1 እስራኤለ አሳይ ጎዳ ስንꬃን ቃስካ ኢታባ ኦꬅዶሶና። ያትን፥ ጎዳይ ኤንታ ኦይታሙ ላይꬅ ፍልስፄመ አሳ ኩሸን አꬅድ እሚስ።

2 ሄ ዎደ ፆርአ ካታማን ማኑሄ ጌተትያ እስ አደይ ደኤስ። እ ዳነ ኮቸ፤ እያ ማችያ ማይንꬅ ግድዳ ግሾ እያዉ ናአ የላቡኩ። 3 እስ ጋላስ ጎዳ ኪታንቾይ ሄ ማጫሴስ ቆንጭድ፥ “ኔኒ ማይንꬅ፤ ነዉ ናእ ባዋ፤ ሽን ነ ቃንꬃታና፤ አደ ናአካ የላና። 4 ሄሳ ግሾ፥ ዎይነ ዎይኮ ማꬆይያ ኡሽ ኡዮና መላነ ቱናባ አይባካ ሞና መላ ናገታ። 5 ነ ቃንꬃታዳ አደ ናአ የላና። ናአይ የለትዳ ዎድያፐ ዶምድ ፆሳስ ዱማትዳ ናዝራወ ግድያ ግሾ እያ ሁጵያ ሜዶፓ። እ እስራኤለ ፍልስፄመታ ኩሸፐ አሾ ዶማና” ያግስ።

6 ማጫስያ ባዳ፥ ባ አዝናስ ሀይሳዳ ያጋዳ ኦዳሱ፤ “እስ ፆሳ አስ ታኮ ይስ፤ እያ መꬎይ ፆሳ ኪታንቾ መላ ዳሮ ያሼስ። እ አዉፐ ይዳኮ ታኒ እያ ኦይቻብከ፤ እካ ባ ሱንꬃ ታዉ ኦድቤና። 7 ሽን እ ታኮ፥ ‘ነ ቃንꬃታና፤ አደ ናአ የላና። ናአይ የለትዳ ዎደፐ ዶምድ ሀይቃና ጋካናዉ ፆሳስ ዱማትዳ ናዝራወ ግድያ ግሾ ዎይነ ዎይኮ ማꬆይያ ኡሽ ኡዮፓ፤ ቱናባካ ሞፓ’ ያግስ” ያጋሱ።

8 ሄሳፈ ጉየ፥ ማኑሄይ፥ “አቤት ጎዳዉ፥ ናአይ የለትያ ዎደ አይ ኦꬃናዉ ኮሽያኮ ኤርሳና መላ ኔኒ ኪትዳ ፆሳ ኡራይ ኑኮ ስሚድ ያና መላ ኦꬃርክ” ያግድ ጎዳ ዎስስ።

9 ፆሳይ ማኑሄ ዎሳ ስእስ። ማችያ ጋደን ኡትዳሽን ፆሳ ኪታንቾይ ናምአንꬆ ይስ፤ ሽን ሄ ዎደ እ አዝናይ ማኑሄይ ኢራ ዴና። 10 ማችያ ኤለሳዳ ባ አዝናኮ ባዳ፥ “ሄደ ታኮ ይዳ አደይ ሀች ታዉ ቆንጭስ” ያጋሱ።

11 ማኑሄይ ኡትዳ በሳፈ ደንድድ፥ ባ ማችዉ ካል ብድ ኡራኮ፥ “ታ ማቸራ ኦደትዳይ ነኔ?” ያግድ ኦይችስ።

ኡራይ፥ “ኤ፥ ታና” ያግስ።

12 ማኑሄይ፥ “ኔኒ ኦድዳ ቃላይ ፖለትያ ዎደ የለታና ናኣ ደኡዋስነ ኦሱዋስ ዎጋይ አይቤ?” ያግድ እያ ኦይችስ።

13 ጎዳ ኪታንቾይ፥ “ነ ማችያ ታኒ ኦድዳ ኡባፈ ናገቶ። 14 ዎይነ ምꬃፈ በንትያባ አይባካ ሞፖ፤ ዎይነ ዎይኮ ማꬆይያ ኡሽ ኡዮፖ፤ ቱና ግድዳባ ሞፖ። ታኒ እዉ ኦድዳ ኡባ ኦꬆ” ያግስ።

