1 እስራኤለ አሳይ ጎዳ ስንꬃን ዛሪድ ኢታባ ኦꬅዶሶና። ሄሳ ግሾ፥ ጎዳይ ኤንታ ምድያመ አሳስ አꬅድ እምን ላፑን ላይꬅ ኤንታ ሃርዶሶና። 2 ምድያመ አሳይ እስራኤለ አሳ ኡንኤꬅን፥ ኤንታፈ አታናዉ ደረ ቦላ፥ ጎንጎሎንነ ሆምኦን ባንታ ካꬃ ቆስዶሶና። 3 እስራኤለ አሳይ ካꬅ ዘርያ ዎደ ኡባን፥ ምድያመ አሳይ አማለቃ አሳራነ ዶሎሀ ባጋ አሳራ ይድ ኤንታ ኦሎሶና። 4 ኤንቲ ሄ ቢታን ዱንካንድ፥ ጋዛ ጋካናዉ፥ ቢታ ቦላ ዶልዳባ ኡባ ꬋይሶሶና። ዶርሰ፥ መሄነ ሀረ ላግድ ኤፍያ ግሾ፥ እስራኤለ አሳስ አይባካ አሾኮና። 5 ባንታ መህያነ ባንታ ዱንካንያ ኤክድ፥ ቦለይ ያዳ ዳርድ ዮሶና። ኤንታነ ኤንታ ግማለታ ታይባናዉ ዳንዳኤተና፤ ኤንቲ ይሸ ቢታ ꬋይሶሶና። 6 እስራኤለ አሳይ ምድያመታ ጋሶን ዳሮ መቶትዶሶና፤ ማደ ደማናዉ ጎዳኮ ዋስዶሶና።

7 ምድያመታ ጋሶን እስራኤለ አሳይ ጎዳኮ ዋስዳ ዎደ፥ 8 ጎዳይ ኤንታዉ እስ ናበ ኪትን፥ ናበይ ኤንታኮ፥ “ጎዳይ እስራኤለ ፆሳይ ሀይሳዳ ያጌስ፤ ግብፀፈ፥ አይለተꬃ ቢታፈ ታ ህንተና ከሳስ። 9 ታኒ ህንተና ግብፀ አሳ ኩሸፐነ ኡንኤꬅያ አሳ ኡባ ኩሸፐ አሻስ። ህንተ ስንꬃፈ ኡንኤꬅያ አሳ ጎዳዳ ኤንታ ቢታ ህንተዉ እማስ። 10 ታኒ ህንተና፥ ‘ታኒ ጎዳ ህንተ ፆሳ፤ ህንተ ኤንታ ቢታ ላትዳ አሞረታ ፆሳታ ጎይኖፍተ’ ያጋስ። ሽን ህንተ ታ ቃላ ስኦና እፅደታ” ያግስ።

11 ሄሳፈ ጉየ፥ ጎዳ ኪታንቾይ ኦፍራ ጌተትያ በሳን ደእያ አበዜራ አድያ እዮኣሳ ዎላ ጋርሳን ኡትስ። ሄ ዎደ እዮኣሳ ናአይ ገድዮን ምድያመ አሳፐ ቆሰተድ ዎይነ ጉምእያ በሳን ግስተ ቡኬስ። 12 ያን ጎዳ ኪታንቾይ እያዉ ቆንጭድ፥ “ላ ነኖ፥ ምኖ ኦላንቻዉ፥ ጎዳይ ኔራ ደኤስ” ያግስ።

13 ገድዮን፥ “ታ ጎዳዉ፥ ጎዳይ ኑራ ደእያባ ግድኮ ሀ መቶ ኡባይ ኑና አይስ ጋክዴ? ኑ አዋት፥ ‘ጎዳይ ኑና ግብፀ ቢታፈ ከስስ’ ያግድ ኑስ ኦድዳ ማላልስያ እያ ኦሶት ኡባይ አዉን ደኢ? ሽን ሀእ ጎዳይ ኑና ኩመꬅ አግስ፤ ምድያመ አሳስ አꬅድ እሚስ” ያግስ።

14 ሄሳፈ ጉየ ጎዳይ እያኮ ስሚድ፥ “ነዉ ደእያ ሀ ዎልቃን ባዳ እስራኤለ አሳ ምድያመ ኩሸፐ አሻ። ነና ኪተይ ታና” ያግስ።

15 ገድዮን ዛሪድ፥ “አቤት ጎዳዉ፥ ታኒ እስራኤለ አሳ ዋታዳ አሾ? ታ ያራይ ምናሰ ኮቻ ኡባፈ አꬍዳ ላፋ፤ ታኒ ታ አዋ ሶ አሳ ኡባፈ ጉꬃ” ያግስ።

