1 ገድዮና ናአይ፥ አብመለከይ ሴከማን ደእያ ባ አየ ዳቦታኮ ብድ፥ ኤንታነ ባ አየ ኮቻታ ሀይሳዳ ያግስ፤ 2 “ሴከማን ደእያ አሳ፥ ‘ገድዮና ላፑን ታሙ ናይት ኡባይ ህንተና ሃርኮ ሎኦዬ? ዎይኮ እስ አስ ሃርኮ ሎኦ?’ ያግድ ኦይችተ። ታኒ ህንተ አሾነ ህንተ መቀꬅ ግደይሳ ዶጎፕተ” ያግስ።

3 እያ አየ ዳቦት ሀ ቃላ ኡባ እያ ግሾ ሴከማ አሳስ ኦድን፥ አብመለከይ ኤንታዉ ዳቦ ግድዳ ግሾ ሴከማ አሳይ እያ ካላናዉ ዶስዶሶና። 4 ኤንቲ ባኣል-ብሪታ ኤቃ ኬꬃፈ ላፑን ታሙ ብራ ሳንትመ ኤክድ እያዉ እምዶሶና።

አብመለከይ ሄ ብራን ኢታ አሳታነ ቦንቀይሳታ ሻምድ ባና ካላናዳ ኦꬅስ። 5 ኦፍራን ደእያ ባ አዋ ሶ ብድ፥ ላፑን ታሙ ባ እሻታ ገድዮና ናይታ፥ እስ ሹቻ ቦላ ጎይርስ። ሽን ገድዮና ናአይ፥ ተሾይ፥ እዮአታም ቆሰትድ ሀይቆና አትስ። 6 ሄሳፈ ጉየ፥ ሴከማ አሳይነ ቤት-ምሎ አሳይ እስፈ ሺቅድ፥ ሴከማን ኤቃ ቱሳ ማታን ደእያ ጎይኖ ዎላኮ ብድ ያን አብመለከ ካዎꬅዶሶና።

7 እዮአታም ሄሳ ስእዳ ዎደ ጋርዛና ደርያ ቦላ ከይድ ባ ቃላ ꬎቁ ኦꬅድ፥ “ህንተኖ ሴከማ አሳዉ፥ ፆሳይ ህንተና ስአና መላ ታ ኦደይሳ ስእተ። 8 እስ ጋላስ ምꬃት ኡባይ ሺቅድ፥ ባንታ ቦላ ካዎ ካዎꬃናዉ ብድ ሻማሆ፥ ‘ሃያ፥ ኑ ቦላ ካዎታ’ ያግዶሶና። 9 ሽን ሻማሆይ፥ ‘ፆሳታነ አሳታ ቦንችስያ ዛይተ እመይሳ አጋዳ ምꬃታ ቦላ ካዎቶ?’ ያግድ ዛርስ።

10 “ያትን፥ ምꬃት ባላሰ ምꬃ፥ ‘ሃያ፥ ኑ ቦላ ካዎታ’ ያግዶሶና። 11 ሽን ባላሰይ፥ ‘ማልኦነ ሎኦ ግድዳ አይፈ እመይሳ አጋዳ ምꬃታ ቦላ ካዎታናዉ ቦ?’ ያግድ ዛርስ።

12 “ያትን፥ ምꬃት ዎይነኮ፥ ‘ሃያ፥ ኑ ቦላ ካዎታ’ ያግዶሶና። 13 ሽን ዎይነይ፥ ‘ፆሳታነ አሳታ ኡፋይስያ ኡሻ እመይሳ አጋዳ ምꬃታ ቦላ ካዎታናዉ ቦ?’ ያግድ ዛርስ።

14 “ያትን፥ ዉርሰꬃን ምꬃት ኡባይ ፁንዱቀኮ፥ ‘ሃያ፥ ኑ ቦላ ካዎታ’ ያግዶሶና። 15 ፁንዱቀይ፥ ‘ህንተ ቱማ ታና ህንተ ቦላ ካዎꬃናዉ ኮይኮ፥ ሃ ይድ ታ ኩያን ሸምፕተ። ሄሳ ህንተ እፅኮ፥ ፁንዱቀ ታሽያፐ ታም ከይድ ልባኖሰ ዝጋ ሞ’ ያግስ።

16 “ህንተ አብመለከ ካዎꬅዳይ ቱማተꬃንነ ሱረተꬃኔ? ገድዮን ህንተዉ ኦꬅዳባ አኬክድ እያ ሶ አሳስ ሎኦ ኩሸ ዛርደቲ? 17 ታ አዋይ ህንተዉ ኦለትዳይሳ አኬክተ፤ ምድያመ አሳፐ ህንተና አሻና ያግድ፥ ባና ሀይቆስ አꬅድ እሚስ። 18 ሽን ህንተ ሀች ታ አዋ ሶ አሳ ቦላ ደንድድ፥ እያ ላፑን ታሙ ናይታ እስ ሹቻ ቦላ ጎይርደታ። ገድዮና አይለፈ የለትዳ አብመለከይ ህንተዉ ዳቦ ግድዳ ግሾ ሴከማን ካዎꬅደታ። 19 ሀእ ስሚድ ገድዮናስነ እያ ሶ አሳስ ህንተ ኦꬅዳ ኦሶይ ቱማተꬃንነ ሱረተꬃን ግድኮ አብመለከራ ኡፋይትተ፤ እካ ህንተራ ኡፋይቶ። 20 ሽን ሄስ ሀኖና እፅኮ አብመለከፐ ታም ከይድ ሴከማነ ቤት-ምሎ አሳ ሞ። ቃስ ሴከማ አሳፐነ ቤት-ምሎ አሳፐ ታም ከይድ አብመለከ ሞ” ያግስ። 21 እዮአታም ባ እሻ አብመለከስ ያይዳ ግሾ ባቃትድ ቤራ ብድ ያን ደእስ።

