 ይሳኮራ ሀላቃት ድቦራራ ደኦሶና፤

ኤ፥ ይሳኮረ አሳይ ባራቃራ ይዶሶና፤

ኤንቲ እያ ካልድ፥ ዛንጋራ ገልዶሶና።

ሽን ሮቤላ ኮቻት ቆፋን ሻከትድ፥

ባንታ ዎዛናን ሄትዶሶና።

16 ኤንቲ አይስ አትዶና?

ዶርሳታ ሄማናሰዬ?

ሮቤላ ኮቻት ቆፋን ሻከትድ፥

ባንታ ዎዛናን ሄትዶሶና።

17 ጋደ ኮቻት ዮርዳኖሰ ፕንꬃን አትስ፥

ዳና ኮቻት ማርካበታን አትዶሶና።

አሴራ ኮቻት ባንታ ደእያሶን፥

አባ ጋፃን አትዶሶና።

18 ዛብሎና ኮቻት፥

ባንታና ሀይቆስ አꬅድ እምዶሶና።

ንፍታለመ ኮቻት፥

ቶራ ደንባን ባንታና አꬅድ እምዶሶና።

19 ማግዶ ፑልቶታ ማታን ታናካን፥

ካዎት ኦለትዶሶና።

ካናነ ካዎት ያን ኦለትድ፥

ብራ ዎይኮ ሀራባ ድእቦኮና።

20 ሳሎፐ ፆልንቶት ኦለትዶሶና፤

ባንታ ዩሻን ስሳራ ኦልዶሶና።

21 ቅሶና ሻፋይ ኤንታ ኤፍስ፤

በንፐ ደእያ ቅሶን ኤንታ ሾክስ።

ታ ሸምፐ፥ ምና፤ ስን ሆርዶፋ።

22 ፓራት አዳርስሸ ይዶሶና፥

ባንታ ቶሁዋን ቢታ ጊርሶሶና።

23 ጎዳ ኪታንቾይ ሀይሳዳ ያግስ፤

“መሮዛ ባድተ!

ያን ደእያ አሳ ኢስድ ባድተ!

ኤንቲ ጎዳ ማዳናዉ ይቦኮና፤

እያ ዎልቃማ ሞርከታ ኦላናዉ ከይቦኮና።”

24 ቄና አስ ግድዳ ሄቤራ ማችያ፥

ያኤል ማጫሳ ኡባፈ አንጀትዳሮ ግዶ።

ዱንካነን ደእያ ማጫሳ ኡባፈ፥

እያ አንጀትዳሮ ግዶ።

25 ስሳር እዮ ሃ ኦይችን ማꬅ እማሱ፤

ሎኦ ኦጎሮን መቅዳ ማꬅ ኤሀሱ።

26 ባ ሀድርሳ ኩሸን ዱንካነ ꬍሸ፥

ባ ኡሻቻ ኩሸን

ኦሳንቾታ ናርቃ ኦይካሱ።

ስሳራ ሁጰን ꬍሻሱ፤

እያ ሀይꬃ ካረራ ካንꬃ ከሳሱ።

27 እ ቶሁዋ ጋርሳን ኩንድስ፤

እ ቶሁዋ ማታን ዞሄትስ።

እ ቶሁዋ ጋርሳን ኩንድስ፤

ሄ ኩንድዳ በሳን ሀይቅስ።

28 ስሳራ አይያ ማስኮተራ ካረ ፄላሱ፤

“ታ ናኣ ፓራ ጋረይ አይስ ጋምእዴ?

ፓራት አይስ ኤለስድ ስምቦኮና?”

ያጋዳ ባና ኦይቻሱ።

29 እ ጭንጫ ማጫሳት እ ኦይሻ ዛርዶሶና፤

ሽን እያ ባ ቆፋን ዛራ ዛራዳ ያጋሱ።

30 “ኤንቲ ድኦ ደምድ ሻከቶና አጎኮና፤

እስ እስ አደስ ኢስ ገላኦይ ዎይኮ

ናምኡ ጌላኦት ጋኮና አገና።

ኤንቲ ስሳራስ ሎእያ ማኦ እማና፤

ታዉካ ቆን ማእያ፥

አሌቀትዳ ማኦ ኤሀና” ያጋሱ።

31 አቤት ጎዳዉ፥ ነ ሞርከት ኡባይ ሀይሳዳ ሀይቆ፤

ሽን ነና ዶሰይሳት ዎንታ ፃልቀዳ ጶሎ።

ሄሳፈ ጉየ፥ ቢታይ ኦይታሙ ላይꬅ ዎፑ ግድ ደእስ።