1 አብመለከይ ሀይቅዳፐ ጉየ፥ ይሳኮራ ኮቸ ግድዳ ዶዳ ናኣ፥ ፑሀ ናአይ ቶል፥ እስራኤለ አሳ አሻናዉ ደንድስ። እ ደረይ ዳርያ ኤፍሬማ ቢታን ሳምራን ደእስ። 2 ቶል እስራኤለ አሳ ላታማነ ሄꬑ ላይꬅ አይስስ። ቶል ሀይቅድ፥ ሳምራን ሞገትስ።

3 ቶላፐ ካልድ፥ ጋላዳ አደይ ያእር ደንድስ። እ እስራኤለ አሳ ላታማነ ናምኡ ላይꬅ አይስስ። 4 እያዉ ሀስታሙ ባቁሎ ቶግያ ሀስታሙ አደ ናይት ደኦሶና። ኤንታዉ ጋላዳ ቢታን ሀስታሙ ካታማት ደኦሶና። ሄ ካታማት ሀች ጋካናዉ ያእራ ካታማታ ጌተትድ ፄገቶሶና። 5 ያእር ሀይቅድ ቃሞናን ሞገትስ።

6 ቃስካ እስራኤለ አሳይ ጎዳ ስንꬃን ኢታባ ኦꬅዶሶና። ኤንቲ ባኣለነ አስታሮታ ኤቃታ፥ ሶረ ፆሳታ፥ ስዶና ፆሳታ፥ ሞአበ ፆሳታ፥ አሞነ ፆሳታነ ፍልስፄመ ፆሳታ ጎይንዶሶና። ኤንቲ ጎዳ አጋግዶሶና፤ እያ ጎይንቦኮና። 7 ጎዳይ እስራኤለ አሳ ቦላ ሀንቀትድ፥ ኤንታ ፍልስፄመ አሳስነ አሞነ አሳስ አꬅድ እሚስ። 8 ሄ ላይꬅ ፍልስፄመትነ አሞነት እስራኤለ አሳ ኡንኤꬅዶሶና። ዮርዳኖሰ ሻፋፐ ዶሎሀ ባጋን፥ አሞረት ካሰ ደእዳ ጋላዳ ቢታን ደእያ እስራኤለ አሳ ኤንቲ ታማነ ሆስፑን ላይꬅ ሃርዶሶና። 9 ቃስካ አሞነ አሳይ ይሁዳ፥ ብንያመነ ኤፍሬማ ኮቻታ ኦላናዉ ዮርዳኖሰ ሻፋ ፕንዶሶና፤ እስራኤለ አሳይ ዳሮ ኡንኤትዶሶና።

10 ሄሳፈ ጉየ፥ እስራኤለ አሳይ፥ “ኑኒ ነና ኑ ፆሳ አግድ፥ ባኣለ ጎይንድ፥ ናጋራ ኦꬅዳ” ያግድ ጎዳኮ ዋስዶሶና።

11 ጎዳይ ኤንታኮ፥ “ግብፀት፥ አሞረት፥ አሞነት፥ ፍልስፄመት፥ 12 ስዶናት፥ አማለቃትነ ሞኣነት ህንተና ኡንኤꬅን፥ ህንተ ታኮ ዋስን፥ ታኒ ህንተና ኤንታ ኩሸፐ አሻብክና? 13 ሽን ህንተ ታና አግድ ሀራ ፆሳታ ጎይንደታ፤ ህዛፐ ታኒ ህንተና አሽከ። 14 ብድ ህንተ ዶርዳ ፆሳኮ ዋስተ። ህንተና መቶይ ጋክያ ዎደ አነ ኤንቲ አሾ” ያግድ ዛርስ።

15 ሽን እስራኤለ አሳይ ዛሪድ ጎዳኮ፥ “ኑኒ ናጋራ ኦꬅዳ። ነ ኮይዳባ ኑ ቦላ ኦꬃ፤ ሽን ሀያና ሀች ኑና አሻ” ያግዶሶና። 16 አላጋ ፆሳታ ባንታ ግዶፈ ድግድ፥ ጎዳ ጎይንዶሶና። ጎዳይ እስራኤለ አሳ ኡንኤተꬃ በእድ ምሸትስ።

17 ሄሳፈ ጉየ፥ አሞነ ኦላንቾት ኦላስ ጊግድ፥ ጋላዳን ሺቅዶሶና። እስራኤለ አሳይ እስፈ ሺቅድ ጋላዳን ምፅጳን ዱንካንዶሶና። 18 ጋላዳ ቢታ ሀላቃት ባንታ ግዶን፥ “አሞነ ኦላንቾታራ ኮይሮትድ ኦላ ጋሄታናይ ኦኔ? ሄ አደይ ጋላዳ ቢታን ደእያ አሳ ኡባስ ሀላቃ ግዳና” ያግዶሶና።