15 ማኑሄይ ጎዳ ኪታንቹዋኮ፥ “ኑኒ ነዉ እስ ኡርገ ዴሽ ሹክድ ጊግሳና ጋካናዉ ሀያና ጉꬁ ጋምአርክ” ያግስ።

16 ጎዳ ኪታንቾይ፥ “ታኒ ጋምእያኮካ ነ ካꬃ ሚከ። ሽን ኔኒ ፁሳ ያርሾ ጊግሳናዉ ኮይኮ፥ ጎዳስ ያርሻናዉ ዳንዳኣሳ” ያግስ። እ ጎዳ ኪታንቾ ግደይሳ ማኑሄይ ኤርቤና።

17 ማኑሄይ ጎዳ ኪታንቹዋኮ፥ “ኔኒ ኦድዳ ቃላይ ፖለትያ ዎደ ኑኒ ነና ቦንቻና መላ ነ ሱንꬃይ ኦኔ?” ያግድ ኦይችስ።

18 ጎዳ ኪታንቾይ፥ “ነ ታ ሱንꬃ አይስ ኦይቻይ? ታ ሱንꬃይ ማላልሰይሳ”*ማላልሰይሳ፦ ታ ሱንꬃ ነ ኤራናዉ ዎይኮ ኦይካናዉ ዳንዳኦና ግሾ ታ ሱንꬃይ ማላልሰይሳ ያግድ እያ ሱንꬃይ ማላልስያ ኦሶን ቆንጨይሳ በስስ። ያግድ ዛርስ።

19 ማኑሄይ ኡርገ ዴሽነ ካꬃ ያርሹዋ ኤክድ ሹቻ ቦላ ጎዳስ ያርሽስ። ማኑሄይነ እያ ማችያ ፄልሽን፥ ጎዳይ ማላልስያባ ኦꬅስ። 20 ያርሾ በሳፈ ታማ ላጮይ ፑደ ላፅድ ከይሽን፥ ጎዳ ኪታንቾይ ታማ ላጩዋ ግዶራ ሳሎ ከይስ። ማኑሄይነ እያ ማችያ ሄሳ በእድ ሶምኦራ ሳአን ጉፋንዶሶና። 21 ጎዳ ኪታንቾይ ማኑሄስነ እያ ማቼስ ዛር በንቶና አግን፥ ማኑሄይ እ ጎዳ ኪታንቾ ግድዳይሳ ሄ ዎደ አኬክስ።

22 ማኑሄይ ባ ማቸኮ፥ “ኑኒ ፆሳ በእዳ ግሾ ሀይቃና” ያግስ።

23 ሽን እያ ማችያ፥ “ጎዳይ ኑና ዎꬋናዉ ኮይዳባ ግድያኮ፥ ፁሳ ያርሹዋነ ካꬃ ያርሹዋ ኑፐ ኤከና ዎይኮ ሀ ኡባ ኑና በሰና ዎይኮ ሀይሳ ኑስ ኦደና” ያጋዳ ዛራሱ።

24 ማችያ አደ ናአ የላሱ፤ እያ ሱንꬃ ሳምሶና ጋዳ ፄጋሱ። ናአይ ድጭስ፤ ጎዳይካ እያ አንጅስ። 25 ናአይ ፆርአፈነ ኤሽታኦላፐ ግዶን ደእያ ዳነ ጉታን ደእሽን ጎዳ አያናይ እያ ደንꬆ ዶምስ።