22 አብመለከይ እስራኤለ ቢታን ሄꬑ ላይꬅ ካዎትስ። 23 ሄሳፈ ጉየ፥ ፆሳይ አብመለከ ግዶንነ ሴከማ አሳ ግዶን ኢታ አያና ኪትን ሴከማ አሳይ አብመለከ ቦላ ማካልዶሶና። 24 ፆሳይ ሄሳ ኦꬅዳይ፥ አብመለከይ ባ እሻታ ዎꬍዳ ግሾነ ኤንታ ዎꬋና መላ ሴከማ አሳይ እያ ምንꬅዳ ግሾሳ። 25 ሴከማ አሳይ ጉꬃ አስ ዶርድ ደርያ ሁጵያን ኡትድ አብመለከ ቦላ ሞርከተꬃን ደንዳና መላ ኦꬅዶሶና። ኤንቲ ኦገራ አꬍያ አሳ ኡባ ቦንቅዶሶና፤ አብመለከይ ሄሳ ስእስ።

26 ሄ ዎደ ኤቤዳ ናአይ ጋል ባ እሻታራ ሴከማ ይን፥ ሴከማ አሳይ እያን አማነትዶሶና። 27 ኡባይ ባንታ ጋደ ብድ ዎይነ ማፅዶሶና፤ ዎይንያ አግድ ግታ ግብራ ጊግስዶሶና። ባንታ ኤቃ ኬꬃ ገልድ ያን ምሸነ ኡይሸ አብመለከ ጫይዶሶና። 28 ኤቤዳ ናአይ ጋል፥ “ኑኒ ሴከማ አሳይ እያዉ ሃረታናዉ አብመለከይ ኦኔ? እ የሩባኣላ ናኣ ግደኔ? ዛቡል ሀ ካታማ ሃራና መላ አብመለከይ ሹምዳይሳ ግደኔ? ሄሳፈ ሴከማ ሼሽ ግድዳ ሀሞረ አሳስ ሃረታና። 29 ሀ አሳ ካለይ ታና ግድያኮ አብመለከ ድጋናሽን። አብመለከ ፄጋዳ፥ ‘ነ ኦላንቾታ ዳርሳ ኤካዳ ኦለታናዉ ሃያ’ ያጋናሽን” ያግስ።

30 ኤቤዳ ናአይ ጋል ግዳይሳ ካታማ ሃርያ ዛቡል ስእዳ ዎደ ዳሮ ይሎትስ። 31 ቆሳን አብመለከኮ አሰ ኪትድ፥ “ኤቤዳ ናአይ ጋልነ እያ እሻት ሴከማ ይድ ያን ደእያ አሳ ነ ቦላ ደንꬆሶና። 32 ሄሳ ግሾ፥ ኔንነ ኔራ ደእያ አሳይ ቃማ ደንድድ እስ በሳን ዙግድ ናግተ። 33 ዎንተꬃ ጋላስ አው ዶልያ ዎደ ኤንቲ ቆፖና ካታማ ኦልተ። ጋልነ እያራ ደእያ አሳይ ህንተና ኦላናዉ ከይያ ዎደ ህንተ ኮይዳ መላ ኤንታ ቦላ ኦꬅተ” ያግስ።

34 አብመለከይነ እያራ ደእያ አሳ ኡባይ ቃማ ደንድድ ሴከማፐ ካረራ ኦይዱ ጩጋን ሻከትድ ዙግዶሶና። 35 አብመለከይነ እያራ ደእያ አሳይ ኤቤዳ ናአይ ጋል ከይድ ካታማ ፐንግያን ኤቅዳይሳ በእድ ቆሰትዳ በሳፈ ከይዶሶና። 36 ጋል አሳ በእዳ ዎደ ዛቡላኮ፥ “ሄኮ፥ አሳይ ደርያ ሁጵያፐ ዎꬌስ” ያግስ።

