1 ሄ ዎደ እስራኤለ ቢታን ካዎይ ባዋ። ሄ ዎደይ ጋካናዉ ዳነ ኮቻት እስራኤለ ኮቻታ ግዶን ላትዳ ቢት ባዋ። ኤንቲ ባንታዉ ደእያ ቢታ ኮይሸ ደኦሶና። 2 ሄሳ ግሾ፥ ዳነ ኮቻት ባንታ ግዶፈ እቻሹ ምኖ ኦላንቾታ ዶርድ ቢታ ዎቻና መላ ፆርአፈነ ኤሽታኦላፐ ኤንታ ኪትዶሶና።

ኤንቲ ደረይ ዳርያ ኤፍሬማ ቢታ ጋክድ ምካ ሶን አቅዶሶና። 3 ኤንቲ ምካ ሶን ደእያ ዎደ ሌወ ኮቸ ግድዳ ናአተꬃ እያ ኦዳን ኤርዶሶና። ኤንቲ እያኮ ሺቅድ፥ “ነና ሀይሳ ኤህዳይ ኦኔ? ሀይሳ አይስ ያዲ?” ያግድ ኦይችዶሶና።

4 እ ዛሪድ፥ “ሚክ ታዉ ዳሞዘ ቃንፅን፥ ታኒ እያዉ ካህነ ግዳዳ ኦꬃይስ” ያግስ።

5 ኤንቲ፥ “ኑኒ ብያ ኦገይ ኑስ ሱራነ፥ ሱረነ ሀያና ኑስ ፆሰ ኦይቻ” ያግዶሶና።

6 ካህነይ፥ “ሳሮ ቢተ፤ ህንተ ብያ ኦግያን ጎዳይ ህንተራ ግዳና” ያግስ።

7 ሄሳፐ ጉየ፥ እቻሹ አሳት ያፐ ደንድድ፥ ላይሻ ካታማ ጋክዶሶና። ያን ደእያ አሳይ ስዶና ቢታ አሳዳ ሳሮን ደኤይሳ በእዶሶና፤ አሳት ኦንካ ስꬎና ዎፑ ግዳ አስ፤ ኤንታዉ አይኮይካ ፓጮና ኡባባይ ኩምዳ አስ። አይ አሳራካ ጋሄቶና ስዶና አሳፐ ሃክድ ባንታዉ ዱማ ደኦሶና።

8 እቻሹ አሳት ፆርአንነ ኤሽታኦላን ደእያ ባንታ እሻታኮ ስምዶሶና፤ ኤንታ እሻት፥ “አይ ዎረ ኤክድ ይደቲ?” ያግዶሶና።

9 ኤንቲ ዛሪድ፥ “ቢታይ ዳሮ አራዳ ግደይሳ ኑ በእዳ። አነ ደንድድ ላይሻ ኦሎስ። ሀይሳን ኦሶ ꬋይድ ጮ ኡቶፍተ፤ ኤለ ብድ ኦይክተ። 10 ህንተ ያ ብድ፥ ኦናነ ስꬎና ኡትዳ አሳኮ ጋካና። ቢታይ ዳልጋ፤ አሳስ ኮሽያ ኡባባይ ሄ ቢታን ደኤስ። ፆሳይ ሄ ቢታ ህንተዉ እሚስ” ያግዶሶና።

11 ያትን፥ ዳነ ኮቻፈ ቶራ ዳንጭዳ ኡሱፑን ፄቱ አሳት ፆርአፐነ ኤሽታኦላፐ ደንድድ ብዶሶና። 12 ይሁዳ ቢታን ቅርያት-ይኣርማፐ ዉሎሀ ባጋራ ኡትዶሶና። ሄሳ ግሾ፥ ሄ በሳይ ሀች ጋካናዉ ዳነ ጉታ ጌተትድ ፄገቴስ። 13 ያፐ ደንድድ ደረይ ዳርያ ኤፍሬማ ቢታን ደእያ ምካ ሶ ይዶሶና።

14 ላይሻ ቢታ ዎቻናዉ ብዳ እቻሹ አሳት ባንታ እሻታኮ፥ “ሀ በሳን፥ ሀ ኬꬃታፐ እሱዋን ኤፉደይ፥ ሶ ግዶ ኤቃ ምስለትነ ምꬃፈ ኦꬅድ ብራ ሼሽድ ትይዳ ምስለይ ደኤይሳ ኤሬቲ? አነ አይ ኦꬃናዉ ኮሽያኮ ቆፕተ” ያግዶሶና። 15 ኤንቲ ኦግያፐ ስሚድ፥ ሌወ ኮቸ ግድዳ ናአተꬃ ካህነይ ደእያ ምካ ሶ ብድ እያ ሳሮꬅዶሶና። 16 ሄ ዎደ ኡሱፑን ፄቱ ዳነ ኦላንቾት ኦላ ሚሸ ኦይክድ ፐንገ ቦላ ኤቅዶሶና። 17 ኤንቲ ሄ ካህንያራ ያን ኤቅዳሽን፥ ቢታ ዎችያ እቻሹ አሳት ምካ ሶ ገልድ፥ ምꬃፈ ኦꬅድ፥ ብራ ሼሽድ፥ ትይዳ ኤቃ ምስልያ፥ ኤፉድያነ ሶ ግዶ ኤቃ ምስለታ ኤክዶሶና።

