1 ደረይ ዳርያ ኤፍሬማ ቢታን ምካ ጌተትያ እስ አደይ ደኤስ። 2 እስ ጋላስ ሚክ ባ አይዉ፥ “ኔፐ አስ ታማነ እስ ክሎ ግራመ ብራ ሳንትመ ካይስን ኔኒ ሄ ካይስዳ አድያ ባድሽን ታ ስአስ። ሄ ሚሸይ ታ ማታን ደኤስ፤ ታኒ ኤካስ” ያግስ።

እያ አይያ፥ “ታ ናአዉ፥ ነና ጎድ አንጆ” ያጋሱ። 3 ናአይ ታማነ እስ ክሎ ግራመ ብራ ሳንትመ አየስ ዛርስ። እያ አይያ፥ “ባደꬃይ ታ ናኣ ጋኮና መላ ታኒ ሀ ሚሽያ ጎዳስ ዱማያና። ብራ ሼሽድ፥ ምꬃፈ ኦሰትዳ ኤቃ ምስልያ ትያናዉ ጎኤታና፤ ብራ ታ ነዉ ዛራና” ያጋሱ።

4 ናአይ ሚሽያ ባ አየስ ዛርን፥ እያ ሄ ብራፐ ናምኡ ፄቱ ብራ ሳንትመ ኤካዳ፥ ምꬅ ማስድ፥ ብራ ሼሽ ትይድ፥ ኤቃ ምስለ መꬍያ፥ እስ ሂላስ እማሱ። እ ኦꬅዳ ምስለይ ምካ ሶን ኡትስ።

5 ምካስ ኤቃ ጎይንያ ኬꬅ ደኤስ። እ ኤፉደነ ሶ ግዶ ኤቃ ምስለታ ጊግስድ፥ ሄ ኬꬃን ባ ናይታፐ እሱዋ ካህነ ኦꬅድ ሹምስ። 6 ሄ ዎደ እስራኤለ ቢታን ካዎይ ባዋ፤ አስ ኡባይ ባዉ ሎኦ ዳንዳባ ኦꬄስ።

7 ሄ ዎደ ይሁዳ ቢታን ቤተለመ ካታማን ሌወ ኮቸ ግድዳ እስ ናአተꬃይ ደኤስ። 8 ሀ አደይ ባዉ ደእያ በሲ ኮያናዉ ቤተለመ ካታማፐ ደንድድ ደረይ ዳርያ ኤፍሬማ ቢታን ደእያ ምካ ሶ ጋክስ። 9 ምክ፥ “አዉፐ ያዲ?” ያግድ ኦይችስ።

አደይ፥ “ታኒ ይሁዳ ቢታ ቤተለመ ካታማፐ ያስ፤ ታኒ ሌወ ኮቸ። ሀእ ታኒ ደእያ በሲ ኮያይስ” ያግድ ዛርስ።

10 ሚክ እያኮ፥ “ታራ ደአ፤ ታዉ አዋነ ካህነ ግዳ። ታኒ ነዉ ላይꬃን ላይꬃን ታሙ ብራ ሳንትመ፥ ኩመꬃ አፍላነ ምያባ እማና” ያግስ። 11 ናአተꬃ ሌወይ ምካራ እስፈ ዳናዉ ገልስ፤ ምካስ የልዳ ናአዳ ሀንስ። 12 ሚክ እያ ባ ካህነ ኦꬅድ ሹምን እያ ሶን ደእስ። 13 ሚክ፥ “እስ ሌወይ ታዉ ካህነ ግድዳ ግሾ ጎዳይ ታባ ሎይꬃናይሳ ኤራይስ” ያግስ።