1 ጋላዳ ቢታን ደእያ ዮፍታሄይ ምኖ ኦላንቾ። እያ አዋ ሱንꬃይ ጋላዳ፤ ሽን እያ አይያ ላይማ ማጫስ። 2 ጋላዳ ማችያ እያዉ አደ ናይታ የላሱ። ኤንቲ ድጭድ ጋክዳ ዎደ ባንታ እሻ ዮፍታሄ፥ “ኔኒ ሀራ ማጫሳፐ የለትዳ ናአ ግድያ ግሾ ኑ አዋ አቁዋፐ አይኮካ ላታካ” ያግድ ሶፐ የደꬅዶሶና። 3 ያትን፥ ዮፍታሄይ ባ እሻታፐ ባቃትድ፥ ቶባ ቢታን ደእስ። ያን እ ደእሽን ጉꬃ ዎራንꬖት እያኮ ሺቅድ እያ ካልዶሶና።

4 ጉꬃ ዎደፐ ጉየ አሞነት እስራኤለታራ ኦለትዶሶና። 5 አሞነት እስራኤለታራ ኦለትዳ ዎደ ጋላዳ ቢታ ጭማት ቶባፐ ዮፍታሄ ዛሪድ ኤሀናዉ ብዶሶና። 6 ኤንቲ እያኮ፥ “አሞነታ ኑኒ ኦላና መላ ያዳ ኑስ ሀላቃ ግዳ” ያግዶሶና።

7 ሽን ዮፍታሄይ፥ “ታና እፅድ፥ ታ አዋ ኬꬃፈ የደꬅቤከቲ? ሀእ ህንተና መቶይ ጋክን ታኮ አይስ ይደቲ?” ያግስ።

8 ጋላዳ ጭማት፥ “ግዶሽን ሀእ ኑኒ ኔኮ ስምዳ፤ ኔኒ ኦላ ካለꬃዳ አሞነታ ኑስ ኦላና መላነ ጋላዳ ቢታስ ሀላቃ ግዳና መላ ኮዮስ” ያግዶሶና።

9 ዮፍታሄይ፥ “አሞነታራ ኦለታና መላ ህንተ ታና ጉየ ዛርን፥ ጎዳይ ኤንታ ታ ኩሸን አꬅድ እምኮ፥ ህንተ ቱማ ታና ሀላቃ ኦꬃኔ?” ያግስ።

10 ጋላዳ ጭማት፥ “ጎዳይ ኑ ግዶን ማርካ፤ ኔኒ ግያባ ኑ ኦꬃና” ያግዶሶና። 11 ዮፍታሄይ ጋላዳ ጭማታራ ብስ፤ ኤንቲ እያ ባንታ ሀላቃነ ካለይሳ ኦꬅዶሶና። ዮፍታሄይ ምፅጳን ጎዳ ስንꬃን ዛሪድ ቃላ ገልስ።

12 ዮፍታሄይ አሞነ ካዋኮ አሰ ኪትድ፥ “ኔኒ ኑ ቢታ ኦላና መላ ኑኒ ነዉ አይ ኦꬅዶ?” ያግድ ኦይችስ።

13 አሞነ ካዎይ ዮፍታሄይ ኪትዳ አሳኮ፥ “እስራኤለ አሳይ ግብፀፈ ከይዳ ዎደ አርኖና ሻፋፐነ ያቦቃ ሻፋፐ ግዶን፥ ዮርዳኖሰ ሻፋ ጋካናዉ ደእያ ታ ቢታ ኤክዶሶና። ሀእ ታ ቢታ ታዉ ሳሮን ዛርተ” ያግድ ዛርስ።

