1 ኤፍሬማ አሳይ ኦላ ባናዉ ፄገትድ፥ ዮርዳኖሰ ሻፋ ፕንድ፥ ፃፎና ጋክዳ ዎደ ዮፍታሄኮ፥ “አሞነታ ኦላናዉ ዛዋ ፕናዳ ባሸ ኑኒ ኔራ ባና መላ አይስ ፄጋብኪ? ኑኒ ነ ቦላ ጎርድድ ነ ኬꬃን ታማ የዳና” ያግዶሶና።

2 ዮፍታሄይ ኤንታኮ፥ “ታንነ ታ አሳይ አሞነታራ ዳሮ ባፀን ገልዳ ዎደ ህንተና ፄጋስ፤ ሽን ህንተ ታና ኤንታፈ አሽበከታ። 3 ህንተ ታና አሾናይሳ በእዳ ዎደ ዛዋ ፕናዳ ታ ሸምፑዋስ ቃቶና አሞነታ ኦላናዉ ባስ፤ ጎዳይ ኤንታ ታ ኩሸን አꬅድ እሚስ። ያትን፥ ህንተ ሀች አይስ ታና ኦላናዉ ይደቲ?” ያግስ።

4 ዮፍታሄይ ጋላዳ አሳ ኡባ ሺሽድ፥ ኤፍሬማ አሳራ ኦለትን ጋላዳ አሳይ ፆንዶሶና። ኤፍሬማ አሳይ ካሰ ኤንታ፥ “ህንተ ጋላዳ አሳይ ካሰ ኤፍሬማነ ምናሰ ኮቻታ ካድድ ይዳይሳታ ግደከቲ?” ያጎሶና።

5 ኤፍሬማ አሳይ ከስ ኤኮናዳ ዮርዳኖሰ ሻፋ ፕኑዋ ኡባ ጋላዳት ኦይክዶሶና። ከስ ኤካናዉ ኮይያ ኤፍሬማ አስ ፕናናዉ ኦይችያ ዎደ ጋላዳት፥ “ኔኒ ኤፍሬማ አሴ?” ያግድ ኦይቾሶና። እ፥ “ግድከ” ጊኮ፥ 6 ኤንቲ፥ “አነ፥ ‘ሽቦሌተ’ ጋ” ያጎሶና። ሽን እ፥ “ሽ” ጌተትያ ፕዳልያ ሎይꬅ ፄጋናዉ ዳንዳኦና ግሾ፥ “ስቦሌተ” ያጌስ። እ ሄሳ ግያ ዎደ ኦይክድ፥ ዮርዳኖሰ ሻፋ ፕንያ በሳን ዎꬎኦሶና። ሄ ዎደ ያን ኤፍሬማ አሳፐ ኦይታማነ ናምኡ ሙኩሉ አሳይ ሀይቅስ።

7 ዮፍታሄይ እስራኤለ አሳ ኡሱፑን ላይꬅ አይስስ። ጋላዳ አደይ ዮፍታሄይ ሀይቅድ ጋላዳን ደእያ እስ ካታማን ሞገትስ።

8 ዮፍታሄፐ ካልድ፥ ቤተለመን እብፃን እስራኤለ አሳ ሃርስ። 9 እብፃናስ ሀስታሙ አደ ናይትነ ሀስታሙ ማጫ ናይት ደኦሶና። እ ባ ማጫ ናይታ ባ ኮቸ ግዶና አደ ናይታስ እሚስ፤ ባ አደ ናይታስ ባ ኮቸ ግዶና ማጫ ናይታ ጊግስድ እሚስ። እብፃን እስራኤለ ላፑን ላይꬅ አይስስ። 10 ሄሳፈ ጉየ፥ እብፃን ሀይቅድ ቤተለመን ሞገትስ።

11 እብፃናፐ ካልድ ዛብሎና ኮቸ ግድዳ ኤሎን እስራኤለ አሳ ታሙ ላይꬅ ሃርስ። 12 ሄሳፈ ጉየ ኤሎን ሀይቅድ ዛብሎና ቢታን ደእያ አያሎናን ሞገትስ።

13 ኤሎናፐ ካልድ፥ ፕራቶና አደይ፥ ህላላ ናአይ አብዶን እስራኤለ አይስስ። 14 አብዶናስ ላፑን ታሙ ባቁሎታ ቶግያ ኦይታሙ አደ ናይትነ ሀስታሙ ናአ ናእ ደኤስ። አብዶን እስራኤለ ሆስፑን ላይꬅ አይስስ። 15 ሄሳፈ ጉየ፥ ህላላ ናአይ አብዶን ሀይቅድ ደረይ ዳርያ አማለቃን፥ ኤፍሬማ ቢታን፥ ፕራቶና ጌተትያ ዱፎን ሞገትስ።