ዛቡል፥ “ሀይስ ደርያ ኤሾፐ አትሽን፥ አሰ ግደና” ያግድ ዛርስ።

37 ጋል ዛሪድ፥ “ሄኮ፥ አሳይ ደርያስ ግዱዋ ኦይክድ ዎꬌስ፤ ሀራ ጩግ ቃስ ማሮታ ዎላይ ደእያ ኦግያራ ዬስ” ያግስ።

38 ዛቡል ጋላኮ፥ “ ‘ኑኒ እያዉ ሃረታናዉ አብመለከይ ኦኔ?’ ያግዳ ነ ዶናይ ሀእ አዉ ብዴ? ሀይሳቲ ኔኒ ካꬍዳ አሳ ግዶኮናዬ? ሀእ ከያዳ ኤንታራ ኦለታ” ያግስ። 39 ጋል ሴከማ አሳ ካለꬅ ከይድ አብመለከራ ኦለትስ። 40 አብመለከይ የደꬅን ጋል ባቃትስ፤ ካታማ ፐንግያ ጋካናዉ ዳሮት ደሸትድ ኩንድዶሶና። 41 አብመለከይ አሩማን ደእን፥ ዛቡል ጋላነ እያ እሻታ ሴከማፐ የደꬅድ ከስስ።

42 ዎንተꬃ ጋላስ ሴከማ አሳይ ጎሻስ ብዳይሳ አብመለከይ ስእስ። 43 እ ባ አሳ ኤክድ ሄꬑ ጩጋን ሻክድ፥ እስ በሳን ዙግድ ናጋናዳ ኦꬅስ። አሳይ ካታማፐ ከየይሳ በእዳ ዎደ ኤንታ ዎꬋናዉ ቆሰትዳ በሳፈ ከይስ። 44 አብመለከይነ እያራ ደእያ ጩጋይ ስን ዎፅ ብድ፥ ካታማ ፐንግያን ኤቅዶሶና። አትዳ ናምኡ ጩጋይ ጎሻን ደእያ አሳ ኦልድ ዎꬍዶሶና። 45 ጋላስ ኩመꬅ አብመለከይ አሳራ ኦለትድ ኦይክዳፐ ጉየ ካታማን ደእያ አሳ ኡባ ዎꬍስ፤ ካታማ ꬋይስስ፤ ቢታ ቦላ ማፅነ ላልስ።

46 ሴከማ አዱሳ ግምብያ ግዶን ደእያ አሳ ኡባይ ሄሳ ስእዳ ዎደ ባኣል-ባርታ ኤቃ ኬꬃን ደእያ ጎንጎሉዋን ቆሰትዶሶና። 47 አብመለከይ ኤንቲ ያን ሺቅዳይሳ፥ 48 ስእድ እነ እያራ ደእያ አሳ ኡባይ ሳልሞና ደርያ ከይዶሶና። አብመለከይ ካልታ ኤክድ ምꬃ ታሸ ቃንፅድ፥ ባ ሀሽያን ቶክስ። ባራ ደእያ አሳኮ፥ “ታኒ ኦꬅሽን በእዳይሳዳ ህንተ ኤለስድ ኦꬅተ” ያግስ። 49 አሳ ኡባይ ምꬃ ታሸ ቃንፅ ኤክድ፥ አብመለከ ካልስ። ሄ ታሸታ ሳአ ኬꬃ ቦላ ዶርድ አሳይ እያ ግዶን ደእሽን ታማ ኦይꬅዶሶና። እያን ደእያ አሳ ኡባይ ሀይቅዶሶና። ሀይቅዳ አደይነ ማጫሳ ታይቦይ እስ ሙኩሉ ግዳና።

50 አብመለከይ ተሜሳ ብድ ካታማ ተቅድ ኦይክስ። 51 ሄ ካታማ ግዶን እስ ምኖ አዱሳ ግምበይ ደኤስ። ካታማ አሳይ ማጭ፥ አደይ፥ ካለይሳትነ ሀራ አሳ ኡባይ አቶና ዎፅድ አዱሳ ግምብያ ግዶ ገልዶሶና። ፐንግያ ጎርድድ ግምብያ ሁጰ ከይዶሶና። 52 አብመለከይ ኦልሸ አዱሳ ግምብያ ጋክድ ታማን ፁጋናዉ ፐንግያኮ ሺቅስ። 53 ሽን እስ ማጫስያ አብመለከ ሁጰን ዎፃ ማይደ ሆላዳ እያ ጉግያ ጳልቃ የጋሱ። 54 እያ ኦላ ሚሽያ ቶክያ ናአተꬃ ኤለስ ፄግድ፥ “አብመለከ ማጫስ ዎꬍስ ጎናዳ ነ ማሻ ሾዳዳ ታና ዎꬋ” ያግስ። ያግን ናአተꬃይ ጫድን እ ሀይቅስ። 55 እስራኤለ አሳ ኡባይ አብመለከይ ሀይቅዳይሳ በእድ ባ ሶ ሶ ብስ።

56 አብመለከይ ላፑን ታሙ ባ እሻታ ዎꬍድ፥ ባ አዋ ቦላ እ ኦꬅዳ ጎምያ ፆሳይ እያ ቦላ ዛርስ። 57 ፆሳይ ሴከማ አሳ ኢታተꬃ ኡባ ኤንታ ቦላ ዛርስ። ሄሳዳ ሀንድ ገድዮና ናአይ እዮአታም ባድዳ ባደꬃይ ኤንታ ጋክስ።