18 ሄ ዎደ ካህነይ ኤንታ፥ “ዋተቲ?” ያግድ ኦይችስ።

19 ኤንቲ እያ፥ “ሀይዛ፥ እስ ቃላካ ፖጎፓ። ኑራ ባዳ ኑስ አዋነ ካህነ ግዳ። እስ ኬꬃ አሳስ ካህነ ግደይሳፈ እስራኤለ ግድያ እስ ኮቻስ ካህነ ግደይስ ነዉ ሎኤኔ?” ያግዶሶና። 20 ካህነይ ሄሳ ስእድ ኡፋይትድ ኤፉድያ፥ ሶ ግዶ ኤቃ ምስለታነ ምꬃፈ ኦꬅድ ብራ ሼሽድ ትይዳ ምስልያ ኤክድ ኤንታራ ብስ።

21 ያፐ ደንድድ፥ ባንታ ናይታ፥ ባንታ መህያነ ባንታዉ ደእያባ ኡባ ስን አꬅድ ብዶሶና። 22 ኤንቲ ምካ ሶፐ ሃክድ ብዳፐ ጉየ፥ ሚክ ባ ሾሮታ ፄግን፥ ዳነ አሳታ ካልድ ጋክዶሶና። 23 ኤንታ ጋክድ ዋስን፥ ዳነ አሳት ጉየ ስሚድ፥ “ዋናዲ? ሀ አሳ ኡባ አይስ ሺሻዲ?” ያግድ ምካ ኦይችዶሶና።

24 ሚክ ዛሪድ፥ “ታኒ መꬍዳ ታ ፆሳታነ ታዉ ኦꬅያ ካህንያ ቦንቅደታ። ያትን ታዉ አትዳባይ አይቤ? ታና፥ ‘ዎይግድ ዋናድ፥ ጌቲ?’ ” ያግስ።

25 ዳነ አሳት፥ “አነ ዶና ፖጋዳ ነና ኤራ! ሀ ሸነራ ደእያ አሳ ኔኒ ደንꬅኮ፥ ኤንቲ ነ ቦላ ደንዳና፤ ነናነ ሶ አሳ ኡባ ꬋይሳና” ያግዶሶና። 26 ዳነ አሳት ባንታ ኦግያ ብዶሶና። ምክካ ኤንቲ ባፐ ዳሮ ምኖ ግደይሳ በእድ ባ ሶ ስምስ።

27 ዳነ አሳት ሚክ መꬍዳ ፆሳታነ እያ ካህንያ ኤክድ፥ ሌሳን ኦናካ ስꬎና ሳሮ ደእያ አሳታኮ ብድ፥ አሳ ኡባ ማሻን ዎꬍድ ካታማ ታማን ፁግዶሶና። 28 ላይሻ ካታማይ ስዶናፐ ሃክድ ደእያ ግሾነ ኤንቲ ሀራ አሳራ ጋሄትድ ኤሮና ግሾ ኤንታ አሻናዉ ኦንካ ዳንዳእቤና። ላይሻ ካታማይ ቤት-ረሆባ ጌተትያ በሳ ማታን ደእያ ዛንጋራን ደኤስ።

ዳነ አሳት ካታማ ዛር ኬፅድ ያን ደእዶሶና። 29 ካታማ ሱንꬃ በን ባንታ ማይዛ ያይቆባ ናኣ ዳነ ሱንꬃን ላምድ፥ ዳነ ያግድ ሱንꬅዶሶና፤ ሽን ኮይሮ ሄ ካታማይ ላይሻ ጌተቴስ። 30 ዳነ አሳት ባንታዉ ኤቃ ምስልያ ያን ዎꬅድ፥ ሙሰ ናኣ ገድሶናፐ የለትዳ ዮናታና ባንታ ካህነ ኦꬅዶሶና። እያ ኮቻት አሳይ ድኤትድ ብዳ ዎደ ጋካናዉ ያን ካህነ ግድዶሶና። 31 ሄሳዳ ሀንድ፥ ጌሻ ዱንካነይ ሴሎን ደእዳ ላይꬃ ኡባን ሚክ ኦꬅዳ ምስለት ያን ጋምእዶሶና።