14 ዮፍታሄይ ናምአንꬆ አሞነ ካዋኮ አሰ ኪትስ። 15 ኪተትዳ አሳይ፥ “እስራኤለ አሳይ ሞአበ ቢታ ዎይኮ አሞነ ቢታ ኤክቤና። 16 እስራኤለ አሳይ ግብፀፈ ከይዳ ዎደ ባዞ ካንꬅ ብድ፥ ዞኦ አባ ጋክስ፤ ያፐ ቃደሳ ብስ። 17 እስራኤለ አሳይ ኤዶመ ካዋኮ፥ ‘ነ ቢታራ ኑና አꬃርኪ?’ ያግድ አሰ ኪትስ፤ ሽን ኤዶመ ካዎይ አꬆና እፅስ። ሄሳዳካ፥ ሞአበ ካዋኮ ኪትን፥ እካ አꬆና እፅስ፤ ያትን፥ እስራኤለ አሳይ ቃደሳን ጋምእስ።

18 “ዉርሰꬃን ኤንቲ ባዙዋ ካንꬅድ፥ ኤዶመነ ሞአበ ቢታ ጋፃ ኦይክድ፥ ሞአበ ቢታፈ ዶሎሀ ባጋራ ይድ አርኖና ሻፋፐ ሄፍንꬃ ባጋን ዱንካንዶሶና። ሽን አርኖና ሻፋይ ሞአበ ዛዋ ግድዳ ግሾ ሞአበ ባጋ ፕንቦኮና።

19 “ሄሳፈ ጉየ፥ እስራኤለ አሳይ ሀሰቦና ካታማን ደእያ አሞረታ ካዋ ስሆናኮ አሰ ኪትድ፥ ‘ሀያና፥ ነ ቢታራ ኑና አꬃርክ’ ያግድ ኦይችስ። 20 ሽን ስሆነይ እስራኤለ አሳ አማነቶና ግሾ አꬃናዉ ኮይቤና። እ ባ ኦላንቾታ ኤክድ ያሃፃን ዱንካንድ እስራኤለ አሳ ኦልስ። 21 ጎዳይ እስራኤለ ፆሳይ ስሆናነ እያ ኦላንቾታ እስራኤለ አሳ ኩሸን አꬅድ እምን፥ ኤንታ ፆንዶሶና። ያን ደእያ አሞረታ ቢታ ኡባ ላትዶሶና። 22 አርኖና ሻፋፐ ብድ ያቦቃ ሻፋ ጋካናዉ፥ ባዙዋፈ ብድ ዮርዳኖሰ ሻፋ ጋካናዉ ደእያ አሞረታ ቢታ ኡባ ኤክዶሶና።

23 “ሄሳዳ ኦꬅድ ጎዳይ፥ እስራኤለ ፆሳይ ባ አሳ እስራኤለ ስንꬃፈ አሞረታ የደꬅድ ꬋይስስ። ያትን፥ ኔኒ ዛራዳ ነዉ ኤካናዉ ዋታ ቆፓይ? 24 ኔኒ ነ ፆሳይ ካሞሽ ነዉ እመይሳ ኤክኪ? ሽን ኑኒ፥ ጎዳይ ኑ ፆሳይ ኑስ እምዳባ ኡባ ላትድ ዳና። 25 ግዶሽን ኔኒ ስፎራ ናኣ፥ ሞአበ ካዋ ባላቃፐ ምናይ? እ እስራኤለ አሳራ ኦየትደ ዎይኮ ኦለትዴ? 26 እስራኤለ አሳይ ሀሰቦና፥ አሮኤራነ ኤንታ ዩሹዋን ደእያ ጉታታ ኡባ፥ ቃስ አርኖና ሻፋ ማታን ደእያ ካታማታ ኡባ ላትድ ሄꬑ ፄቱ ላይꬅ ደእስ። ያትን፥ ሄ ዎደ አይስ ዎꬃ ኤካብኪ? 27 ታኒ ህንተና አይኮካ ቆሀብከ፤ ሽን ታና ኦላናዉ ደንዳዳ ናቀይ ነና። ፕርድያ ጎዳይ ሀች እስራኤለፐነ አሞነፐ ግዶን ፕርዶ” ያግስ።