16 ጎዳይ፥ “ታኒ ኔራ ግዳና፤ እስ አስ ሾጭያ መላ ኔኒ ምድያመ አሳ ሾጫዳ ፆናና” ያግስ።

17 ገድዮን፥ “ኔኒ ታናን ኡፋይትያባ ግድኮ፥ ቱማ ታራ ኦደተይ ኔኒ ጎዳ ግድኮ፥ ነና ኤርስያ ማላ ታና በሳ። 18 ታኒ ጉየ ስማ ባዳ ታ ያርሹዋ ኤሀና ጋካናዉ ሀያና ሀይሳፈ ቦፓ” ያግስ።

ጎዳይ፥ “ኔኒ ስማና ጋካናዉ ታኒ ሀይሳን ናጋና” ያግስ።

19 ገድዮን ሶ ገልድ፥ ኡርገ ዴሽ ሹክድ ካꬅስ፤ ታሙ ክሎ ግራመ ግድያ ꬊለ ኤክድ ኡይꬅ ኡክስ። አሹዋ ጋይታን ዎꬅድ፥ ጫምባ ሻተን ትግድ፥ ዎላ ጋርሳን ኡትዳ ጎዳ ኪታንቹዋስ ሺሽስ። 20 ፆሳ ኪታንቾይ፥ “አሹዋነ ኡይꬃ ሀ ሹቻ ቦላ ዎꬃ፤ ጫምባ እያ ቦላ ትጋ” ያግስ። ገድዮን ኪተትዳይሳዳ ኦꬅስ። 21 ጎዳ ኪታንቾይ ባ ኩሸን ኦይክዳ ፃምኣ ፄራን አሹዋነ ኡይꬃ ቦችን ታም ሹቻ ግዶፈ ከይድ፥ አሹዋነ ኡይꬃ ምስ። ሄሳፈ ጉየ፥ ጎዳ ኪታንቾይ እያ ስንꬃፈ ጌምስ።

22 ገድዮን በእዳይ ጎዳ ኪታንቹዋ ግደይሳ አኬክዳ ዎደ፥ “ጎዳ ፆሳዉ ታና አየ! ታኒ ጎዳ ኪታንቹዋ ታ አይፈን በአስ” ያግስ።

23 ሽን ጎዳይ፥ “ሳሮይ ነዉ ግዶ፤ ያዮፋ! ነ ሀይቃካ” ያግስ። 24 ገድዮን ጎዳስ ያርሾ በሲ ያን ጊግስድ፥ “ጎዳይ ሳሮ ፆሲ” ያግድ ፄግስ። ሄ ያርሾ በሳይ አብኤዜራ ኮቻባ ግድዳ ኦፍራን ሀች ጋካናዉ ኤቅድ ደኤስ።

25 ሄ ቃማ ጎዳይ ገድዮናኮ፥ “ነ አዋ ኮርማታፐ ላፑን ላይꬅ ግድዳ ሎኦ ኮርማ ኤካ። ነ አዋይ ባኣለ ኤቃስ ያርሽያ በሳ ላላ፤ እያ ማታን ደእያ አሼራ ኤቃ ምስልያ መንረꬃ የጋ። 26 ሀ ዙማ ሁጰን ጎዳስ ነ ፆሳስ፥ ሹቻን ያርሾ በሲ ሎይꬃዳ ጊግሳ። ሄሳፈ ጉየ፥ ኔኒ መንረꬅዳ አሼራ ኤቃ ምስልያ ቀረꬃ ኤꬃዳ፥ ሄ ኮርማ ፁሳ ያርሾ ኦꬃዳ ያርሻ” ያግስ። 27 ገድዮን ባ ኦሳንቾታፐ ታማታ ኤክድ፥ ጎዳይ እያዉ ኦድዳይሳዳ ኦꬅስ። ሽን እ ባ አዋ ሶ አሳስነ ካታማን ደእያ አሳስ ያይዳ ግሾ ጋላስ ኦꬃናይሳ አግድ ቃማ ኦꬅስ።