28 ሽን ዮፍታሄይ ኪትዳ ኪታ አሞነታ ካዎይ ስኦና እፅስ።

29 ሄ ዎደ ጎዳ አያናይ ዮፍታሄ ቦላ ዎꬍን፥ ጋላዳነ ምናሰ ቢታ ካንꬅ ብድ፥ ጋላዳ ቢታን ደእያ ምፅጳ ስምስ። ያፐ ኦላንቾታ ካለꬅድ አሞነ ቢታ ብስ። 30 ዮፍታሄይ ጎዳስ ቃንገትድ፥ “ኔኒ አሞነታ ታ ኩሸን አꬃዳ እምኮ፥ 31 ታኒ ኦላ ፆናዳ ሶ ስምያ ዎደ ታና ሞካናዉ ታ ሶፐ ከይያ አይብካ ኔሳ፤ ታኒ እያ ፁግያ ያርሾ ኦꬃዳ ነዉ ሺሻና” ያግስ።

32 ሄሳፈ ጉየ፥ ዮፍታሄይ አሞነታ ኦላናዉ ዛዋ ብን፥ ጎዳይ ኤንታ እያ ኩሸን አꬅድ እሚስ። 33 አሮኤራፐ ብድ ምንታነ አቤል-ክራምማ ጋካናዉ ደእያ ላታሙ ካታማታ ኦልድ ꬋይስስ፤ ዳሮ አሳ ዎꬍስ። ሄሳፈ ጉየ፥ አሞነት እስራኤለታስ ሃረትዶሶና።

34 ዮፍታሄይ ባ ሶ ምፅጳ ስምያ ዎደ እያ ናእያ ካራቦ ኦይካዳ የፃሸነ ዱራሸ እያ ሞካናዉ ከያሱ። እያዉ ኢፐ አትሽን፥ ሀራ ናእ ባዋ። 35 እ እዮ በእዳ ዎደ አዛንድ ባ ማኡዋ ዳክድ፥ “ሀይ ታ ናተ! ታና ካዉሻዳሳ፤ ታና መቶን የጋዳሳ። ታኒ ጎዳስ ቃንጋስ፤ ጋꬆና አጋናዉ ዳንዳእከ” ያግስ።

36 ናእያ፥ “ታ አዋዉ፥ ኔኒ ጎዳስ ቃንግዳባ ግድኮ፥ ጎዳይ ነ ሞርከታ፥ አሞነታ ቦላ ኔኒ ሀሎ ከይዳ ግሾ ነ ቃንግዳባ ታ ቦላ ፖላ” ያጋሱ። 37 ሽን እያ ባ አዋኮ፥ “ታዉ እስባ ኦꬃርክ። ታኒ አዝና ገሎና አትያ ግሾ፥ ታ ላገታራ ባዳ ዙማ ቦላ ታ ጌላኦተꬃስ ዬካና መላ ናምኡ አጌናስ ታና የዳርክ” ያጋዳ ኦይቻሱ።

38 እ፥ “ባ” ያግድ፥ ናምኡ አጌናስ እዮ የድስ። እያ ባ ላገታራ ዙማ ቦላ ከያዳ ባ ጌላኦተꬃስ ኤንታራ ዬካሱ። 39 ናምኡ አጌናፐ ጉየ፥ ባ አዋኮ ስማዳ ያሱ። እ አዋይ ጎዳስ ቃንግዳ ባ ቃንገꬃ ጋꬅስ፤ እያ ጌላኦሽን ሀይቃሱ።

ሄ ዎደፐ ዶምድ፥ 40 እስራኤለ ማጫ ናይት ላይꬃን ላይꬃን ኦይዱ ጋላስ ባንታ ሶፐ ሃክ ብድ፥ ጋላዳ አድያ ዮፍታሄ ናኤስ ዬከይስነ ካዮተይስ ሜዘ ግድስ።