28 ዎንታ ጉራ ካታማ አሳይ ደንድያ ዎደ ባኣለ ኤቃ ያርሾ በሳይ ላለትን፥ እያ ማታን ደእያ አሼራ ምስለይ መቅድ ዎꬍዳይሳ በእዶሶና። ቃስ ሄ በሳን ያርሾ በሲ ጊግዳይሳነ እያ ቦላ ኮርማ ያርሽዳይሳ በእዶሶና። 29 ኤንቲ እሶይ እሱዋ፥ “ላ ሀይሳ ኦꬅዳይ ኦኔ?” ያግድ ኦይችዶሶና። ኤንቲ ሄሳ ፕልግድ በእዳ ዎደ ሄሳ ኦꬅዳይ እዮኣሳ ናኣ ገድዮና ግደይሳ ኤርዶሶና። 30 ሄሳፈ ጉየ፥ ካታማ አሳይ እዮኣሳኮ፥ “ባኣለ ያርሾ በሳ ላልዳ ግሾነ እያ ማታን ደእያ አሼራ ምስልያ መንረꬅድ የግዳ ግሾ ነ ናኣ ሃ ከሳ፤ ኑ እያ ዎꬋና” ያግዶሶና።

31 ሽን እዮኣስ ባ ቦላ ደንድዳ አሳኮ፥ “ህንተ ባኣለስ ሞተተቲ? ዎይኮ ህንተ እያ አሻናዉ ኮዬቲ? ህንተ ግዶፈ እያዉ ሞተትያ አስ ደእኮ፥ ሳእ ዎንታናዉ እ ሀይቆ። ባኣለይ ፆሰ ግድኮ ባ ያርሾ በሳ ላልዳይሳራ እ ባዉ ሞተቶ” ያግስ። 32 ሄ ጋላስ እዮኣስ፥ “ላለትዳይ እያ ያርሾ በሳ ግድያ ግሾ እያራ ባኣለይ ሞተቶ” ያግድ ገድዮና የሩባኣላ ግድ ሱንꬅስ።

33 ሄሳፈ ጉየ፥ ምድያመ፥ አማለቃነ ዶሎሀ ባጋ ቢታ አሳይ እስፈ ሺቅድ፥ ዮርዳኖሰ ሻፋ ፕንድ እዝራኤላ ዛንጋራን ዱንካንዶሶና። 34 ጎዳ አያናይ ገድዮና ቦላ ዎꬍን አብኤዘራ ኮች ግድዳ አሳ ኡባይ ባና ካላና መላ ኤንታ ፄጋናዉ ሞይዘ ፑንስ። 35 ምናሰ ኮቻ ኡባስ ኪታ የድድ፥ ባና ካላና መላ ኤንታ ፄግስስ። ቃስ አሴራ፥ ዛብሎናነ ንፍታለመ ኮቻታስ ኪታ የድን፥ ኤንቲ እያራ ኦላስ ባናዉ ከይዶሶና።

36 ገድዮን ፆሳኮ፥ “ነ ታዉ ቃላ ገልዳይሳዳ እስራኤለ አሳ አሻናዉ ታና ዶርዳባ ግድኮ፥ 37 ሄኮ፥ ታኒ ግስተ ቡክያ ዉዱማን ፓደትዳ ዶርሰ እክሰ ዎꬃና። ሀራ ቢታ ኡባይ መላ ግድድ ሄ እክስያ ቦላ ፃላላ አክ ዎꬍኮ ነ ኦድዳይሳዳ እስራኤለ አሳ ታ ኩሸን አሻናይሳ ታ ኤራና” ያግስ። 38 እ ግዳይሳዳ ሀንስ። ዎንተꬃ ጋላስ ዎንታ ጉራ ደንድድ፥ ዶርሳ እክስያ ጉምእዳ ዎደ እስ ፃሮ ግድያ ሃꬅ እያፐ ከይስ።

39 ቃስ ገድዮን፥ “ሀያና ሀንቀቶፋ፤ ታኒ ነና ጉጃዳካ ሀራ ኦይሾ ኦይቻና። ዶርሳ እክስያ ቦላ ሀራ ማላ በሳና መላ ኦይቻይስ። ሀእ ዶርሳ እክሰይ መላ ግድን ዩሹዋን ደእያ ቢታይ አካትድ ላካናዳ ኦꬃ” ያግስ። 40 ሄ ቃማ ፆሳይ ሄ ማላ ኦꬅስ። ዎንተꬃ ጋላስ ዶርሳ እክሰይ መላ ግድን ቢታ ኡባይ አካትድ ላክስ።